Xaricdə təhsil alan tələbələr hər zaman Azərbaycan dövlətinin diqqətində olublar. Pandemiya dövründə də xaricdə təhsil alan tələbələr dövlətin qayğısını həmişə hiss ediblər. Belə ki, pandemiya dövründə 20 ölkədə 600-dən çox tələbəyə birdəfəlik müavinət ödənilib.
COVID-19 pandemiyası ilə əlaqədar İran, Türkiyə, Rusiya, Gürcüstan, Qazaxıstan, Ukrayna, Belarus, ABŞ və digər ölkələrdən Vətənə qayıtmaq arzusunda olan 15000-dən çox Azərbaycan Respublikası vətəndaşının təxliyəsi həyata keçirilib.
Bu barədə Xarici İşlər Nazirliyindən məlumat verilib.
Məlumatda bildirlir ki, cari ildə Xarici İşlər Nazirliyinin tərkibində fəaliyyət göstərən Azərbaycan Respublikasının Beynəlxalq İnkişafa Yardım Agentliyinin (AİDA) vasitəsilə bir sıra ölkələrdə təxliyə üçün müraciət edənlərin sırasında ciddi maddi sıxıntı ilə üzləşən azərbaycanlı tələbələrə maliyyə dəstəyi göstərilib, həmçinin, 20 ölkədə yaşayan 600 nəfərdən çox son dərəcə çətin vəziyyətdə olan tələbənin hər birinə birdəfəlik maliyyə müavinəti təqdim edilib.
“...dövlətimizin növbəti qayğı siyasətinin təzahürüdür”
“Vəfa” Sosial-İctimai Birliyinin sədri Fatimə Hacıbəyli bizimlə söhbətində qeyd etdi ki, bu addım Azərbaycan dövlətinin xaricdə təhsil alan gənclərimizə qayğısının bariz nümunəsidir: “Azərbaycan dövləti pandemiya dövründə bütün vətəndaşlarının yanında olduğunu ortaya qoyub. Bu gün təkcə Azərbaycanda yaşayan insanlar deyil, xarici ölkələrdə yaşayan, təhsil alan vətəndaşlarımız da, birmənalı olaraq, dövlətin qayğı və diqqəti ilə əhatə olunublar. Hələ pandemiyanın ilk günlərindən başlayaraq saysız Azərbaycan vətəndaşı dövlətimizin maliyyə vəsaiti hesabına ölkəmizə təxliyə olundu, burada hər cür qayğı ilə əhatə olunan vətəndaşlarımız sırasında kifayət qədər xaricdə təhsil alan gənclərimiz də vardı. Pandemiya şəraitində Azərbaycan dövlətinin xaricdə təhsil alan tələbələri unutmaması, 20 ölkədə təhsil alan tələbələrimizə maliyyə yardımı göstərməsi, onlara dəstək olması çox müsbət bir hadisədir. Təsəvvür edin ki, pandemiya bütün dünyaya böyük təsir göstərib, iqtisadiyyatlar, bizneslər çöküb, dövlətlər nəinki xaricdə təhsil alan tələbələrin qayğısına qalmır, hətta ölkə daxilində olan vətəndaşların da sosial qayğılarını təmin edə bilmirlər. Belə bir vəziyyətdə Azərbaycan dövləti, şəxsən cənab Prezidentin göstərişi ilə aztəminatlı ailələrə, pandemiyadan ziyan çəkmiş insanlara, bir sözlə, bütün vətəndaşlara qayğı göstərilir. Bu onu göstərir ki, Azərbaycan dövləti üçün vətəndaş amili, onun rifahı, sağlamlığı, yaşayış səviyyəsinin yüksəlməsi hər şeydən əsasdır” - deyə bildirən ekspertin sözlərinə görə, dövlətin qayğısı nəticəsində həmin gənclər bu gün özlərini hərtərəfli şəkildə əmin və güclü hiss edirlər.
F.Hacıbəyli vurğuladı ki, xaricdə təhsil alan gənclərimiz Azərbaycan dövlətinin qayğı və diqqətindən güc alaraq gələcəkdə Vətənə, xalqa layiq mütəxəssislər, şəxsiyyətlər kimi ölkəmizə fayda verəcəklər. “Pandemiya dövründə 600 tələbəyə birdəfəlik müavinət verilməsi xarici ölkələrdə təhsil alan gənclərimizə sosial-mənəvi, psixoloji baxımdan da mühüm dəstək verir. Onlar dövlətin qayğısını öz üzərlərində hiss edirlər. Bu gənclərin təhsil aldığı ali məktəblərdə başqa dövlətlərdən olan tələbələr var. Onlar Azərbaycan dövlətinin qayğı siyasətinin şahidi olurlar. Uzağa getməyək, pandemiyanın ilk dövrlərində xarici ölkələrdə təhsil alan tələbələrimiz ölkəmizə təxiyə edilən zaman onların başqa ölkələrdən olan tələbə yoldaşları deyirdilər ki, sizin necə gözəl, qayğıkeş, humanist dövlətiniz var, sizi bu ağır şəraitdə öz maliyyəsi hesabına evinizə aparır, amma bizim taleyimiz dövlətlərimizi maraqlandırmır. Azərbaycan dövləti hər bir Azərbaycan vətəndaşının yanında olduğunu dəfələrlə sübut edib, 600 nəfər xaricdə təhsil alan azərbaycanlı tələbəyə birdəfəlik müavinətlərin ödənilməsi də dövlətimizin növbəti qayğı siyasətinin təzahürüdür” - deyə F.Hacıbəyli vurğuladı.
İradə SARIYEVA
