Vətən Savaşında milli həmrəyliyimiz, xalq-dövlət birliyi daha da, möhkəmləndi, yüzlərlə halal süd əmən, yüksək ailə tərbiyəsi görən şəhid və qazilərin qanı hesabına şanlı Ordumuz azğın düşmən üzərində bu Vətən müharibəsində tarixi zəfər qələbəsi əldə etdi. Rəşadətli əsgər və zabitlərimizin şücaəti, döyüş əməliyyatlarının yüksək peşəkarlıqla hazırlanması və həyata keçirilməsi sayəsində bu qələbə ilə bütün dünyaya səs saldıq.
Söz yox ki, Vətən və millət yolunda canından keçənlərin fəth etdiyi ən yüksək, şərəfli zirvədir şəhidlik. Amma bu ali mərtəbəyə çatmaq hamıya nəsib olmur. Vətən müharibəsinin şəhidləri sil-silə qəhrəmanlıqlar göstərərək, odun-alovun içində, mərmi, top “yağışı” altında yeni qəhrəmanlıq dastanları yaratdılar. Vətən səmasının əbədi-parlaq günəşinə çevrildilər, heç vaxt batmayan, şövq saçan dan ulduzları oldular bir-birindən gözəl, qüssəli, cəsarətli, halallıqla böyüyən şəhid cəngavərlərimiz...
...Vətən göylərində əbədi parlaq günəşə çevrilən, ürəklərdə daima çağlayan bulağa bənzər, dan ulduzu kimi bərq vuran qəhrəman el oğlumuz şəhid Elvin Mahmud oğlu Məmmədovdur. Şəhadətə qovuşan Azərbaycanımızın hər bir vətəndaşından, illərlə işğal altında qalan torpaqlarımızın azadlığı uğrunda ana məhəbbətindən, qardaşlarının, dostlarının, əzizlərinin istəyindən keçən, hətta 11 illik ülvü sevgini qurban verən zaqatalalı Elvin el oğlumuzdan söhbət açırıq.
Belə insanlar dünyaya nadir hallarda gəlirlər... və həyatda-tarixdə silinməz iz qoyub gedirlər... minlərlə insanın ürəklərinə yol tapırlar, ancaq müsbət keyfiyyətləri ilə...
...Bu Vətən Savaşında ölməzliyə qovuşan Elvin Məmmədov cəmi 28 il ömür sürdü, amma çox mənalı ömür sürdü, gəncliyə örnək olası ömür... Hətta uşaqlıqdan, məktəb illərindən çox çətinliklərlə üzləşib. O heç vaxt istəməyib ki, valideynlərinə, qardaşlarına, qohum-əqrəbaya, dostlarına əziyyət versin... Nə qədər çətin olsa da, öz zəhməti ilə nəyəsə nail olurdu Elvin...
O, 1992-ci il oktyabr ayının 3 –də Zaqatala şəhərində sadə, zəhmətsevər bir ailədə dünyaya göz açmışdı. Məmmədovlar ailəsinin son beşiyi, yəni 3 qardaşın sonuncusu idi Elvin. Buna görə də uçaqlıqdan hamı Elvinin xətrini çox istəyirdi. Ailəsində olarkən məlum oldu ki, anası Tahirə xanım uzun illərdir ki, Zaqatala Rayon Mərkəzi Xəstəxanasında çalışır və kollektivdə böyük hörməti var. Atası Mahmud isə 2019-cu ilin dekabr ayının 15-də ağır xəstəlikdən dünyasını dəyişib. Mərhum zəhmətkeş insan və təcrübəli maşın ustası olub.
Elvin Zaqatala şəhər, Şıxəli Qurbanov adına 3 saylı tam orta məktəbini əla qiymətlərlə bitirib. Uşaqlıqdan arzusu ali təhsilli bank işçisi olmaq idi Elvinin. Böyük qardqaşı ali təhsilli hüquqşünasdır və 2 övlad atasıdır. Nizami Məmmədov söhbət zamanı bildirdi ki, şəhid qardaşı, son beşik olmasına baxmayaraq, ərkəsöyün olmayıb, tərbiyəli, ağıllı, dərrakəli, səliqəli və xoş rəftar idi. Həmişə dərslərinə ciddi hazırlaşar, valideynlərinin, qardaşlarının sözündən çıxmaz, ev işlərində kömək edərdi, səliqəli geyinər və dərs məşğələlərinə gecikməzdi Elvin. Qardaşı söyləyir ki, “təhsil aldığı 3 saylı tam orta məktəbin müəllimləri onun dərsə davamiyyətindən, dərs məşğələlərindən, tədbirlərdə fəal iştirak etməsindən, davranışından həmişə razılıqla danışardılar. Məktəbdə onun çoxlu dostları vardı, xoş, mülayim xasiyyətili, sözübütöv olduğuna görə oğlanlar da, qızlar da Elvinin xətrini çox istəyirdilər. Texniki fənlərə daha çox meylli olsa da, vətənpərvərlik tarixi, hərbi mövzulardan, məktəbdə keçirilən diskussiyalardan, tədbirlərdən və yarışlardan, müsabiqələrdən kənarda qalmazdı Elvin” – deyir, şəhidin böyük qardaşı Nizami.
Öyrəndik ki, Elvin Məmmədov hələ məktəb illərində ölkəmizin hərb tarixi, sərhədlərimiz, Milli qəhrəmanlarımız, Qarabağ məsələsinin necə yaranması, torpaqlarımızın necə işğal olunması ilə bağlı bilgilər toplayırmış. Tez-tez dostları ilə Zaqatalanın tarixi yerləri və tarixi faktlarla maraqlanarmış. Rus imperiyasının işğalçılıq siyasəti nəticəsində erməni daşnaklarının bütöv Azərbaycanın ərazisində yerləşdirməsini, hiyləgər düşmənin məkrli siyasəti ilə torpaqlarımızı havadarlarının köməyilə necə zəbt etdiyini daima öyrənirdi. Çünki, o, dünyaya gələndə artıq düşmənlərimiz bizə qarşı çirkin niyyətlərini həyata keçirirdi...
Əlbəttə ki, onun uşaq yaddaşı, eşitdikləri, gördükləri bunları götür-qoy edirdi. Dərin düşüncəyə malik olan qəhrəman el oğlumuz bütün bunlara biganə yanaşa bilməzdi. Sözün düzü, əslində analar öz oğullarını – övladlarını daha yaxşı, daha yaxından tanıyırlar. Axı övlad üçün ən çox əziyyət çəkən, onların dərdlərinə şərik olanlar valideynlərdir.
“...Ana üçün bütün övladlar əzizdir, baldan şirindir. Şükürlər olsun ki, üç oğlumun üçü də çox ağıllı, kamallı, hər bir vəziyyəti dərhal anlayandır, zəhmətsevər, halallıqla böyüyəndirlər, zəhmətkeş və vətənpərvərdirlər. Elvinimin ailəmizdə öz yeri var idi. Arzusuna, niyyətinə çatmaq üçün əziyyətlərə qatlanardı, biz valideynlərə əziyyət verməzdi. Dostnan-dost kimi, qardaşnan-qardaş kimi, böyüknən-böyük kimi, kiçiknən kiçik kimi davranardı Elvin balam” – deyə, Tahirə xanım söhbətimizə qoşuldu...
Tahirə xanım onu da qeyd etdi ki, “mənim balam bir yox, iki müharibənin iştirakçısıdır. Duyğulu idi, arzuları çox idi Elvinimin. Atası ailəni dolandırmaq üçün Rusiya Federasiyasına gedəndə çox narahatlıq keçirmişdi Elvin. Demişdi ki, “əzizim ata, niyə qərib ölkəyə gedirsən, biz ölməmişik ki, işləyəcəyik, qazanc əldə edəcəyik. Mən də, qardaşlarım da artıq böyümüşük, sən uzaqlara getmə”. Ali təhsil almaq, bir işin qulpundan yapışmaq, ailəyə qazanc gətirmək və ailə qurmaq onun ən böyük arzusu idi. Milli Ordu sıralarına, həqiqi hərbi xidmətə həvəslə, ürəklə, çəkinmədən getmişdi. Ona hərbi mundir də yaraşardı. Goranboy-Tərtər kimi cəbhənin ən qaynar ön hissələrində xidmət edirdi. Hərbi sirləri, döyüş texnikasını peşəkarlıqla öyrənmişdi. 2016 –cı ilin 18 aprel döyüşlərində iştirak etmiş, bir hərbçi kimi əsl şücaət göstərmiş və özünü doğrultmuşdu. Elvin sanki bu döyüşlərdə bir sınaq məktəbini keçmişdi və Vətən müharibəsində iştirak etməyə təminat yaratmışdı. Aprel döyüşlərində o, düşmənin xeyli canlı qüvvəsini və texnikasını məhf etmişdi. Xidmət etdiyi N saylı hərbi hissənin komandiri polkovnik-leytenant Əflatun Nurəliyev döyüş və ictimai-siyasi hazırlıqdqa əldə etdiyi nailiyyətə görə Elvini Fəxri Fərmanla təltif etmiş, bizin adımıza onun imzası və möhürü ilə təsdiqlənən Təşəkkür məktubu göndərmişdi. Bəli, cəsur Elvin balamız əlaçı əsgər kimi Vətənimizə xidmət etmişdi...
Amma o çox yaxşı başa düşürdü ki, başlar tam əzilməmiş, mənfur düşmən nə vaxtsa yenə də məkrli niyyətini həyata keçirəcək... O həmişə bunlardan narahat idi. Mən nə biləydim ki, müharibə başlayacaq, oğlum Elvin azğın düşmənlə döyüşəcək və... ana ürəyinə sağalmaz dağ çəkəcək... 2019-cu ilin dekabr ayının 19-da həyat yoldaşımı itirdik, 2020-ci ilin oktybar ayının 15-i isə kişi qeyrətli, kişi namusli, nəslimizin fəxri olan son beşiyimizi Vətən yolunda fəda verdik... Ömürlərinin şirin çağlarında öz körpə balalarını doyunca əzizləməyən oğullar itirən analar necə təsəlli tapsınlar, qiymətsiz oğulların yoxluğuna necə alışsınlar...”
...Bu qürurlu anaya min-min alqış deyirəm, onun qarşısında bir igid, vətənpərvər, mərd və Vətənimiz uğrunda həlak olan şəhid Elvin Məmmədovun anası kimi dəfələrlə baş əyirəm...
Şəhid – igidimizin qardaşları Nizami və İlqar söyləyirlər ki, Elvin hələ ermənilərin Tovuz rayonundakı təxribatından sonra demişdi ki, müharibə başlasa könüllü cəbhəyə gedəcək. Sentyabr ayının 21-də Elvin Məmmədov təlimlərdə iştirak etmək üçün hərbiyə çağırıldı. Qardaşları onda anladılar ki, müharibə qaçılmazdır. Onlar Elvini saxlatdırıb, özləri könüllü hərbi təlimlərə qatılmaq istəyiblər. Lakin o buna razılıq verməyib.
Yuxarıda qeyd etdiyim kimi, bu müharibədə təcrübəli, qorxmaz və cəsur döyüşçü olmuş Elvin Məmmədov 11 illik ülvü, möhkəm məhəbbətini və sevgisini də Vətən yolunda, bütövlüyümüz, azadlığımız uğrunda əbədiyyətə yazdı. Əsl namuslu-qeyrətli oğul kimi qəhrəmanlıq dastanı ilə yanaşı unudulmaz sevgi dastanını yaratdı – sevən gənclərə nümunə olacaq... Bu gün isə ondan əmanət yalnız ürəkdən sevdiyi həyat yoldaşı Xəyalə xanım və bir də ki, hələ 10 aylıq olan, şəhidimizin doyunca əzizləmədiyi, yetərincə gəzdirmədiyi şirin-şəkər qızı Ahunurdur. Hələ də Elvinin yoxluğuna inanmayan Vətən fədaisinin həyat yoldaşı ilə görüşüb söhbət etmək mənim üçün çox çətin idi... Çünki gənc yaşlarında az müddət bir yerdə yaşadığı ailə başçısını itirən qadının hansı hisslər keçirdiyi məlum idi. Onu qarşıda enişli, yoxuşlu yollar gözləyirdi... körpə qızının məsuliyyəti, qayğıları və s... Xəyalənin dedikləri: “Bəlkə də səhv edərəm, müasir dövrdə Elvin kimi həyatın hər bir incəliklərini dərk edən, mətin iradəli, müsbət keyfiyyətlərə malik, qarşılıqlı hörmət saxlayan, niyyətinə ancaq halallıqla, zəhməti ilə nail olan şəxslər nadir hallarda olur. Çünki mən onu 2009-cu ildən tanıyırdım. Öncə etibarlı, sözübütöv insan olduğunu bilirdim. Biz bir-birimizə çox bağlı idik. Axı, on bir illik sevgi və məhəbbətimiz bizi hər bir sınaqdan çıxarmışdı. Elvin Gürcüstan Respublikasında İqtisad Universitetinin maliyyə-kredit fakültəsini bitirmişdi. Amma doğma Vətənində iş tapmamışdı, Ordu sıralarında ləyaqətlə xidmət etmişdi. Ağır Aprel 2016-cı il döyüşlərində mərdliklə iştirak etmişdi. Mən onun cəsurluğu ilə qürur duyurdum. Həmin döyüşlərdə hərbi peşəkarlığını artırmışdı. Hərbi xidməti başa vurduqdan sonra Elvin yenə də ixtisası üzrə iş axtarıb, lakin iş tapa bilmədiyindən Türkiyə Respublikasına işləməyə gedib. O həmişə deyirdi ki, bir iş tapmamış ailə həyatı qurmayacaq. Çoxlu çətinliklərdən sonra, nəhayət dərman şirkətlərinin birinə imtahanı uğurla verdikdən sonra işə qəbul olundu. O, böyük arzularla yaşayırdı. Ən böyük arzusu isə ailə qurub, yaxşı ev şəraiti yaratmaq və xoşbəxt yaşamaq idi... 2019-cu ilin mart ayının 20-də biz ailə həyatı qurduq. Yaşadıqları evdə darısqallıq olduğuna görə biz kirayədə yaşamalı olduq. Buna baxmayaraq, Elvinlə çox mehriban yaşayırdıq. Bir tikəmizi ortadan bölürdük. Övladımız, qızımız Ahunur dünyaya gələndə Elvinin sevincinin həddi-hüdudu yox idi... O həmişə nikbin olsa da narahat görünürdü... Övladını mənimlə bərabər dünyalar qədər istəyirdi... Nəhayət...
21 sentyabr 2020-ci il gəldi. Elvin hərbi təlimlər adı ilə cəbhə bölgəsinə, Tərtər rayonuna getdi. Hərbiyə gedəndə mənə demişdi ki, nigaran qalma, narahat olma, hər şey yaxşı olacaq, biz tezliklə görüşəcəyik... Sentyabr ayının 27-də azğın düşmənlə müharibəyə başlayanda isə hər şeyi anladım... Elvinin hərbi təlimlərdən sonra döyüşlərə getdiyini bildim. O, cəbhənin ən qaynar nöqtəsində olsa da, telefonla danışardı. Özünüzdən və balamdan muğayat ol, məndən nigaran qalmayın - deyirdi. Amma Eıvin bizə müharibədən heç nə danışmırdı. Əsl hərbiçi tək hərbi andına sadiq qalaraq cəbhədə nələr baş verdiyindən bizi məlumatlandırmazdı, narahat olmayaq deyə... Sonradan eşitdim ki, Elvin sərrast atıcı kimi Tərtər-Goranboy-Ağdam-Ağdərə istiqamətlərində gedən döyüşlərdə əsl vətənpərvər kimi döyüşüb. Çoxlu mövqelərimizin, dağ yüksəkliklərimizin mənfur düşməndən azad olunmasında fədakarlıq göstərib. O mənimlə sonuncu dəfə oktyabr ayının 15-də günorta saat 13-14 radələrində telefonla danışdı. Dedi ki, özünə və qızına yaxşı bax... Danışığında nəsə təlaş hiss etdim, çox nigaran qaldım”
Qəhrəmanımızın həyat yoldaşı deyir ki, “Elvin elə həmin gün Ağdərənin azad edilməsi uğrunda erməni mənfurları ilə gedən qızğın döyüşlərdə ağır yaralanaraq, Vətənimizin xilaskar, mərd oğlu kimi qəhrəmancasına həlak olub”
Məlumatlara görə, Elvin Məmmədovun şəhid olduğu döyüşdə düşmən güclü müqavimət göstərsə də, hərbçilərimiz dığaları susdurub, çoxlu sayda canlı qüvvəsini və texnikasını sıradan çıxararaq düşmənlərə sarsıdıcı zərbələr vurublar.
Xəyalə xanım söhbətinin davamında söylədi ki, “Elvinin həlak olması xəbərini 16 oktyabr 2020-ci il tarixdə saat 10:30-da aldıq... Elə bil dünya başıma fırlandı, anamgildə idim, qışqıraraq dedim – “Axı niyə belə etdin, Elvin?... Sən mənə demişdin ki, hər şey yaxşı olacaq, tezliklə dönəcəyəm... Bəs gələcəkdə Ahunur səni soruşanda nə cavab verim – ay Elvin?” – deyə əlavə etdi...
Qeyd edək ki, Elvin həm də cüdo üzrə idman ustası və dəfələrlə yarış və turnirlərin qalibi olub. Onun adı şəhid idmançı kimi Cüdo Federasiyasının Şərəf kitabına yazılıb.
...Deyirlər “Vətən ürəkdə şəhidlə bitər...” Ürəyində daima Vətən sevgisi gəzdirən, 2016-cı ildən bəri Goranboy rayonunun Ağcakənd kəndindən başlanan və Yaşmada xüsusi təlimlərdən keçən hərbi yolu bu Vətən müharibəsində şəhid kimi başa vurdu igidimiz Elvin...
Ruhun şad olsun, Allah sənin əzizlərinə - həsrətlə yolunu gözləyən Xəyalə xanıma, Ahunur balana Allah səbr versin, Zaqatalanın fədakar oğlu.
Prezidentin Sərəncamı ilə cəsur el oğlumuz Elvin Məmmədov ölümündən sonra “Vətən Uğrunda” medalı ilə təltif edilib.
Elman MALIYEV Azərbaycan Jurnalistlər Birliyinin üzvü
