Fevralın 1-dən Azərbaycan ərazilərində ictimai iaşə obyektlərində, eləcə də restoran, kafe və çay evlərində xidmətlərin bərpa olunmasından sonra bəzi vətəndaşlarımız düşünürlər ki, şənlik, ad günü, nişan-toy mərasimi keçirə bilər, hətta bəzi şou-biznesçilər şou proqramlar düzənləmək üçün şərait yarandığını düşünürlər. Amma bu obyektlərin açılması o demək deyil ki, burada adıçəkilən məraimləri keçirmək mümkündür. Çünki bu mərasimlərin keçirilməsi virusun yayılmasına əsas şərait yaradan amillərdəndir.
Daxili İşlər Nazirliyi (DİN) ölkədə toy və ad günlərinin keçirilməsi ilə bağlı əhaliyə müraciət edib.
DİN-in Mətbuat Xidmətinin KİV və İctimaiyyətlə Əlaqələr şöbəsinin rəisi, polis mayoru Elşad Hacıyev mətbuata bildirib ki, fevralın 1-dən etibarən ölkə ərazisində ictimai iaşə obyektləri, eləcə də restoran, kafe və çay evləri və bu kimi digər məkanlarda müştərilərə saat 06:00-dan 00:00-dək yerində xidmətlər bərpa olunub: “Fəaliyyətinə icazə verilən iş və xidmət sahələrində pandemiya dövrü ilə əlaqədar Nazirlər Kabinetinin müvafiq qərarları ilə müəyyən edilən məhdudiyyət və tələblərə ciddi riayət olunmalıdır. Xüsusi karantin rejimi dövründə ictimai iaşə obyektləri, eləcə də restoran, kafe və çay evləri və bu kimi digər məkanlarda şou-əyləncə, toy, nişan və digər kütləvi tədbirlərin təşkili və keçirilməsi qadağandır”.
“...hər hansı bir toy, şənlik, ziyafət keçirmək fikrindən çəkinməliyik”
“Vəfa” Sosial-İctimai Birliyinin sədri Fatimə Hacıbəyli hesab edir ki, DİN tərəfindən ictimaiyyətin bu barədə məlumatlandırılması çox müsbət haldır. Onun sözlərinə görə, vətəndaşlar artıq bilirlər ki, bu ictimai iaşə müəssisələri, kafe və restoranlar, çay evlərində hər hansı bir tədbir, mərasim keçirmək olmaz, bu qadağandır. “Bütün dünyada, o cümlədən də ölkəmizdə hələ koronavirus pandemiyasının kökü kəsilməyib və yoluxma halları mövcuddur. Bilirsiniz ki, istənilən kütləvi tədbir, mərasim və yığıncaqlar real koronavirusa yoluxma risqi yaradır, yoluxma mənbəyidir. Hesab edirəm ki, bütün vətəndaşlarımız Daxili İşlər Nazirliyinin çağırışlarına böyük önəm verməli, mövcud karantin rejiminin bütün qaydalarına əməl etməlir və toy, nişan, ad günü keçirməyə cəhd göstərməməlidirlər. Kafe və restoranların, çay evlərinin fəaliyyətinə icazə verilibsə, bu o demək deyil ki, insanlar gedib orada hansısa şənlik keçirsin, şou müğənniləri şou proqramlar düzənləsinlər. Heç bir vətəndaş qanunları pozmamalı, səbrlə, təmkinlə pandemiyanın başa çatmasını gözləməlidir. İnsanların özündə mənəvi məsuliyyətin olması vacibdir. Hər bir vətəndaş bilməlidir ki, onun karantin qaydalarına zidd addım atması, məhdudiyyətləri pozması yoluxma risqini artıra bilər. Gizlin deyil ki, kütləvi yoluxma halları ən çox gizlin keçirilən yas və şənlik mərasimlərində müşahidə edilir. Onlarla şəxs öz məsuliyyətsiz davranışı ucbatından virusa yoluxur və özünün və ailə üzvlərinin həyatını təhükəyə atır”.
F.Hacıbəylinin sözlərinə görə, son həftələr virusa yoluxanların sayında azalma dinamikasının müşahidə edilməsi onu göstərir ki, biz məsuliyyətli olub pandemiya əleyhinə olan bütün qaydalara əməl etsək, bu xəstəliyə qalib gələ bilərik. “Əgər istəyiriksə ki, birdəfəlik virusdan xilas olaq və bu xəstəliyə qalib gələk, onda məsuliyyətli olmalıyıq, restoran və kafelərin açılmasından sui-istifadə edərək hər hansı bir toy, şənlik, ziyafət keçirmək fikrindən çəkinməliyik. Çıxış yolu qaydalara riayət etməkdir” - deyə F.Hacıbəyli qeyd etdi.
İradə SARIYEVA
