Azərbaycanda xüsusi karantin rejimi bitməyib və koronavirusla mübarizə davam edir. İnfeksiyanın kütləvi yayılmasının qarşısının alınması məqsədilə gücləndirilmiş kütləvi nəzarət-profilaktik tədbirlər də davam etdirilir.
Koronavirusla mübarizə sahəsində görülən işlər artıq müsbət nəticəsini büruzə verir. Belə ki son günlər virusdan sağalananların sayı günü-gündən artır. Açıqlanan son məlumatlara əsasən, dekabrın 18-də Azərbaycan Respublikasında koronavirus (COVID-19) infeksiyasına 3962 yeni yoluxma faktı qeydə alınıb, 4188 nəfər müalicə olunaraq sağalıb və evə buraxılıb. Qeyd etdiyimiz kimi, son günlər koronavirusdan sağalananların sayı yoluxanların sayını üstələyib. Bunun səbəbi isə karantin qaydalarına əməl edilməsidir.
“Azərbaycan dünya miqyasında koronavirus xəstələrinin müalicəsi ilə bağlı fərqli və daha effektiv praktika tətbiq edən nadir ölkələrdəndir”
Həkim-ekspert Rasif Bağırov bildirdi ki, Azərbaycan dünya miqyasında koronavirus xəstələrinin müalicəsi ilə bağlı fərqli və daha effektiv praktika tətbiq edən nadir ölkələrdəndir. Burada koronavirusa yoluxan bütün xəstələr məhz tibbi müəssisələrdə, xüsusi şəraitdə, peşəkar tibbi personalın əhatəsində müalicə alırlar: “Heç də hər ölkə - hətta səhiyyə sistemi kifayət qədər inkişaf etmiş ölkələr belə, bütün koronavirus xəstələrinin tibb müəssisələrində müalicəsi üçün lazımi imkanlara malik deyil. Bir çox yerdə səhiyyə sisteminin inkişafında dövlət öz rolunu məhdudlaşdırdığından, insanların həyat və sağlamlığı əsasən özəl sektorun ixtiyarına buraxılıb. Belə ki, indiki böhranlı durumda xəstəxanalarda çarpayı çatışmazlığı var. Mövcud infrastruktur kifayət etmir. Çünki səhiyyə sistemində özəl sektorun geniş iştirakı hər nə qədər mütərəqqi hal olsa da, bu sektorun əsas məramı mümkün qədər az resurslar xərcləməklə çox mənfəət götürməkdir. Bu sahədə iş qurmuş, özəl klinikalar yaratmış adamlar belə böhran anlarına hazırlıq haqqında düşünə bilməzdilər. Bu cür vəziyyətlərin idarə olunmasına onlar öz məsuliyyət dairələrindən kənar məsələ kimi baxırlar. Ona görə də inkişaf etmiş bir çox xarici ölkədə insanların ölüm halları çox yüksək oldu. Heç kimin gözləmədiyi pandemiya dalğası həmin ölkələrin səhiyyə sistemini qısa zamanda çökdürdü. Ağır xəstələri qəbul edə bilmədilər. Beləliklə, kütləvi ölüm halı baş verdi. Azərbaycan isə vəziyyəti ona görə hazırlıqlı qarşılaya bildi ki, burada dövlət cəmiyyət üçün digər əhəmiyyətli sahələr kimi, səhiyyə sisteminin inkişafına da daimi dəstək verir”.
Həmsöhbətimiz onu da əlavə etdi ki, çoxlu sayda insan şəxsi həkim tutaraq evdə müalicə alır. Evdə müalicə alaraq o şəxslər həm özlərini təcrid edir, həm də xəstəliklə mübarizə aparırlar: “Evdə müalicə olunan xəstələrlə bir necə saatdan bir mobil telefon vasitəsilə avtomatlaşdırılmış qaydada əlaqə saxlanılır. Bununla həm də həmin şəxsin evdə olmasına əminlik yaranır. Xəstənin evdə olub-olmadığı müəyyənləşdirilmədikdə pasientin evinə əraziyə baxan poliklinika tərəfindən müvafiq briqada göndərilir. Əgər pasient evdə olmazsa, ona birinci dəfə xəbərdarlıq edilir. Amma bu hal təkrar baş verərsə, həmin şəxs mütləq qaydada stasionar müəssisədə müalicə almaq üçün ambulans tərəfindən xəstəxanaya göndərilir. Vətəndaşlar məsuliyyətli olmalıdırlar. Əks halda, onlar etibarsız pasient sayılaraq, stasionar şəraitdə müşahidə altında qalmalı olacaqlar”
Günel CƏLİLOVA
