Məlum olduğu kimi, yanvarın 31-i Tarif Şurasının növbəti iclası keçirilib. İclasda aiddiyəti qurumların müraciətlərinə baxılıb və müvafiq qərarlar qəbul edilib. “Azərsu” ASC tərəfindən Tarif Şurasına müraciət edilərək bildirilib ki, son illər ölkədə həyata keçirilən işlər nəticəsində “Azərsu” ASC tərəfindən su təchizatının coğrafi miqyası, həmçinin, fasiləsiz su təchizatının əhatə dairəsi genişlənib.
Bunun nəticəsində elektrik enerjisi xərcləri və digər xərclər artıb. Bütün bunlar nəticəsində isə artıq mövcud tariflə əldə olunan gəlir xərcləri qarşılamır və bununla bağlı dövlət büdcəsindən subsidiya ayrılır. Səhmdar cəmiyyət bildirib ki, xidmətin davamlılığının təmin edilməsi, keyfiyyətinin yüksəldilməsi, eyni zamanda, dövlət büdcəsindən asılılığın aradan qaldırılması üçün tariflərin artırılması zəruridir.
Məsələ Tarif Şurasının iclasında müzakirə olunub, əhali üzrə tariflər Bakı, Sumqayıt, Xırdalan şəhəri və Abşeron rayunu üzrə 70 qəpik, ölkənin digər regionları üzrə isə 60 qəpik səviyyəsində təsdiq edilib.
Ekspetlər hesab edirlər ki, suyun qiymətinin tənzimlənməsi su israfçılığının qarşısını alacaq. Məlumdur ki, son zamanlar su israfçılığı yaşanırdı. Hətta bununla bağlı alimlər də dəfələrlə çağırış ediblər ki, su israfçılığı qlobal problemə səbəb olacaq.
“Su Allahın suyudur”, - deyib keçməyək, suya qənaət olunmalı, israfçılığa yol verilməməlidir”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, Tarif Şurasının qərarına əsasən, suyun qiyməti tənzimlənib: “Mən dəfələrlə yerli və xarici alimlərin suyun qənaətlə istifadə edilməsi ilə bağlı çağırışlarını müşahidə etmişəm. Məlumdur ki, ölkənin 35-40 faiz əhalisinin məskunlaşdığı Abşeron yarımadasında şirin su mənbəyi yoxdur. Hər bir insanın su, sanitariya hüququ var və bu, BMT-nin davamlı inkişaf məqsədlərindən biridir, eynilə təmin olunmalıdır. Biz insanlarımıza çağırış edirik. “Su Allahın suyudur”, - deyib keçməyək. Suya qənaət olunmalı, israfçılığa yol verilməməlidir. Danılmaz faktdır ki, adicə qab yumaq üçün belə çoxlu su axıdırlar. Birincisi, israfçılığa son qoymaq lazımdır. Hər bir ailəyə də demək olmur ki, sudan az istifadə edin. Deyirlər ki, su mənimdir, özüm bilərəm. Başa düşmürlər ki, istifadə etdikləri suyun mənbəyi eyni yerdir. Ümumiyyətlə, qənaət hər bir insanın canında olmalıdır”.
Həmsöhbətimiz hesab edir ki, istər əkin sahələrinin suvarılmasında, istərsə də məişətdə sudan son dərəcə qənaətlə istifadə edilməli, israfçılığa yol verilməməlidir. “Elə etmək lazımdır ki, gələcək nəsillər də heç olmasa bizim qədər sudan istifadə etmək imkanına malik olsunlar”.
Birlik sədrinin sözlərinə görə, suyun qiymətinin tənzimlənməsi su israfçılığının qarşısını alacaq.
Günel CƏLİLOVA
