Koronavirus artıq 1 ilə yaxındır ki, bütün dünyanı cənginə alıb. İnsanlar özünü nə qədər qorusalar da bu gün vəziyyət heç də ürəkaçan deyil. Hazırda COVID-19 infeksiyasına yoluxma halları bütün dünyada, həmçinin, ölkəmizdə olduqca yüksəkdir. Belə bir çətin məqamda insanlara ən çox lazım olan dərman vasitələridir. Lakin bəzi dəllalların süni qiymət artımı yaratması nəticəsində dərmanların qiyməti olduqca şişirdilib.
Dərman qıtlığı məsələsi Milli Məclisdə də müzakirə olunub. Milli Məclisin Səhiyyə komitəsinin sədri Əhliman Əmiraslanov dekabrın 24-də keçirilən iclasda çıxış edərək bildirib ki, ölkəmizdə dərman ehtiyatı var. Ancaq bəzi şəxslər bu qıtlığı süni şəkildə yaradırlar. Nəticədə isə tələbat çox olan preparatlar baha satılır.
Ümumiyyətlə, son həftələr əhalinin əsas şikayətlərindən biri budur ki, apteklərdə bəzi zəruri dərman vasitələrini tapmaq olmur. Xüsusən COVID-19 xəstələrinin vəziyyətini nisbətən yüngülləşdirən bəzi preperatlar var ki, onlar yoxa çıxıb. Əslində, yoxa çıxmayıb, “qara bazar”a düşüb və əl altından baha qiymətə satılır.
İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti: “...dərman qıtlığı yaradılmasının vaxtında müəyyən edilməsi və qarşısının alınması məqsədilə aparılan monitorinqlər gücləndirilib”
Məsələ ilə bağlı müraciət etdiyimiz İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin mətbuat xidmətindən bildirildi ki, koronavirus pandemiyası ilə əlaqədar dünyada olduğu kimi, ölkəmizdə də bir sıra dərman vasitələrinə tələbat artıb: “Bu səbəbdən dərman vasitələrinin təsdiq edilmiş qiymətdən fərqli qiymətə satışı və əsassız dövriyyədən çıxarılmaqla dərman qıtlığı yaradılmasının vaxtında müəyyən edilməsi və qarşısının alınması məqsədilə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən aparılan monitorinqlər gücləndirilib”.
İlqar Hüseynli: “Apteklərdəki qıtlıq və süni qiymət artımı bir-birilə zəncirvari bağlı olan çox ciddi problemlərdən xəbər verir”
Sosial sahə üzrə ekspert İlqar Hüseynli bildirdi ki, apteklərdəki qıtlıq və süni qiymət artımı bir-birilə zəncirvari bağlı olan çox ciddi problemlərdən xəbər verir: “Bu sektorda istehlakçıya xidmət edən ən son instansiya apteklərdir. Təbii ki, apteklərin də qüsuru var, amma ümumən götürəndə aptekə qədər gerçəkləşən dərman təchizatı ilə bağlı zəncirvari proses var ki, biz öncə o proses zamanı nələrin baş verdiyinə aydınlıq gətirməliyik”.
İ.Hüseynlinin sözlərinə görə, hər bir dərman vasitəsinin üzərinə Tarif Şurasının müəyyən etdiyi qiymətlər yapışdırılmalıdır: “İstehlakçılara müraciət edərək deyirəm ki, aptekdən aldıqları dərman preparatlarının üzərində qiymət yoxdursa, o, sizə baha qiymətə təklif olunursa, qanun pozulur və sizin hüququnuzdur ki, istər İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə, istərsə də Səhiyyə Nazirliyinin “qaynar xətt”inə müraciət edəsiniz. Təəssüf ki, fürsətçilik edib, bazarda süni qiymət artımına gedənlər var”.
Natiq Cəfərli: “Dərman qiymətlərinin bahalaşmasına səbəb tələbatın artmasıdır”
İqtisadçı-ekspert Natiq Cəfərlinin sözlərinə görə, ölkəmizdə dərman qiymətlərinin molekullar üzrə tənzimlənməsinə uzun zamandır ki, keçid edilib. Molekullar və istehsalçı ölkələrin qiymət siyasətinə uyğun olaraq, apteklərimizdə yarı tənzimlənmə olmalı idi: “Dövlət bir neçə il öncə bununla bağlı müəyyən qərarlar verib. Lakin görünən odur ki, virusun müalicəsində effektiv olan dərmanlara tələbatın artımı müşahidə edilən kimi dərmanlar ya apteklərdən yoxa çıxır, ya baha qiymətə, ya da əl altından satılır. Bu da haqlı narazılıqlara səbəb olur. Dərman qiymətlərinin bahalaşmasına səbəb tələbatın artmasıdır”.
İqtisadçı hesab edir ki, dərman qiymətləri ilə bağlı problemlərin olmaması üçün dövlət öncədən tədbirlər görməli idi.
Günel CƏLİLOVA
