“Vaksinasiyanın bölgüsündə yaranmış gərginliyin səbəbi ədalətsizlikdir, bu sahədə hətta müttəfiqlər arasındakı münasibətlərdə olan ziddiyyətlərdir. Bu fakt özlüyündə çox narahatedicidir”. Bunu Azərbaycan Prezidenti İlham Əliyev AzTV-yə müsahibəsində deyib.
Prezident müsahibə zamanı bildirib ki, inkişaf etmiş ölkələr bu vaksinləri öz aralarında ədalətli bölə bilmirlərsə və qarşılıqlı ittihamlar irəli sürürlərsə, onda başqa ölkələr nə fikirləşməlidirlər? “Kasıb ölkələr, inkişafda olan ölkələrin vətəndaşları, bəs onlara kim kömək göstərəcək? Bu haqda düşünülmür? Mən inkişaf etmiş bir çox ölkələrin liderlərindən bu günə qədər bu çağırışları eşitməmişəm”.
Prezident qeyd edib ki, inkişaf etmiş ölkələr dünya əhalisinin 14 faizini təşkil edir. Halbuki, inkişaf etmiş ölkələr bu günə qədər dünya vaksinlərinin 53 faizini sifariş ediblər: “Yəni bu, yenə də ədalətsizlik, qeyri-bərabərlikdir. “Moderna” vaksini var, səhv etmirəmsə Amerika istehsalıdır. “Moderna” vaksininin 98 faizini zəngin ölkələr sifariş ediblər. “Pfizer” Avropa istehsalı vaksinidir. “Pfizer” vaksininin 96 faizini zəngin ölkələr sifariş ediblər. Yaxşı, bəs kasıb ölkələrin vətəndaşları nə etməlidirlər, xəstələnməlidirlər? Onlar xəstələnəndə onların ölmək ehtimalı daha böyükdür. Çünki o ölkələrdə səhiyyə sistemi inkişaf etmiş ölkələrdən müqayisəedilməz dərəcədə geridə qalıb. Ona görə, bax, bu məsələlər haqqında biz danışmalıyıq, bunu gizlətməməliyik. Ancaq bu məlumat açıq mətbuatda gedir, sanki ondan sonra unudulur. Çünki sərf etmir. Dünya mediasına rəhbərlik edən qurumlara sərf etmir. Çünki bu, o aktorların sözlərinin əməlləri ilə böyük fərqini göstərir”.
Prezident vaksinin bütün ölkələr arasında ədalətli bölünməsini istəyir. Hətta bununla bağlı təklif də edib ki, zəngin ölkələr vaksini alıb kasıb ölkələrə versinlər. Ancaq inkişaf etmiş, zəngin ölkələr dövlət başçısının bu təklifini qəbul etməyiblər.
“Zəngin ölkələr vaksin məsələsi ilə bağlı kasıb ölkələrə yardım etsəydi, koronavirus infeksiyası qısa zamanda yox olacaqdı”
Həkim-terapevt Rasif Bağırov bildirdi ki, koronavirusla mübarizə məqsədilə bir neçə fərqli vaksin hazırlanıb. Bu vaksinlər koronavirusla mübarizəfə effektiv sayılır: “Son bir ayda dünyada maraqlı proses yaşanır. Belə ki, Avropadan gətirilən peyvəndlər imkanlı ölkələr üçün nəzərdə tutulur. Zəngin ölkələr kasıb ölkələrə vaksin almaqda yardım etmək istəmirlər. Belə çıxır ki, pulu olmayan ölkə vaksin ala bilməyəcək və o ölkələrin əhalisinin taleyi sual altında qalacaq. Halbuki, Prezident İlham Əliyev təklif etmişdi ki, zəngin ölkələr bu məsələ ilə bağlı kasıb ölkələrə yardım etsinlər. Belə olardısa, koronavirus infeksiyası qısa zamanda yox olacaqdı”.
Günel CƏLİLOVA
