44 günlük Vətən müharibəsində rəşadətli Azərbaycan Ordusu, sözün əsl mənasında, düşmənin sinəsinə çalın-çarpaz dağ çəkib, düşməni tamamilə diz çökdürüb. Vətən oğulları öz canları, qanları bahasına torpaqlarımızı düşmən əsarətindən azad ediblər. Qurtuluş savaşında qəhrəmancasına şəhid olanlar, qazi adı qazananlar da oldu.
Müdafiə Nazirliyinin yaydığı məlumata görə, 44 günlük Vətən müharibəsində Silahlı Qüvvələrimizin 2783 nəfər hərbi qulluqçusu həlak olub.
Bildiyimiz kimi, Azərbaycan Respubikası “Xatirə kitabı” redaksiyası tərəfindən uzun illərdir Vətənimizin ərazi bütövlüyü uğrunda şəhidlik mərtəbəsinə yüksələn qəhrəmanlarımızın xatirəsinin əbədiləşdirilməsi istiqamətində müxtəlif layihələr həyata keçirilir, kitablar nəşr edilir.
44 günlük Vətən müharibəsində şəhid olan 2783 qəhrəmanımızın xatirəsinin əbədiləşdirilməsi istiqamətində “Xatirə kitabı” redaksiyası hansı işlər görməyi planlaşdırır?
“Bu zəfəri bizə yaşadan şəhidlərimizin abidə-kitabı olacaq”
“Xatirə kitabı” redaksiyanın baş redaktoru Nəzakət Məmmədova “Bakı-Xəbər”ə açıqlamasında bildirdi ki, artıq bu istiqamətdə yeni layihəyə başlayırlar. “Şəhidlərimizin xatirəsinin əbədiləşdirilməsi “Xatirə kitabı” redaksiyası olaraq bizim işimizdir. Bilirsiniz ki, İkinci Dünya müharibəsindən üzü bəri bütün müharibələr, münaqişələrdə iştirak edən azərbaycanlıların, sonrakı mərhələdə Birinci Qarabağ müharibəsində Azərbaycanın ərazi bütövlüyü uğrunda şəhid olan Vətən övladlarının xatirəsinin əbədiləşdirilməsi istiqamətində böyük layihələr həyata keçirmişik, “Xatirə kitabı”nın 16 cildini çap etmişik, 17-ci cildin isə üzərində işləyirik, bundan əlavə, xüsusi buraxılışlar da nəşr etmişik. 44 günlük Vətən müharibəsi çox şükür ki, zəfərlə bitdi. Düzdür, itkilərimiz də oldu. Vətən müharibəsində şəhid olan və öz şəhidlikləri ilə bizə qələbə bəxş edən zəfər şəhidlərinin də xatirəsini əbədiləşdirmək istiqamətində artıq işlərə başlamışıq. 2783 şəhidimiz olduğu artıq məlumdur. Bilirsiniz ki, bu say arta bilər, çünki 103 nəfərin DNT testi verilib, amma onların adları məlum deyil, onların adları bu kitaba salınacaq. Allah edə, onlar sağ olalar. 100-dən çox da itkinimiz var, onların hələ taleyi məlum deyil. Ancaq Müdafiə Nazirliyinin yaydığı rəsmi məlumata görə, 2783 şəhidimiz var. Dediyim kimi, artıq “Xatirə kitabı”nın 17-ci cildi üzərində işləyirik və Vətən müharibəsi şəhidlərinin bir qismi haqda məlumatları bu cildə salmağı düşünürük. “Xatirə kitabı”nın 18-ci cildini isə, bütövlükdə, Vətən müharibəsi şəhidlərinə həsr edəcəyik. 2783 adi bir rəqəm deyil, bunun içində böyük insan taleyi, yarımçıq ömürlər, nakam qismətlər, bəxtlər var. Biz İkinci Dünya müharibəsini kinolarda gördük, o haqda kitablardan oxuduq. Amma mən də, çoxlarımız da Birinci və İkinci Qarabağ müharibəsinin şahidləri olduq. Sonra tale elə gətirdi ki, mən şəhidlərimizin taleyini “Xatirə kitabı”nda əbədiləşdirdim. Birinci Qarabağ savaşında bizim 20 mindən çox şəhidimiz olub. Amma 44 günlük qanlı savaşda itkilərimiz az oldu. Böyükmiqyaslı bir qələbənin, bu qədər torpaqların işğaldan azad olunmasının müqabilində şəhidlərimizin sayı minimum dərəcədə oldu. 44 günlük müharibədə şəhidlərimizin canı-qanı bahasına qazandığımız qələbəyə görə bundan sonra yaşadığımız ömrümüzü şəhidlərimizə borcluyuq. Nəinki biz, gələcək nəsillərimiz Vətən müharibəsinin şəhidlərinə borclu olacaqlar. Çünki 44 günlük Vətən müharibəsinin şəhidləri bizi ən böyük qınaqdan, töhmətdən xilas etdilər, əyilən başımızı dikəltdilər, qürurumuzu daha da uca etdilər. Bu şəhidlərimiz zəfər şəhidləridirlər”.
N.Məmmədovanın sözlərinə görə, növbəti ildə Vətən müharibəsi şəhidlərinin xatirəsinə hazırlanacaq kitab-abidə bir qədər əvvəlki nəşrlərdən fərqlənəcək: “Biz “Xatirə kitabı”nın 18-ci cildində qələbə zəfərli şəhidlərimiz haqda məlumatları geniş şəkildə onların şəkilləri ilə verəcəyik. İndiyə qədər biz çap etdiyimiz cildlərdə qəhrəman şəhidlərimiz haqda ensiklopedik məlumatlar verilirdi, şəkil vermirdik. Bilirsiniz ki, əsir, girov və itkinlərlə bağlı hazırladığımız kitabda onlar haqqında məlumatları şəkilləri ilə birgə vermişdik. Vətən müharibəsi şəhidləri haqqında məlumatlar həm geniş olacaq, həm də məlumatlar qəhrəman şəhidlərimizin şəkilləri ilə veriləcək. Bu zəfəri bizə yaşadan şəhidlərimizin abidə-kitabı olacaq. Bizim buna, eyni zamanda, texniki imkanlarımız da var. Biz “Vətən müharibəsinin şəhidləri” adlı ayrıca bir kitab-xüsusi buraxılış da hazırlayıb çap edəcəyik. Həm ayrıca kitab çap edəcəyik, həm də “Xatirə kitabı”nın növbəti cildinə onların adlarını, onlar haqqında məlumatları daxil edəcəyik” .
İradə SARIYEVA
