Koronavirus pandemiyasının tüğyan etdiyi bir vaxtda koronavirusa yoluxan xəstələr müalicə üçün dərman tapa bilmədiklərini bildirirlər. Bu xəstəliyin müalicəsində istifadə edilən dərman preparatlarının yoxa çıxdığı deyilir. Amma həm sosial şəbəkələrdə, həm də bəzi saytlarda yazılanlara görə, həmin dərmanlar var, onlar apteklərdə dəfələrlə baha qiymətə satılır və onları apteklərdən almaq mümkündür.
Yeri gəlmişkən, sosial şəbəkələrdə və saytlarda yayılan iddialara görə, TƏBİB-in koronavirus xəstələrinə verməli olduğu dərman yardımı bağlamaları Bakı apteklərinə yol açıb və həmin dərmanlar apteklərdə satılır.
Görünən budur ki, hazırda işbazlar hərəkətdədir və onlar koronavirus xəstələri üçün olan dərmanları açıq satışa çıxarıblar, bunu alver predmetinə çeviriblər. Koronavirus dərmanlarının “bazarı” get-gedə qızışır və bu dərmanlar xəstələrə baha satılır.
Bildirək ki, koronavirusun yayıldığı bu bir neçə ayda bu xəstəliyin müalicəsində istifadə edilən dərmanların qiyməti od tutub yanır. Əvvəllər 10 manata olan dərmanlar indi az qala 50-100 manata satılır. Süni qiymət artımının, sui-istifadəçilərin açıq “bazar”ının qarşısı isə hələ də alınmayıb.
Bu vəziyyətdə sui-istifadəyə görə məsuliyyət dərəcəsi necə və hansı qurumlar tərəfindən müəyyənləşməlidir?
Ekspertlər qeyd edirlər ki, dövlət səviyyəsində koronavirusla mübarizə tədbirləri səviyyəsində saysız iş görülüb, hətta koronavirusa yoluxan xəstələrin müalicəsinə də dövlət xüsusi diqqət göstərir, onlara pulsuz dərmanlar ayırır. Ekspertlərə görə, ancaq təəssüf ki, bəzi məsul qurumların məsuliyyətsiz davranışları nəticəsində o dərmanların çox hissəsi xəstələrə çatmır, apteklərə yol açır. Bundan başqa, koronavirus dərmanlarının apteklərdə baha qiymətə satılmasında məsuliyyəti ilk növbədə həmin apteklərin sahiblərinin daşıdığını deyən ekspertlərin sözlərinə görə, işbazların bu zərərli fəaliyyətinin qarşısı alınmalıdır.
“Əsas problemi o dərmanları depolara verən işbazlar yaradır, süni qiymət artımında, qıtlığın yaradılmasında onlar məsuliyyət daşıyırlar”
Tanınmış tibb mütəxəssisi, professor Adil Qeybulla “Bakı-Xəbər”ə bildirdi ki, koronavirus dərmanlarının xəstələr üçün əlçatan olmaması və apteklərdə bu dərmanların baha qiymətə satılması hər kəsi ciddi şəkildə narahat edir. “Dərman bazarında hökm sürən bu məsələ hamını narahat edir. Müvafiq qurumlar bu məsələ ilə bağlı tədbirlər görməlidirlər. Koronavirus dərmanları ilə bağlı həm qıtlıq var, həm də sabotaj elementləri hiss olunur. Apteklərdə koronavirus dərmanlarının satışında süni qiymət artımı mövcuddur. Əlbəttə, bundan da insanlar əziyyət çəkir və bu da hamımızı narahat edir”.
A.Qeybulla bildirir ki, Azərbaycanda müvafiq qurumlar bu faktın üstünə düşməlidir, əgər burada hüquq pozuntusu varsa, hüquq-mühafizə orqanları hərəkətə keçməlidirlər: “Dərman bazarında ciddi araşdırmalar aparılmalıdır. Əgər burada hüquqi məsuliyyət daşıyan bir hərəkətə yol verilirsə, bu işlə hüquq-mühafizə orqanları məşğul olmalı, izləməli, axtarıb tapmalı və tədbir görməlidirlər. Qalan məsələlərin korreksiya olunması isə Operativ Qərargaha aiddir. Çünki koronavirusla mübarizə üçün Operativ Qərargah fəaliyyət göstərir və bu qurum dərman bazarına təsir göstərməlidir. Hesab edirəm ki, Operativ Qərargahın süni qiymət artıranlara, sabotajla məşğul olanlara qarşı təsir imkanları var və təsir göstərməlidir. Apteklər dərman satandır, onlara depodan dərmanlar baha qiymətə verilir. Ona görə də düşünürəm ki, problem depolara dərman verənlərdədir. Çünki apteklər özbaşlarına dərmanların qiymətini artıra bilməzlər. Aptek kommersiya, satış yeridir. Əsas problemi o dərmanları depolara verən işbazlar yaradır, süni qiymət artımında, qıtlığın yaradılmasında onlar məsuliyyət daşıyırlar” - deyə A.Qeybulla qeyd etdi.
İradə SARIYEVA
