Xəbər verildiyi kimi, yanvarın 31-də Tarif (qiymət) Şurasının növbəti iclası keçirilib. İclasda aidiyyəti qurumların müraciətlərinə baxılıb və müvafiq qərarlar qəbul edilib.
Belə ki, “Azərsu” ASC-nin müraciəti müzakirə olunub və bir kubmetr su təchizatının tarifi ƏDV daxil olmaqla əhali üzrə Bakı, Sumqayıt, Xırdalan şəhərləri və Abşeron rayonu üçün 70 qəpik, digər inzibati ərazi vahidləri üzrə 60 qəpik, tullantı sularının axıdılması xidmətinin tarifi isə ölkə üzrə bir kubmetr üçün 30 qəpik səviyyəsində təsdiqlənib.
Ancaq onu da nəzərə almaq lazımdır ki, Azərbaycanda tənzimləmədən sonra da tariflər bir sıra MDB və digər ölkələrdə olduğundan aşağıdır. Müqayisə üçün qeyd edək ki, əhali üzrə su təchizatı və tullantı sularının axıdılması xidmətinin birlikdə tarifi Moskvada (Rusiya) 1,70 manat/kubmetr, Kiyevdə (Ukrayna) 1,42 manat/kubmetr, Minskdə (Belarus) 1,17 manat/kubmetr, Ankarada (Türkiyə) isə 1,28 manat/kubmetr təşkil edir.
Onu da qeyd edək ki, ölkəmizdə suyun qiyməti ilə bağlı sonuncu dəfə tarif tənzimlənməsi 2016-cı ildə aparılıb.
Göründüyü kimi, artımdan sonra da bir sıra ölkələrlə müqayisədə Azərbaycanda suyun qiyməti aşağıdır. O üzdən, mövcud fərq nəzərə alınmalıdır.
“O baxımdan, düşünmürəm ki, suyun qiymətinin artması əhalinin gəlirlərinə ciddi təsir etsin”
Sözügedən məsələ ilə bağlı fikirlərini “Bakı-Xəbər”lə bölüşən ekspert Rəsul Cahangirlinin sözlərinə görə, müəyyən mənada qiymət artımı labüd idi: “Məsələ ondadır ki, hardasa 5 il əvvəl suyun qiyməti artırılıb. Ötən müddət ərzində bir sıra məhsulların qiyməti qalxıb. Bununla yanaşı, təchizat xərcləri də artıb. Çünki Bakı və Abşeron yarımadasının su təchizatı bir sıra kəmərlərlə həyata keçirilir. Su mənbələri elə də yaxın deyil. Məsələn, Oğuz-Qəbələ-Bakı su kəmərinin uzunluğu 262 kilometrdir. Oradan suyu Bakıya çatdırmaq üçün bir neçə nasos qurğulardan istifadə edilir. Bu zaman elektrik enerjisinə tələbat artır. Üstəlik, ötən 5 il ərzində həm abonentlərin sayı, həm də istehlak həcmi artıb. Bütün bunların hamısı xərcdir. Nə vaxta qədər dövlət büdcəsindən “Azərsu” ASC-yə vəsait ayrılacaq? Bir məqamı nəzərə almaq lazımdır ki, Azərbaycanın su ehtiyatları qonşu ölkələrlə müqayisədə aşağıdır. Üstəlik, bizim ölkəmizdə axan böyük çayların mənbəyi Azərbaycandan kənarda formalaşır. Bütün bunlara baxmayaraq, bir sıra yaxın ölkələrlə müqayisədə Azərbaycanda suyun qiyməti aşağıdır. Həmçinin, qonşu ölkələrlə müqayisədə Azərbaycanda adambaşına düşən milli gəlirin həcmi yüksəkdir. O baxımdan, düşünmürəm ki, suyun qiymətinin artması əhalinin gəlirlərinə ciddi təsir etsin. Məsələn, əvvəl 4 nəfərlik ailə ayda orta hesabla 3 manat suya vəsait xərcləyirdisə, bu olacaq 6 manat. Hesab edirəm ki, bu, qonşu ölkələrlə müqayisədə elə də böyük deyil”.
Bütün bunlardan çıxış edən ekspert onu da qeyd etdi ki, son qiymət artımı israfçılığın qarşısını alacaq.
Vidadi ORDAHALLI
