Məlum olduğu kimi, yanvarın 31-də Tarif (qiymət) Şurasının növbəti iclası keçirilib. İclasda aidiyyəti qurumların müraciətlərinə baxılıb və müvafiq qərarlar qəbul edilib. “Azərsu” ASC Tarif Şurasına müraciətində qeyd edib ki, xidmətin davamlılığının təmin edilməsi, keyfiyyətin yüksəldilməsi, eyni zamanda, dövlət büdcəsindən asılılığın aradan qaldırılması üçün tariflərin artırılması zəruridir.
İclasda “Azərsu” ASC-nin müraciəti müzakirə olunub və fevralın 1-dən bir kubmetr su təchizatının tarifi ƏDV daxil olmaqla əhali üzrə Bakı, Sumqayıt, Xırdalan şəhərləri və Abşeron rayonu üçün 70 qəpik, digər inzibati ərazi vahidləri üzrə 60 qəpik, tullantı sularının axıdılması xidmətinin tarifi isə ölkə üzrə bir kubmetr üçün 30 qəpik səviyyəsində təsdiq olunub.
Su təchizatı və tullantı sularının axıdılması xidmətlərinin tariflərinə yenidən baxılmasına səbəb kimi son illər su təchizatının əhatə dairəsinin genişləndirilməsi, əhalinin fasiləsiz və keyfiyyətli su təchizatı üçün yeni infrastrukturların istismara verilməsi ilə əlaqədar elektrik enerjisi, mal-material, nəqliyyat və təmir xərclərinin artması, həmçinin, Səhmdar Cəmiyyət üzrə işçilərin sayının və əməkhaqların yüksəlməsi nəticəsində mövcud tariflərlə gəlirlərin fəaliyyət üzrə xərcləri qarşılamaması göstərilib. Bu sahədə mövcud olan problemlərin aradan qaldırılması, xidmətlərin keyfiyyətinin yaxşılaşdırılması, istehlakçıların keyfiyyətli və fasiləsiz içməli su ilə təmin olunması, su təchizatı və kanalizasiya sistemlərinin yenidən qurulması məqsədilə dövlət büdcəsindən hər il olaraq investisiya şəklində maliyyə vəsaiti ayrılır. Tarif tənzimlənməsində tariflərin mümkün olan aşağı səviyyədə saxlanması, əhalinin optimal qiymətlərlə su ilə təmin edilməsi və s. kimi amillər nəzərə alınıb. Son tarif tənzimlənməsi 2016-cı il mayın 13-də aparılıb. Ötən müddət ərzində abonentlərin sayı 200 mindən çox artıb.
Bütün bunların fonunda, artımın zəruriliyini əsaslandırmaq üçün“Azərsu” ASC-nin gətirdiyi arqumentlər əsaslı sayıla bilərmi?
“Hesab edirəm ki, qiymətin artması sudan qənaətlə istifadə edilməsinə təkan verəcək”
Məsələyə münasibət bildirən iqtisadçı-alim Əli Əlirzayevin sözlərinə görə, su təchizatı ilə bağlı xərclərin artması belə bir addımın atılmasına zərurət yaradıb: “Ancaq tək bu amildən çıxış edib qiymətləri iki dəfə artırmaq o qədər də uğurlu yanaşma deyil. Məsələ ondadır ki, suyun, işığın və qazın qiymətinə çox həssas yanaşmaq lazımdır. Xərclərin artması başadüşüləndir, amma əhalinin sosial vəziyyəti də nəzərə alınmalıdır. Bununla belə, qiymət artımından başqa digər məsələləri də nəzərdən keçirmək lazımdır. Yəni xərcləri azaltmaq üçün başqa vasitələri də işə salmaq vacibdir. Çıxış yolunu yalnız qiymət artımı hesabına tapmaq doğru deyil. Çünki sudan əhalinin bütün təbəqələri istifadə edir. Hesab edirəm ki, qiymətin artması sudan qənaətlə istifadə edilməsinə təkan verəcək. Su istehlakında israfçılığın qarşısını alacaq. Çünki su istehlakında müəyyən israfçılıq halları da var. Xüsusən də bağ evlərində necə gəldi su istehlak olunurdu. Adam var ki, tonlarla su istehlak edir, amma bunun müqabilində çox az pul ödəyir. Bax, belə hallar da az deyil. O baxımdan bu sahəyə nəzarət də artırılmalıdır. Yəni inzibati metodları da işə salmaq lazımdır. Bütün bunlarla yanaşı, əhalinin aztəminatlı hissəsinin gəlirləri artmalıdır. Onlara verilən pensiya və müavinətlər artırılmalıdır”.
İqtisadçı-alim onu da qeyd etdi ki, belə məsələlərdə qərar veriləndə kompleks yanaşma olmalıdır.
Vidadi ORDAHALLI
