Azərbaycan Respublikası Mərkəzi Bankı və Azərbaycan Sığortaçılar Assosiasiyasının birgə nəzarəti ilə Vətən müharibəsində şəhid olmuş və ya aldığı xəsarət nəticəsində müvafiq əlillik dərəcəsi almış hərbi qulluqçuların ipoteka kreditlərinin sığorta vasitəsilə ödənilməsi prosesi operativ şəkildə davam edir.
Belə ki, Azərbaycan Sığortaçılar Assosiasiyası 2020-ci ilin 27 sentyabr tarixində başlayıb 44 gün davam edən və rəşadətli ordumuzun qələbəsi ilə nəticələnən Vətən müharibəsində iştirak edərək şəhid olan və ya müvafiq əlillik dərəcəsi almış hərbçilərimizə Azərbaycan Respublikasının İpoteka və Kredit Zəmanət Fondunun xətti ilə verilmiş ipoteka kreditləri həyat sığortası üzrə fəaliyyət göstərən sığorta şirkətləri tərəfindən ödənilir.
Məlumat üçün qeyd edək ki, bu günə qədər 3 milyon 235 min 757 manat həcmində ipoteka kreditləri həyat sığortası sahəsində fəaliyyət göstərən sığorta şirkətləri tərəfindən tam ödənilib.
Həmçinin, şəhidlərimizin vərəsələrinə, xəsarət almış hərbçilərimizə və əlillik dərəcəsi müəyyən edilmiş qazilərimizə hərbi qulluqçuların dövlət icbari şəxsi sığortası çərçivəsində sığorta ödənişinin verilməsi Mərkəzi Bankın nəzarəti ilə Azərbaycan Respublikası Dövlət Sığorta Kommersiya Şirkəti tərəfindən operativ qaydada həyata keçirilməkdədir. Şirkətin yaydığı məlumatda o da qeyd olunur ki, bu günədək 1053 şəhidimizin vərəsələrinə və hərbi əməliyyatlar zamanı xəsarət alan 4119 nəfər hərbçimizə sığorta ödənişi verilib. Həyata keçirilmiş sığorta ödənişlərinin ümumi məbləği 18 milyon 109 min 850 manat təşkil edir.
“Ölkəmizdə hərbi qulluqçuların və şəhid ailələrinin sosial müdafiəsi, onların rifahının yaxşılaşdırılması daim dövlət siyasətinin əsas tərkib hissəsidir”
Şəhid vərəsələrinə və yaralı hərbçilərə sığorta ödənişinin edilməsinin əhəmiyyəti haqqında danışan millət vəkili Naqif Həmzəyev bildirdi ki, Vətən yolunda özlərinə əbədiyyət heykəli ucaldan şəhidlərimiz xalqımızın qəhrəmanlıq tarixində daim yaşayır və xatırlanır: “Biz onların qəhrəmanlığı, şəhidliyi ilə fəxr edirik. Bu, bizim millətimizin iftixarıdır. Vətən və xalq naminə şəhid olan Vətən övladlarının ailələrinin sosial müdafiəsinin gücləndirilməsi, onların problemlərinin vaxtında həllinə nail olunması, hər cür qayğı ilə əhatə olunması ölkə Prezidenti İlham Əliyevin rəhbərliyilə həyata keçirilən siyasətin əsas istiqamətlərindəndir. Dövlət başçımız tərəfindən bu istiqamətdə mütəmadi imzalanan fərman və sərəncamlar çoxsaylı ailəyə böyük sevinc bəxş etməklə yanaşı, bu sahəyə göstərilən diqqətin bariz nümunəsi kimi ictimaiyyət tərəfindən hər zaman təqdirəlayiq hal kimi qiymətləndirilib. Şəhid ailələrinin sosial ehtiyaclarının dövlət tərəfindən ödənilməsi, həmçinin, Vətən uğrunda öz canından keçmiş şəhidlərin və Qarabağ müharibəsi əlillərinin övladlarının təhsil haqqından azad edilməsi, eyni zamanda, bu insanların mənzil və avtomobillərlə təmin olunması davamlı xarakter daşıyıb”.
N.Həmzəyevin sözlərinə görə, ölkəmizdə hərbi qulluqçuların və şəhid ailələrinin sosial müdafiəsi, onların rifahının yaxşılaşdırılması daim dövlət siyasətinin əsas tərkib hissəsidir: “Azərbaycan Prezidenti İlham Əliyevin rəhbərliyilə həyata keçirilən sosial siyasət sayəsində şəhid ailələri, Qarabağ müharibəsi əlilləri, veteranlar hərtərəfli dövlət qayğısı ilə əhatə olunurlar”.
Günel CƏLİLOVA
