Son günlər ölkəmizdə COVID-19-a yoluxanların sayı artmaqda davam edir. Yaranmış vəziyyət vətəndaşları ciddi şəkildə narahat edir və bir çoxu özündə virusun hər hansı simptomunu hiss etməsə də, koronavirus testindən keçmək istəyir. Lakin koronavirus testinin qiymətinin baha olması ilə bağlı şikayət edənlər də var.
Onu da qeyd edək ki, koronavirus testi dövlət hesabına alındığı halda, özəl müəssisələrdə bu xidmət pulla təklif olunur.
Virusun aşkarlanması üçün testlər həm yaxma nümunəsi götürülməklə, həm də qan analizi vasitəsilə aparılır. Bu klinikalarda test qanvermə üsulu ilə aparılırsa, 40-110 manat, yaxma ilə aparılırsa, 100-130 manata başa gəlir.
“…bu testlər nəyə görə pullu olmalıdır?”
Onu da əlavə edək ki, koronavirus testlərinin aparıldığı özəl klinikalarda qiymətlər həmin klinikalar tərəfindən təyin olunur. Çünki özəl laboratoriyalar istədiyi qiyməti müəyyən edə bilər. Azərbaycan Tibb Universitetinin Farmakologiya kafedrasının müdiri Musa Qəniyev bildirdi ki, kütləvi şəkildə PZR və seroloğı testlər aparılmalıdır. Bu testlər bütün ölkə ərazisini, xüsusən risq qrupundan olan bütün insanları əhatə etməlidir: “Hesab edirəm ki, testlərin aparılmasına bütün dövlət və özəl tibb müəssisələri cəlb olunmalıdır. Həmçinin, bu testlər mütləq şəkildə məcburi, təmənnasız və ödənişsiz olmalıdır”.
Həmsöhbətimiz onu da əlavə etdi ki, özünü yaxşı hiss etməyən, koronavirusun əlamətlərini hiss edən şəxs test vermək istəyir. Lakin özəl xəstəxanalarda testin qiyməti bahadır: “Maraqlıdır, koronavirus testi dövlət hesabına alındığı halda, özəl müəssisələrdə bu testlər nəyə görə pullu olmalıdır? Özəl klinikalar qazanc əldə etmək istəyirlərsə, testin qiymətini hər kəs üçün əlçatan etməlidirlər”.
Günel CƏLİLOVA
