Adi parçadan kustar maskalar koronavirusun yayılmasında az rol oynamır...

Eyyub Hüseynov: “Kustar üsulla tikilən maskaların koronavirusun yayılmasında xüsusi rolu var”

img

Dünyada olduğu kimi, ölkəmizdə də koronavirus pandemiyası ilə əlaqədar insanlar arasında qoruyucu maskalara tələbat sürətlə artmaqdadır. Tibbi maskalara tələbatın artdığını görən bəzi şəxslər bu vəziyyətdən istifadə edərək daha çox qazanmaq istəyirlər. Bəzi şəxslər müxtəlif növ parçalardan kustar üsulla maskalar hazırlayıb satışa çıxarırlar. Bu maskalar vasitəsilə virus asanlıqla digər insanlara ötürülür.

Türkiyənin yoluxucu xəstəliklər və mikrobiologiya üzrə mütəxəssisi Neşat Bozkurtgilin sözlərinə görə, parça maskaların insanları virusdan qorumaq ehtimalı azdır: “Bu, parçanın keyfiyyətinə, məsamələrinə və keçiriciliyinə görə dəyişir. Belə parçalar 60 və daha yüksək dərəcədə yuyucu vasitə ilə yuyulmalıdır. Yuyulduqdan sonra yaxşı qurudulmalı və nəm istifadə edilməməlidir. Fenlə də qurudula bilər. Bu maskalar bir neçə dəfə istifadədən sonra deformasiyaya uğrayır və əvvəlki kimi effektiv olmaya bilər”.

  • “Bəzi işbazlar bu vəziyyətdən istifadə edirlər, nəticədə tibbi standartlara cavab verən əsl maskalar qalır kənarda”

Məsələ ilə bağlı fikir bildirən Azad İstehlakçılar Birliyinin (AİB) sədri Eyyub Hüseynov qeyd etdi ki, kustar üsulla hazırlanan maskaların koronavirusun yayılmasında xüsusi rolu var: “Bəzi şəxslərin nədən gəldi maska tikib istifadə etməsi doğru deyil. Əslində, hər bir malın standartı var. Çox vaxt belə maskalar vasitəsilə virus asanlıqla digər insana ötürülür. Təəssüf ki, maska istehsal edən fabrikin işçiləri və mütəxəssislər bununla bağlı əhali arasında heç bir maarifləndirmə işi aparmırlar. İnsanlara başa salmaq lazımdır ki, harada və nədən gəldi tikilən maskalardan istifadə etməsinlər. Bəzi işbazlar bu vəziyyətdən istifadə edirlər, nəticədə tibbi standartlara cavab verən əsl maskalar qalır kənarda”.

E.Hüseynov əlavə edib ki, maskaların təkrar istifadəsi doğru deyil: “Maskaların yuyulub yenidən istifadə olunması da düzgün deyil. Əslində, maskaların qiyməti o qədər ucuz olmalıdır ki, istehlakçı onu ala bilsin. Bir ailədə beş nəfər varsa, iki saatdan bir maska dəyişərsə, aya 100-150 manat pul edir. Düzdür, bazar iqtisadiyyatıdır, lakin tələb-təklif məsələsi nəzərə alınmalıdır”.

Günel CƏLİLOVA

Son xəbərlər