Bildiyimiz kimi, biz sıra şəxslər aztəminatlı, yaxud qazi və şəhid ailələrinə yardım məqsədilə bank hesablarını paylaşaraq, ora pul köçürülməsini istəyirlər. Belə paylaşımlar sosial şəbəkələrdə çoxlu saydadır. Bu işi həqiqətən yardım məqsədilə görənlərlə yanaşı, yardım adı ilə fırıldaqçılıqla məşğul olanlar da var.
Bu günlərdə Daxili İşlər Nazirliyi tərəfindən “YAŞAT” Fondunun adından istifadə edərək şəhid ailələri və yaralananlara edilən yardımları ələ keçirmək istəyən şəxs saxlanıb. DİN-in yaydığı məlumatda qeyd olunur ki, Azərbaycanın ərazi bütövlüyünün müdafiəsi ilə əlaqədar yaralananların və şəhid ailələrinin təminatı məqsədilə ölkə başçısı cənab İlham Əliyevin 8 dekabr 2020-ci il tarixli Fərmanı ilə yaradılan “YAŞAT” Fondunun adından sui-istifadə edərək pul toplamaq məqsədilə sosial şəbəkələrdə vətəndaşlara çağırışlar edən şəxs saxlanıb.
DİN-in əməkdaşları tərəfindən həyata keçirilən əməliyyat zamanı qeyd edilən hüquqazidd əməlləri törədən, Füzuli rayonunda qeydiyyatda olmaqla Qaradağ rayonu Lökbatan qəsəbəsində yaşayan Xəlil Quliyev tutulub. Aparılan araşdırmalar zamanı müəyyən edilib ki, bu şəxs əvvəlcə “Instagram” sosial şəbəkəsində “YAŞAT” Fondunun rəsmi hesabına oxşar özünə məxsus səhifə yaradıb.
Qeyd edək ki, fırıldaqçılarla məşğul olanlar insanların həssas olduğu şəhid və qazi ailələrinin adından istifadə edirlər. Onlara yardım etmək adı ilə sosial şəbəkədə bank hesabı ilə paylaşaraq toplanan vəsaiti şəhid və qazi ailələrinə vermirlər.
“...kampaniyanı kimin apardığı bilinməli, həmin şəxsin ünvanı, telefonu götürülməlidir”
Məsələ ilə bağlı fikir bildirən sosioloq Aytəkin Kamranqızı bildirdi ki, bu cür həssas mövzuda belə dələduzluq və quldurluqla məşğul olanlar var. Onlarla müvafiq dövlət orqanları ciddi məşğul olmalıdırlar: “Vətəndaşlar bu cür məsələlərdə diqqətli olmalıdır ki, belə tələyə düşməsinlər. Yardım edilənin haqqında bütün məlumatlar dəqiqləşdirilməli, kampaniyanı kimin apardığı bilinməli, həmin şəxsin ünvanı, telefonu götürülməlidir".
Həmsöhbətimiz onu da əlavə etdi ki, şəhid və qazi ailələrinə yardım edilməsi üçün dövlət tərəfindən “YAŞAT” fondu yaradılıb. Fondun yaradılmasında məqsəd bu kateqoriyadan olan insanlara hər cür yardım və dəstəyin göstərilməsidir: “Fond vasitəsilə sosial qayğıya, müalicəyə ehtiyacı olanlara yardım ediləcək”.
Günel CƏLİLOVA
