“...Yeri gəlmişkən, Azərbaycan Qoşulmama Hərəkatının sədri olan ölkə kimi bu mövzunu daim diqqət mərkəzində saxlayırdı. Biz həmişə bütün beynəlxalq forumlarda deyirdik ki, kifayət qədər maliyyə resurslarına malik olmayan ölkələrin də vaksinlərdən istifadə etmək imkanı inkişaf etmiş ölkələr kimi olsun, bu məsələdə ayrıseçkilik olmasın. Biz də vaksinləmə strategiyasını hazırlamışıq, bu strategiya çoxplatformalılığı nəzərdə tutur...”.
Bu fikirləri Prezident İlham Əliyev dekabrın 18-də Müstəqil Dövlətlər Birliyinin Dövlət Başçıları Şurasının videokonfrans formatında keçirilən iclasında bildirib.
“Burada vaksinin vurulacağı istiqamətlər nəzərdə tutulub, birinci növbədə sözsüz ki, risq qrupuna vurulacaq”
Azərbaycan Milli Məclisinin Səhiyyə Komitəsinin üzvü, millət vəkili Məlahət İbrahimqızı “Bakı-Xəbər”ə bildirdi ki, hazırda koronavirus pandemiyasının nəinki profilaktikası, onun müalicəsi qlobal bir problemdir: “Bilirsiniz ki, koronvirusun nəinki profilaktikası, onun müalicəsi qlobal bir problemdir, çağırışdır. Eyni zamanda, onun qarşısını almaq, önləyici tədbirlər görülməsi, xüsusən də immunlaşdırma, vaksinləşdirmə bir nömrəli problemlərdən biridir. Bu, dünyanın bütün ölkələrində var. Yadınızdadırsa, dekabrın əvvəllərində cənab Prezidentin təşəbbüsü ilə Birləşmiş Millətlər Təşkilatının xətti ilə də Baş Assambleyanın xüsusi sessiyası keçirildi. Orada da bu məsələ vurğulandı. Həmin sammitdə cənab Prezident İlham Əliyevin, Baş Assambleyanın prezidentinin, BMT-nin baş katibinin çıxışlarında bütün ölkələrə vaksinlərin ədalətli paylanmasının vacibliyi qeyd edildi. Bu nə deməkdir? Çünki hazırda kasıb ölkələrə vaksin verilməsi hələ sual altındadır. Yəni kim güclüdür, kim imkanlıdır, o vaksinləşdirsin, immunlaşdırsın, vaksinasiya olsun, kim gücsüzdür, kim imkansızdır, o vaksinləşməsin. Təbii ki, bu düzgün deyil, bu, dünyanın ədalət tarazlığının, balansının pozulması deməkdir və humanizmə də tamamilə ziddir. Bu mənada Prezidentimiz özü də Müstəqil Dövlətlər Birliyinin Dövlət Başçıları Şurasının videokonfrans formatındakı iclasında dedi ki, biz bununla əlaqədar 10 milyon dollar həcmində Ümumdünya Səhiyyə Təşkilatına pul da keçirmişik.
Çoxplatformalılıq o deməkdir ki, bu bütün dünyada da belə olacaq, vaksin hansı istiqamətlərdə, əhalinin hansı təbəqələrinə vurulacaq. Təsəvvürünüzə gətirin ki, dünyada 8 milyarda yaxın əhali var. Təbii ki, körpə uşaqlara ilkin mərhələdə vaksin vurulmayacaq. Platformanın bir tərəfi budur. Eyni zamanda, dünyada beynəlxalq təşkilatların, xüsusən də ÜST-ün qəbul etdiyi vaksin firmaları var. Kimsə desə ki, mən vaksin istehsal etmişəm, bu qəbul olunmayacaq. Ancaq ÜST-ün qəbul etdiyi firmaların istehsal etdiyi vaksinlərdən istifadə ediləcək. 7-8 milyard insan doza alacaq. Həkimlərin dediyinə görə, iki mərhələdə vurulacaq. Bir dəfə vurulacaq, müəyyən intervaldan sonra isə ikinci dəfə tətbiq ediləcək. Görün, qısa müddət ərzində bu qədər vaksinin istehsal olunması asan məsələdir? Xeyr, qeyri-mümkündür. Ona görə də immunlaşdırma müxtəlif platformalarda gedəcək. Cənab Prezident də öz çıxışında həmin vaksin istehsal edən firmaların hamısının adını qeyd etdi və dedi ki, biz bunu çoxplatformalılıq əsasında aparacağıq. Burada vaksinin vurulacağı istiqamətlər nəzərdə tutulub, birinci növbədə sözsüz ki, risq qrupuna vurulacaq. Risq qrupuna kimlər daxildir? Şübhəsiz ki, hazırkı şəraitdə ən böyük risq qrupuna tibb işçiləri aiddir. Çünki onlar bütün günü koronavirusla mübarizə aparırlar. İkinci risq qrupu yaşlı insanlardır, eləcə də ictiamai iaşə müəssisələrində çalışanlardır. Bunu mütəxəssislər müəyyənləşdirəcək. Onu da deməliyik ki, bu vaksinasiya dövlət hesabına olacaq və burada müəyyən mənada könüllülüyə də fikir veriləcək”.
M.İbrahimqızı qeyd etdi ki, burada məcburiyyət olmayacaq və könüllülük prinsipi əsas götürüləcək. “Görürsünüz ki, Azərbaycan dövlətinin vaksinləmə strategiyası nə qədər istiqamətləri, platformaları, tərəfləri özündə əks etdirir. Bizdə vaksinasiya gələn ay üçün nəzərdə tutulub. Amma bəzi ölkələrdə kütləvi olmasa da, tək-tək artıq başlayıblar. Bilirsiniz ki, müəyyən problemlər də, ağırlaşma halı da olub və sair. Pandemiyanın ilk günündən Prezidentimiz deyib ki, bizim dövlətimiz, bir Prezident kimi mənim üçün vacib olan vətəndaşımın həyatı və sağlamlığıdır. Vətəndaşımızın da həyatı və sağlamlığı ilə bağlı dövlətimizin mümkün olan bütün resurslarından istifadə olunur” - deyə M.İbrahimqızı qeyd etdi.
İradə SARIYEVA
