Sosial şəbəkələrdə 187 saylı tam orta məktəbin direktoru Nailə Məmmədovanın karantin qaydalarını pozaraq özünə ad günü məclisi təşkil etməsi barədə görüntülər yayılıb. Onun bu hərəkəti ictimai qınağa səbəb olub.
Təhsil nazirinin əmrilə Nailə Məmmədova ölkə üzrə tətbiq olunan xüsusi karantin rejiminin tələblərini pozması səbəbilə intizam məsuliyyətinə cəlb edilib və ona Azərbaycan Respublikası Əmək Məcəlləsinin müvafiq maddəsinə əsasən, sonuncu xəbərdarlıqla şiddətli töhmət elan olunub.
187 saylı tam orta məktəbin direktoru Nailə Məmmədovanın üçrəngli bayrağımıza hörmətsizlik etməsi ilə bağlı sosial şəbəkədə video paylaşıldı. Görüntüdə məktəb direktoru bayrağı əcaib formada başına taxaraq ət doğrayır. Onun bu hərəkəti ölkə ictimaiyyəti tərəfindən xoş qarşılanmır. Direktorun həm karantin qaydalarını pozduğu və ən əsası bayrağa hörmətsizlik etdiyi üçün onun vəzifədən kənarlaşdırılması tələb olunur.
Məlumdur ki, təhsil sistemində çalışan şəxslər təkcə öz vəzifə fəaliyyətləri ilə deyil, gündəlik həyat tərzləri ilə də cəmiyyətə nümunə olmalıdırlar. 187 saylı tam orta məktəbin direktoru N.Məmmədovanın bayrağa hörmətsizlik etməsi hər kəs tərəfindən şiddətlə qınanılır.
“...daha sərt tədir görülə, yəni birbaşa vəzifədən azad edilə, 70-ci maddənin "c" bəndi ilə işdən çıxarıla bilərdi”
Təhsil eksperti Kamran Əsədov bildirdi ki, karantin qaydalarını pozaraq özünə ad günü məclisi təşkil edən 187 saylı tam orta məktəbin direktoru Nailə Məmmədovanın cəzalandırılması bütün təhsil işçilərinə dərs olmalıdır: "İlk növbədə bildirim ki, təhsil sistemində çalışan şəxslər öz vəzifə fəaliyyətləri, gündəlik həyat tərzləri ilə cəmiyyətə nümunə olmalıdırlar. Bu, bütün sahələrə aiddir. Təhsil elə bir sahədir ki, yazılmış qanunlara riayət etməklə yanaşı, eyni zamanda, yazılmamış qanunlara da mütləq şəkildə əməl olunmalıdır. 2020-ci il ölkəmiz üçün kifayət qədər ağır il oldu. İlin əvvəlindən pandemiya səbəbindən təhsil prosesi dayandı, ardınca isə İkinci Vətən müharibəsi... Nə qədər gənc insan şəhid oldu, yaralandı, 3 minə yaxın ailənin gözü yaşlı qalması ciddi məsələdir və bu bizi narahat etməlidir. Ona görə hər bir insan Azərbaycanın ərazi bütövlüyünün qorunmasında əməyi keçən şəxslərə hörmət göstərməlidir. 44 günlük müharibə şəraitində Azərbaycan 11 şagirdini itirib. Azərbaycanın ərazi bütövlüyü uğrunda gedən müharibədə yenə 14-dən çox müəllim silah götürüb döyüşə gedib və şəhid oldu. Bunun fonunda təhsil işçiləri həssas olmalıdırlar. Ölkədə karantin rejimidir. Çox təəssüflər olsun ki, pandemiya qanunlarına və tələblərinə riayət etməyənlər var. Onların arasında təhsil işçiləri də var. Bu birinci hal deyil. Biz məsələyə iki tərəfdən baxaq. Direktor pandemiya qaydalarını pozub. Buna görə müvafiq olaraq cərimələnib. Digər tərəfdən isə Əmək Məcəlləsinin tələblərinə görə öz əmək funksiyasını yerinə yetirmədiyi üçün Təhsil Nazirliyi tərəfindən şiddətli töhmət alıb".
Həmsöhbətimiz hesab edir ki, Təhsil Nazirliyi mətkəb direktoruna daha sərt cəza verə bilərdi: "Bu heç də yaxşı hal deyil. Biz cəmiyyətə virusun nə qədər təhlükəli olduğunu isbat edib inandırmalıyıq. Bu məsələdə müəllimlərin üzərinə böyük yük düşür. Hesab edirəm ki, müəyyən qədər diqqətsizlik göstərilib. Əmək Məcəlləsinə görə direktora sonuncu xəbərdarlıq edilməklə şiddətli töhmət verilib. Həm müharibəni, həm şəhidləri, həm onların ailələrinin gözü yaşlı olduğunu, həm də virus təhlükəsini nəzərə alsaq, daha sərt tədbir görülə, yəni birbaşa vəzifədən azad edilə, 70-ci maddənin "c" bəndi ilə işdən çıxarıla bilərdi. Təhsil Nazirliyi bir az humanistlik göstərib. İnanıram ki, təhsil işçiləri bundan bir dərs alar və bir də belə hala yol verməzlər".
Günel CƏLİLOVA
