8 Noyabr - Zəfər günü - iş, ya qeyri-iş günü...

img

Azərbaycan Respublikası Prezidentinin “Azərbaycan Respublikasında Zəfər gününün təsis edilməsi haqqında” 2020-ci il 2 dekabr tarixli Sərəncamına əsasən, Vətən müharibəsində misilsiz qələbənin əbədiləşdirilməsi məqsədilə hər il noyabrın 10-nun Azərbaycanda Zəfər günü kimi təntənəli şəkildə qeyd edilməsi rəsmiləşdirilsə də, həmin gün Türkiyədə Mustafa Kamal Atatürkün anım günü olduğunu nəzərə alaraq, Prezident İlham Əliyev Zəfər gününün tarixinin dəyişdirilməsi barədə qərar qəbul edib. Şuşa şəhərinin və onun işğaldan azad edilməsinin tarixi əhəmiyyəti nəzərə alınaraq, Zəfər günü hər il noyabrın 8-də təntənəli şəkildə qeyd ediləcək.

Maraqlıdır, həmin gün ölkədə iş günü olacaq, yoxsa qeyri-iş günü?

  • Musa Qasımlı: “...birliyimizi daha da artıran, möhkəmləndirən vasitələrdən biri olacaq”

Milli Məclisin deputatı, professor Musa Qasımlı “Bakı-Xəbər”ə açıqlamasında qeyd etdi ki, Azərbaycan Respublikası Silahlı Qüvvələrinin Ali Baş Komandanı, Prezident İlham Əliyevin rəhbərliyi altında şanlı ordumuzun  noyabrın 8-də Şuşa şəhərini  təcavüzkar Ermənistanın işğalından böyük şücaətlə azad etməsi hərb, diplomatiya və siyasət tariximizin ən parlaq səhifələrindən biridir. Müzəffər Azərbaycan  Ordusu Şuşa şəhərini işğalçılardan azad edərək mümkün olmayanı mümkün etməklə hərb tariximizə qızıl səhifə yazdı: “Cənab Prezidentin 8 noyabr tarixinin Zəfər günü kimi bayram edilməsinə dair imzaladığı Sərəncam böyük əhəmiyyət daşıyır. Bundan sonra hər il ölkəmizdə Zəfər gününün coşqu ilə qeyd edilməsi millətimizin hərbi vətənpərvərlik, torpaq, vətən, dövlət sevgisi hisslərini və birliyimizi daha da artıran, möhkəmləndirən vasitələrdən biri olacaq. Zəfər günümüz mübarək olsun!"

  • Malik Həsənov: “Zəfər günü ölkədə vətənpərvərlik bayramı olduğu üçün...”

Millət vəkili Malik Həsənov qeyd etdi ki, 44 gün davam edən Vətən müharibəsi Azərbaycanın hansı imkanlara malik olduğunu bir daha dünyaya nümayiş etdirdi. Azərbaycan dünyaya göstərdi ki, böyük, yenilməz xalqdır. Artıq inkişaf, təhlükəsizlik, tərəqqi dövrünə qədəm qoymuşuq: “Dövlət başçısı İlham Əliyev 1 dekabrda Laçının işğaldan azad olunması münasibətilə xalqa müraciətində bu əminliyi ifadə edib ki,  Azərbaycan xalqı bu dövrdə də birlik, həmrəylik, güclü iradə göstərəcək, dağıdılmış şəhərləri, kəndləri bərpa etmək üçün əlindən gələni edəcək. Artıq  istədiyimizə nail olmuşuq və bundan sonra xalqımızı təhlükəsiz və xoşbəxt həyat gözləyir.

Sentyabrın 27-dən başlanan İkinci Qarabağ müharibəsində 5 şəhərimizi Azərbaycan Ordusunun gücü, qüdrəti sayəsində işğaldan azad etdik, üç rayonu isə düşməni məcbur edərək qaytardıq. Haqq-ədalət bərpa edildi, ərazi bütövlüyümüz təmin olundu, BMT Təhlükəsizlik Şurasının qətnamələri icra edildi. Bu gün böyük fəxr hissi ilə qeyd edirik ki, artıq torpaqlarımızın işğal günlərini deyil, işğaldan azad edildikləri tarixləri qeyd edəcəyik. Yeganə problemimiz olan  Dağlıq Qarabağ münaqişəsi ədalətli həllini tapdı. Artıq “Dağlıq Qarabağ münaqişəsi” termini arxada qalıb. Cənab İlham Əliyevin qətiyyəti sayəsində çoxəsrlik tariximizin Zəfər günü yazıldı. Azərbaycan xalqının əzmi və iradəsi, iqtisadi gücü, müasir ordu quruculuğu və xalq-iqtidar birliyi ölkəmizin qələbəsini təmin edən mühüm amillər oldu. Ulu əcdadlarımızın zəngin dövlətçilik və hərb tarixindən ilhamlanan Azərbaycan xalqı daha bir şanlı qəhrəmanlıq salnaməsi yazaraq, özünün qalib xalq olduğunu bütün dünyaya sübut etdi, düşmən üzərində tarixi zəfər çaldı. Onu da qeyd edim ki, Zəfər günü iş günü hesab edilməyəcək”.

M.Həsənov onu da əlavə etdi ki, Azərbaycan hər zaman mübariz oğul və qızlarının şücaətini yüksək qiymətləndirir, bütün şəhidlərimizin ruhuna ehtiram göstərir, xatirəsini uca tutur.

  • Əliməmməd Nuriyev: “...qeyri-iş günü olacaq”

Konstitusiya Araşdırmaları Fondunun rəhbəri Əliməmməd Nuriyev bizimlə söhbətində qeyd etdi ki, 8 Noyabr Zəfər günü kimi təqvimə salındığı üçün ölkədə qeyri-iş günü olacaq. 27 sentyabr Anım günü olduğu üçün həmin gün də qeyri-iş günü olacaq.

Günel CƏLİLOVA

Son xəbərlər