İşğaldan azad edilən, zəngin təbii sərvətlərə malik olan Kəlbəcər rayonu Ermənistanın terrorçu silahlı birləşmələri tərəfindən işğal edildikdən sonra düşmən bu rayonun bütün təbii sərvətlərini talayıb, qanunsuz olaraq istismar edib, bununla da Azərbaycana milyardlarla ziyan vurub.
Artıq Ermənistanın Azərbaycana vurduğu ziyanın həcmi hesablanır. Ortada kifayət qədər ciddi əsaslara söykənən rəqəmlər var. AMEA-nın akademik H.Ə.Əliyev adına Coğrafiya İnstitutunun əməkdaşları ermənilərin Kəlbəcərdəki mineral suların istismarı ilə Azərbaycana 7.5 milyard manat ziyan vurduğunu hesablayıb üzə çıxarıblar. İnstitutun şöbə müdiri, coğrafiya üzrə fəlsəfə doktoru Mirnuh İsmayılov deyib ki, ermənilər tərəfindən təkcə Kəlbəcərdəki mineral su bulaqlarının istismarı Azərbaycana 7.5 milyard manat həcmində ziyan vurub.
O qeyd edib ki, ermənilər həmin suları qablaşdıraraq öz adları ilə ixrac ediblər. Bizə məxsus qızıl, civə yataqlarından onların əldə etdikləri gəlir isə qat-qat artıq olub ki, bu da bizim itkilərimizin hesabındadır.
“...bu ölkə beynəlxalq məhkəmə qarşısına çıxarılmalıdır”
Milli Ekoloji Proqnozlaşdırma Mərkəzinin rəhbəri Telman Zeynalov “Bakı-Xəbər”ə bildirdi ki, Ermənistanın işğalı dövründə Kəlbəcərin mineral su ehtiyatları da böyük təcavüzə, qanunsuz istismara məruz qalıb. T.Zeynalov hesab edir ki, Ermənistan Kəlbəcərin mineral su bulaqlarını qanunsuz olaraq istismar etməklə nəinki 7.5, bəlkə də daha artıq həcmdə ziyan vurub. Onun fikrincə, bu istiqamətdə bizə dəyən zərərin həcminin hesablanması üçün daha dərin araşdırmalara, monitorinqlərə ehtiyac var. Müsahibimizin sözlərinə görə, Ekologiya və Təbii Sərvətlər Nazirliyi bununla bağlı xüsusi monitorinq qrupu yaratmaqla bizə dəymiş zərərin həcmini rəsmi şəkildə üzə çıxara bilər: “Ermənistan Kəlbəcərin təbii sərvətlərini vandalcasına talan edib, qanunsuz olaraq istismar edib, miyardlarla dollar vəsait əldə edib. Ermənistanın bu cinayətləri cavabsız qalmamalıdır. Hesab edirəm ki, Kəlbəcərdə mineral su bulaqlarını qanunsuz istismar etməklə Azərbaycana ciddi zərər vurduğuna görə Ermənistana qarşı təzminat davası açılmalı, bu ölkə beynəlxalq məhkəmə qarşısına çıxarılmalıdır. Eyni zamanda da dünya birliyi, dünya ölkələri Ermənistanın bu cinayətləri haqqında mütəmadi olaraq Azərbaycanın rəsmi qurumları tərəfindən məlumatlandırılmalıdır. Fikrimcə, bütün dünya dövlətləri, eləcə də türk və islam ölkələri Ermənistanla bütün siyasi, diplomatik, iqtisadi əlaqələri kəsməlidir. Çünki bu ölkə təcavüzkardır, işğal dövründə Azərbaycan ərazilərində saysız qanunsuzluq törədib, Azərbaycanın təbii sərvətlərini talayıb, qanunsuz olaraq istismar edib. Ermənistan Azərbaycanın təbii sərvətlərini, o cümlədən də mineral bulaqlarımızı qanunsuz olaraq istismar etdiyinə görə ölkəmizə təzminat ödəməli, ödəmək istəməsə, beynəlxalq təşkilatlar bu təzminatı bu ölkəyə məcburən ödətməlidir. Beynəlxalq qurumların kifayət qədər təsir mexanizmi var ki, bundan istifadə etməklə Ermənistanın Azərbaycana təzminat ödəməsini təmin etsinlər. Yoxsa, beynəlxalq təşkilatlar indiyə qədər sərgilədikləri ikili standartları davam etdirsələr, Ermənistan bu təzminatı ödəməkdən yayınacaq, “pulumuz yoxdur” deyə göz yaşları tökəcək. Düşünürəm ki, Ekologiya və Təbii Sərvətlər Nazirliyi də Kəlbəcərdə xüsusi monitorinq keçirməlidir” - deyə T.Zeynalov vurğuladı.
İradə SARIYEVA
