Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə Heydər Əliyev Fondu işğaldan azad olunmuş ərazilərdə xidmət edən hərbi qulluqçularımız üçün yeni dəstək aksiyasının həyata keçirilməsinə başlayıb.
Aksiya çərçivəsində dekabrın 18-dən başlayaraq Kəlbəcər rayonu, Xocavənd rayonunun işğaldan azad olunmuş hissəsi və Hadrut qəsəbəsində hərbi xidməti davam etdirən əsgər və zabit heyəti üçün, onların istəkləri nəzərə alınmaqla, müxtəlif qida məhsulları, fərdi qulluq və gigiyenik ləvazimatlardan ibarət bağlamaların çatdırılmasına başlanıb. Daxili İşlər Nazirliyi əməkdaşlarının müşayiəti ilə “Bravo” supermarketlər şəbəkəsinin nümayəndələri işğaldan azad olunmuş ərazilərə səfər edərək bağlamaları hərbi qulluqçularımıza çatdırıblar, həmçinin, əsgərlərimizlə söhbət edərək onların istəklərini qeydə alıblar.
Hərbi qulluqçularımızın istək və ehtiyaclarının qarşılanmasına xüsusi həssaslıqla yanaşan Mehriban xanım Əliyevanın təşəbbüsü çərçivəsində növbəti günlərdə işğaldan azad olunmuş digər ərazilərə də səfərlər təşkil ediləcək. Aksiyanın davamlı şəkildə həyata keçirilməsi nəzərdə tutulub.
Ümumən, Heydər Əliyev Fondu tərəfindən azad edilən ərazilərdə xidmət edən hərbi qulluqçulara göstərilən bu dəstəyin əhəmiyyətini ekspertlər necə dəyərləndirirlər?
“Bu, onların qulluq etdikləri ərazilərdə sosial vəziyyətlərinin daha da yaxşılaşmasına xidmət edəcək”
Məsələyə münasibət bildirən hərbi ekspert Ramil Məmmədlinin sözlərinə görə, Mehriban xanımın təşəbbüsü ilə başlanan məlum aksiya cəbhə bölgəsində xidmət edən hərbçilər üçün böyük mənəvi əhəmiyyət kəsb edir: “Bu, onların qulluq etdikləri ərazilərdə sosial vəziyyətlərinin daha da yaxşılaşmasına xidmət edəcək. Onların ehtiyaclarının daha yüksək səviyyədə təmin olunmasına əlavə təkan verəcək. O baxımdan, Heydər Əliyev Fondunun dəstəyinin xüsusi əhəmiyyəti var. Bu, ilk növbədə, hərbi qulluqçularımıza mənəvi dəstək verir. Onlar görürlər ki, əsgərlər unudulmur. Müharibə dövründə olduğu kimi, müharibədən sonra da onlara yüksək diqqət və qayğı göstərilir. Bütün bunlar cəbhə bölgəsində xidmət edən hərbçilərin ruh yüksəkliyini daha da artırır. Sözügedən münasibət onlara daha çox stimul verir. Nəzərə almaq lazımdır ki, 44 günlük müharibədən sonra cəmiyyətdə orduya olan münasibət daha da yüksəlib. Bu, demək olar, bütün sahələrdə özünü göstərir. Ona görə də orduya yönəlik belə dəstək aksiyalarının keçirilməsi olduqca əhəmiyyətlidir. Hesab edirəm ki, bütövlükdə bunun çox müsbət nəticələri olacaq”.
Hərbi ekspert hesab edir ki, bir sıra özəl qurumlar Heydər Əliyev Fondunun təşəbbüsündən örnək götürməlidirlər.
Vidadi ORDAHALLI
