“Ölkəmizin bütün bölgələrində xəstəxanalar fəaliyyət göstərir. Son 17 il ərzində 750-dən çox xəstəxana ya yenidən tikilib, ya da ki, əsaslı şəkildə təmir edilib. Səhiyyə sistemimizin bu xəstəxana və tibb müəssisələri fondu demək olar ki, indi ən yüksək standartlara cavab verir. Bundan sonra, əlbəttə ki, biz, ilk növbədə, səhiyyə sisteminin təkmilləşdirilməsi və tibbi xidmətin xüsusilə indiki dövrdə keyfiyyətini artırmaq üçün əlavə addımlar atacağıq”.
Bunu Prezident İlham Əliyev Abşeron Rayon Mərkəzi Xəstəxanasının yeni binasının açılışından sonra Azərbaycan Televiziyasına müsahibəsində deyib.
Ölkə başçısı müsahibəsində qeyd edib ki, səhiyyə sahəsində təkmilləşməyə ehtiyac var. Maraqlıdır, səhiyyə sahəsində nə kimi təkmilləşməyə, yeniliklər etməyə ehtiyac var?
“...idarəetmənin təkmilləşdirilməsi də vacib məsələdir”
Millət vəkili Musa Quliyev “Bakı-Xəbər”ə açıqlamasında qeyd etdi ki, dövlət başçısı Azərbaycan Televiziyasına müsahibəsində vacib məsələlərə toxundu, o cümlədən, səhiyyə sisteminin inkişaf perspektivləri haqqında fikir bildirdi: “Prezident çıxışında son 17 il ərzində ölkədə 750-dən çox xəstəxananın yenidən tikilərək istifadəyə verildiyini bildirdi. Həmçinin, ölkə başçısı bu günə kimi səhiyyə sahəsində görülən işlərə müsbət qiymət verdi. Eyni zamanda, koronavirusla mübarizədə ölkənin tibb sektorunun dayanıqlığına da toxundu. Bununla yanaşı, cənab Prezident icbari tibbi sığortaya keçməklə əlaqədar qarşıda duran məsələlərə də toxundu”.
Millət vəkili onu da vurğuladı ki, səhiyyə sahəsində də, digər sektorlarda olduğu kimi, daim yenilənmə, inkişaf olmalıdır, həmçinin, idarəetmənin təkmilləşdirilməsi də vacib məsələdir: “Ölkə başçısı səhiyyə sistemində təkmilləşməyə ehtiyac var deyərkən bunu nəzərdə tutmuşdu. Şübhəsiz ki, Azərbaycan səhiyyə sisteminin maddi-texniki bazası kifayət qədər güclüdür. Yetərincə kadr potensialımız da var. Ancaq biz bunları gələcək üçün daha da təkmilləşdirməliyik. Dünyanın ən müasir tibb texnologiyalarını almalıyıq ki, daha yaxşı tibbi xidmət göstərilə bilsin. Nəzərə almaq lazımdır ki, tibb texnologiyası sürətlə inkişaf edir və eyni templə də köhnəlir. Məsələn, 5 il bundan əvvəl ən müasir saydığımız müalicəvi tibb cihazı artıq köhnəlmiş sayılır. Çünki bu illər ərzində yeni texnologiyalar üzə çıxır. Eyni zamanda, müalicə və müayinə üsulu da sürətlə dəyişir. Bu mənada tibbi kadrlarımız da ən yüksək səviyyədə öz bilik və təcrübələrini təkmilləşdirməlidirlər. Tibb işçilərimiz Amerika, Almaniya və İngiltərənin səhiyyə potensialından istifadə etməlidirlər. Onların təcrübələrindən yararlanmaq lazımdır. Bir sözlə, müasirliyə açıq olmalıyıq. Gənc kadrları xarici ölkələrə təcrübə üçün göndərməliyik”.
Millət vəkilinin sözlərinə görə, Prezidentin əsas məqsədi ondan ibarətdir ki, insanlara daha yüksək keyfiyyətdə xidmət göstərilsin, insanların sağlamlığı qorunsun. Hazırda vacib olan əsas məsələ insan kapitalıdır. İnsan kapitalının qiymətli və keyfiyyətli olmasının birinci şərti onun sağlamlığının qorunmasıdır: “Nəzərə almaq lazımdır ki, icbari tibbi sığortaya keçəndən sonra vətəndaşlarımızın tibbi xidmətlərə əlçatanlığı yüksələcək. Bununla da vətəndaşlarımızın sosial cəhətdən müdafiəsi təmin olunacaq”.
Günel CƏLİLOVA
