Dövlət Məşğulluq Xidməti hazırda vakansiya bankında 30 minə yaxın iş imkanı mövcud olduğunu açıqlayıb.
Xidmət bildirib ki, vakansiyalar üzrə əməkhaqqı 250-dən 9500 manatadək dəyişir. Ancaq reallıqda iş üçün müraciət etdikdə vətəndaşa “parametrlər uyğun gəlinmir” cavabı verilir. Belə olduğu təqdirdə vakansiyalarda təqdim olunan iş yerləri olduğu kimi qalır.
Dövlət Məşğulluq Xidməti - Mustafa Abbasbəyli: “Göndərişlərin işsiz şəxsə uyğunluğu məşğulluq mərkəzləri tərəfindən təsdiq edilərək işəgötürənlərə yönləndirilir”
Dövlət Məşğulluq Xidmətinin rəisi Mustafa Abbasbəyli bildirdi ki, hazırda vakansiya bankında 30 minə yaxın iş imkanı mövcuddur: “Vakansiyalar üzrə əməkhaqqı 250 manatdan 9 500 manatadək dəyişir. İstənilən şəxs öz bilik və bacarığına uyğun vakansiya seçib göndəriş formalaşdıra bilər. Göndərişlərin işsiz şəxsə uyğunluğu məşğulluq mərkəzləri tərəfindən təsdiq edilərək işəgötürənlərə yönləndirilir”.
Xidmət rəisinin sözlərinə görə, yaxın vaxtlarda vakansiya bankı yeni innovativ yanaşma ilə fəaliyyət göstərəcək: “Süni zəkanın köməkliyilə iş axtaranlara vakansiya, işçi axtaranlara isə müvafiq əməkdaş insan müdaxiləsi olmadan təklif olunacaq”.
Rəşad Həsənov: “Vakansiyada təklif olunan şərtlər, əməkhaqqı var ki, bu, işsiz insanın parametrlərinə və tələblərinə uyğun gəlmir”
İqtisadçı-ekspert Rəşad Həsənovun sözlərinə görə, vakansiya bankında situasiya real vaxt rejimində dəyişir: “Hər şey o qədər də sadə deyil. Onlar boş iş yerləri haqqında məlumatları orada yerləşdirirlər. Məsələ ondan ibarətdir ki, vətəndaş ora müraciət edir. Amma müəyyən parametrlərə uyğun gəlmir əsası ilə işə qəbul etmirlər. Yəni bu iş yerlərinin bəziləri, hansı ki, daha yüksək əməkhaqqı təklif edir, onlar müəyyən layihələr çərçivəsində, xarici şirkətlərin və yaxud da təşkilatların tələb etdikləri mütəxəssisi tapa bilmədiklərindən boş vakansiyalar günlər, bəzən isə aylarla sistemdə qala bilir. Çünki həmin vakansiyalar çox yüksək parametləri olan mütəxəssislər tələb edirlər.
Onu da qeyd edim ki, 250 manatlıq iş yerləri, əslində, mövcüd deyil. Dövlət Məşğulluq Xidmətinin vakansiya bankında olan yerlərə kimlərinsə qəbul edilməsi çətindir. Bir başqa məsələ də var, baxır iş hansı səviyyədə gedir, işsizlər kimlərdir? İş yerləri harada təklif olunur? Bu məqamlar var. Əslində, 5 milyonluq məşğul əhali olan ölkədə bu 20-30 min, hətta vakansiyanın real vaxt rejimində olması başadüşüləndir. Ölkədə 170 mindən artıq aktiv vergi ödəyicisi var. Onların gündəlik qəbul etdiyi qərarlar var və kimisə işdən çıxarırlar, kimisə işə götürürlər, yeni mütəxəssislər axtarırlar. Eyni zamanda, xüsusilə də 250 manat ətrafında olan iş yerləri var ki, onlara tələb də azdır. Həmçinin, işsiz insan vakansiyada qoyulan tələblərə uyğun gəlmir. Vakansiyada təklif olunan şərtlər, əməkhaqqı var ki, bu, işsiz insanın parametrlərinə və tələblərinə uyğun gəlmir. Əmək bazarı hər zaman doymuş bazar olmur. Bu, mümkün də deyil".
Günel CƏLİLOVA
