Daxili İşlər Nazirliyi sosial şəbəkələrdə ölkə rəhbərliyinin adına saxta hesablar açaraq insanları aldadanlarla bağlı vətəndaşlara xəbərdarlıq edib.
Sözügedən məsələ ilə bağlı DİN Mətbuat xidmətinin rəisi, polis polkovniki Ehsan Zahidov bildirib ki, sosial şəbəkələrdə ölkə rəhbərliyinin adına saxta hesablar yaradılmaqla həmin hesablarda müxtəlif saytların ünvanları ödənişli reklam edilməklə paylaşılır: “Göstərilən ünvanlara daxil olduqda isə reklam saytlarına yönəldilir və daxil olmaq üçün qeydiyyat və kart məlumatları istənilir. Bu yolla məlumatlarını daxil edən istifadəçilərin kart məlumatlarının oğurlanmasına cəhdlər olunur. Bununla əlaqədar Daxili İşlər Nazirliyi və digər aidiyyəti dövlət qurumları məsələni nəzarətə götürərək araşdırmalara başlayıblar. Daxili İşlər Nazirliyi vətəndaşlarımızı belə saxta hesablara inanmamağa, sosial şəbəkələrdən istifadə edərkən ayıq-sayıq olmağa çağırır”.
Həqiqətən də son vaxtlar müəyyən fırıldaqçı şəxslər müharibədə zərər çəkənlərə yardım adı ilə sosial şəbəkələr üzərində hesab açaraq vətəndaşları aldatmağa çalışırlar. O cümlədən, vətəndaşları şirnikləndirmək üçün müxtəlif adlar altında yardım hesabları açırlar. Onların bunda məqsədlərindən biri də vətəndaşların kart məlumatlarını əldə etməkdir.
Maraqlıdır, ekspertlər vətəndaşların sözügedən fırıldaqçı şəxslərin toruna düşməmək üçün nələrə diqqət etməsini məsləhət görürlər?
“Vətəndaşlar diqqətli olmalı və DİN-in xəbərdarlığına ciddi yanaşmalıdırlar”
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, tarixən bənzər fırıldaqçılıq halları olub: “Məsələn, İkinci Dünya müharibəsində və ondan sonrakı dövrlərdə bir sıra ölkələrdə bu kimi xoşagəlməz hallar yaşanıb. Müəyyən bu kimi özbaşınalıqlara yol verilib, sui-istifadə halları yaşanıb. Bir növ, belə halların yaşanması təbii hal kimi qəbul olunmalıdır. Çünki müharibə baş verən ölkələrdə bu cür xoşagəlməz hallar baş verir. Çünki dövlətin, cəmiyyətin və müvafiq qurumların bütün gücü cəbhəyə yönəldiyi bir vaxtda, bəzi ünsürlər vətəndaşları aldatmaq yolunu tuturlar. Azərbaycanda da bənzər hallar yaşanır. Nəzərə alsaq ki, müasir dövrdə internet resursları geniş inkişaf edib, bu, müəyyən fırıldaqçılara yeni imkanlar açıb. İnsanların duyğularından sui-istifadə edərək fırıldaq yollarla pul qazanmağa çalışırlar. Yardım adı ilə müxtəlif hesablar açırlar, vətəndaşları aldadaraq ora pul köçürməyə dəvət edirlər. Ya da sözügedən hesablardan yardım ediləcək adı altında vətəndaşların kart məlumatlarını əldə edirlər. Daha sonra həmin kartlara daxil olub hesablarını boşaldırlar. Nəzərə almaq lazımdır ki, DİN məxfi şəbəkə ilə işləyən orqan olduğuna görə, onlarda kifayət qədər məlumat var. Polis orqanları bununla bağlı məlumata malik olduğuna görə insanları xəbərdar edirlər. Sosial şəbəkələrdə hardansa yardımın əldə edilməsi ilə bağlı yayılan məlumatlara əsla inanmaq olmaz. Çünki belə yardımlar rəsmi hesablar üzərindən həyata keçirilir. Bu məsələ Əmək və Əhalinin Sosial Müdafiəsi Nazirliyinin səlahiyyətindədir. Vətəndaşlar sosial şəbəkələrdə belə məlumatlar gördükdə ƏƏSMN-lə əlaqə saxlamalıdırlar. Qurum bunu təsdiq etmədikdə, o zaman polis orqanlarına müraciət etmək lazımdır. Ona görə də vətəndaşlar diqqətli olmalı və DİN-in xəbərdarlığına ciddi yanaşmalıdırlar”.
Ekspert hesab edir ki, vətəndaşlar tövsiyələrə əməl etməsələr, o zaman çox məyusedici nəticələrlə üzləşə bilərlər.
Vidadi ORDAHALLI
