“...Hansı texnologiyalardan istifadə ediləcəyindən asılı olmayaraq, bizim üçün əsas meyar həmin vaksinlərin elmi cəhətdən əsaslandırılmış təhlükəsizliyi olacaq. Nəzərdə tutulur ki, vaksinləmə proqramı gələn ilin əvvəlində başlanacaq, vaksinləmə könüllü olacaq və dövlət hesabına həyata keçiriləcək. Azərbaycan pandemiyaya qarşı mübarizədə geniş beynəlxalq əməkdaşlığın fəal tərəfdarı kimi çıxış edib və edir. Bizim təşəbbüsümüzlə bir neçə beynəlxalq tədbir keçirilib”. Bunu Prezident İlham Əliyev Müstəqil Dövlətlər Birliyinin Dövlət Başçıları Şurasının videokonfrans formatında keçirilən iclasında deyib.
Prezident dedi ki, vaksinlərin elmi cəhətdən əsaslandırılmış təhlükəsizliyi bizim üçün əsas şərtdir. Bu nə deməkdir?
“Azərbaycan dövləti vaksin məsələsində təhlükəsizlik meyarını əsas götürür”
Tibb elmləri doktoru, professor Nəsib Quliyev “Bakı-Xəbər”ə şərhində qeyd etdi ki, hər bir preparat icad ediləndə, hazırlananda onu bütün yoxlama mərhələlərindən keçirirlər: “Əvvəlcə laboratoriyada yoxlanılır, ikinci mərhələdə heyvanlar üzərində sınaqdan keçirilir, üçüncü mərhələdə isə insanlar arasında yoxlamadan keçirilir. Bu vaksinin, preparatın təhlükəsizliyi sübut olunandan sonra onu tətbiq etmək olar. Həm də o vaksin preparatların neçə faiz hallarda antitel əmələ gətirdiyini də yoxlayıb sübut etmək lazımdır. Görürsünüz, vaksinləri təklif edənlərdən biri 90, o biri 95, başqa birisi isə 60 faiz olduğunu bildirir. Amma vaksinlərin istifadə olunması üçün müvafiq tələblər var və o tələblər gərək yerinə yetirilsin ki, onu istifadə etmək mümkün olsun. Çünki vaksin strateji məsələdir, bir-iki adama istifadə olunmur, bu, minlərlə, milyonlarla insana qısa müddətdə tətbiq olunur. Ona görə də onun təhlükəsizliyi tam sübuta yetirildikdən sonra istifadə olunmalıdır. Cənab Prezident vaksinlərin təhlükəsizliyinin tam sübut olunduqdan sonra istifadə edilməsini nəzərdə tutur. Buna görə deyir ki, bizim üçün əsas meyar onun elmi cəhətdən təhlükəsizliyi olacaq. Yəni Azərbaycan dövləti vaksin məsələsində təhlükəsizlik meyarını əsas götürür. Bu da çox mühüm və müsbət amildir”.
N.Quliyevin sözlərinə görə, Azərbaycan dövləti elmi cəhətdən təhlükəsizliyi tam sübut olunan preparatları alıb vətəndaşlara tətbiq edəcək. Azərbaycan dövlətinin vaksin strategiyasının olduğunu vurğulayan N.Quliyevin sözlərinə görə, həmçinin də Ümumdünya Səhiyyə Təşkilatının (ÜST) strateji nəzarət qrupu adlı bir qurumu var, bu qurum təklif edilən vaksinləri tam yoxlayıb təhlükəsizliyini sübut etdikdən sonra ona lisenziya verir: “Həmin vaksinlər lisenziya alandan sonra onu ölkələr normal şəkildə alırlar. Bizim ölkə də ala bilər. Elə ölkələr var ki, vaksin hazırlayıb öz ölkəsində tətbiq edir, onun isə lisenziyası olmur. Cənab Prezident burada beynəlxalq qaydalarla ərsəyə gəlmiş peyvənd preparatlarının alınmasını nəzərdə tutur” - deyə N.Quliyev qeyd etdi.
İradə SARIYEVA
