Bütün dünyanı əhatə edən COVID-19 epidemiyasının qarşısını almaq üçün aparılan araşdırmalar sona çatdığı zamanda İngiltərədən qorxulu açıqlama gəlib. Belə ki, Böyük Britaniyada müşahidə olunan, mutasiyaya uğramış yeni koronavirus növünün 70 faizə qədər daha yoluxucu olduğu öyrənilib.
Baş nazir Boris Conson yoluxmada artımın mutasiyaya uğramış koronavirusun yeni növü ilə əlaqəli olduğunu bildirib. O qeyd edib ki, aşkar edilən yeni növ virus köhnədən 70 faizə qədər daha yoluxucudur. Baş nazir paytaxt London, şərq və cənub-şərqdə virusa yoluxmada artım baş verməsi səbəbindən yeni məhdudlaşdırıcı tədbirlərin tətbiq olunacağını açıqlayıb.
Dekabrın 14-də İngiltərənin səhiyyə naziri Mettyu Henkok ölkədə daha sürətlə yayılan yeni SARS-CoV-2 koronavirus növünün aşkarlandığını açıqlayıb. Onun sözlərinə görə, bu virus insandan insana daha asan keçir və bu səbəbdən də daha yoluxucu hesab olunur.
Professor Kris Vittiy mutasiyaya uğramış yeni COVID-19 növünün daha sürətli yayıldığını və ölümcül olduğunu bildirib. O, mutasiya nəticəsində ortaya çıxan koronavirusun yeni növünün daha sürətli yayıla biləcəyini söyləyib. Hazırda bu yeni növün daha ölümcül olduğuna və ya mövcud peyvəndlərə və müalicələrə təsir göstərə biləcəyinə dair hələ bir dəlil yoxdur.
Onu da vurğulayaq ki, Böyük Britaniyada qeydə alınan koronavirusun yeni və daha təhlükəli ştammı Hollandiya, Danimarka və Avstraliyada da aşkarlanıb. Bu barədə Ümumdünya Səhiyyə Təşkilatı (ÜST) məlumat yayıb.
Maraqlıdır, mutasiyaya uğramış yeni COVID-19 növündən ölkəmiz necə qorunmalı və bu istiqamətdə nə kimi işlər görülməlidir?
“Koronavirus mutasiyaya uğrayıb, yeni tiplər yaranıbsa, gələcəkdə vaksinasiya sahəsində müəyyən problemlər yarada bilər”
Tibb üzrə fəlsəfə doktoru, infeksionist Vüqar Cavadzadə bildirdi ki, mutasiyalar virusun bioloji forma və funksiyasının dəyişməsinə səbəb olur: “Mutasiya olmuş formalar bəzən əvvəlki variantından yüngül, bəzən isə çox ağır xəstəlik törədə bilir. Virusun mutasiyaya uğramasına təsir edən faktorlar var. Buna xarici mühitin təsiri, özbaşına dərman vasitələrinin qəbul edilməsi daxildir. Xüsusən də antibiotiklərin qəbulu virusun mutasiyaya uğramasına səbəb olur. Koronavirus mutasiyaya uğrayıb, yeni tiplər yaranıbsa, gələcəkdə vaksinasiya sahəsində müəyyən problemlər yarada bilər. Ola bilər ki, vaksinasiya əvvəlki tiplərə təsir etsin, amma yeni mutasiya olmuş virusda effektiv olmaya bilər. Hazırda son ümidimizi vaksinə bağlamışıq. Yeni virusa vaksin təsir etməzsə, bu artıq bir fəlakət olacaq. Onda məcbur olacağıq ki, hər mutasiya olmuş virusa qarşı vaksin tapılsın. Hazırda yeni virusun təhlükəsi barədə dəqiq məlumatlar yoxdur.
Amma Britaniya mətbuatı yazır ki, mutasiya olmuş virusun əvvəlkinə nisbətən yoluxduruculuğu 70 faizdən yüksəkdir. Bu informasiya təsdiqlənərsə, təhlükə artacaq. Vəziyyət indikindən 70 faiz daha ağır ola bilər”.
İnfeksionist onu da vurğuladı ki, koronavirus pandemiyasının başqa ölkələrə yayılmasının qarşısının alınması çətindir: “Biz istəsək də, istəməsək də, virus gələcək. Çünki xarici ölkələrə gediş-gəliş var. Bu da virusun gətirilib aparılmasına səbəb olur. Düşünürəm ki, insanlar qorunma tədbirlərini daha da artırmalı, özlərinə və ətrafdakılara qarşı məsuliyyətli olmalıdırlar”.
Günel CƏLİLOVA
