Azərbaycanda koronavirusa yoluxanların sayı artmaqda davam edir. Vəziyyət hər keçən gün daha da pisləşir. Məlumat üçün bildirək ki, 1 dekabr tarixində ölkədə 4426, səhərisi gün isə 3942 koronavirusa yoluxma qeydə alınıb.
Son bir ay ərzində koronavirus infeksiyasına yoluxma sürətlə artır. Təəssüf ki, qeyd olunan virusdan vəfat edənlərin sayı da hər gün artır. Azərbaycanda yay ayları ilə müqayisədə gündəlik ölüm halları da 4 dəfəyə qədər artıb. Gündəlik yoluxma hallarının artması, təbii olaraq, gündəlik ölüm hallarının yüksəlməsi ilə nəticələnir. Ölüm hallarının qarşısını almaq üçün gündəlik yoluxma hallarının sayının azalması mütləq şərtdir. Vəziyyətin təhlili göstərir ki, son 10-14 gündə ölkəmizdə aktiv xəstələrin sayı iki dəfə artaraq 45 000 nəfəri ötüb. Əgər dekabr ayının ilk 10 günlüyündə xəstəliyin artım sürəti dəyişməsə, aktiv xəstələrin sayı 90.000 nəfərə çatacaq. Bu isə milli səhiyyə sisteminin imkanlarından yuxarıdır.
Bu səbəbdən də sərt karantin rejiminin tətbiq olunması gündəmdədir. Ayrı-ayrı ölkələrin təcrübəsi göstərir ki, xəstəliyin qarşısını almaq üçün hökumətlər sərt məhdudiyyətlər tətbiq etmək məcburiyyətində qalırlar. Əlbəttə, bu, iqtisadi duruma, əhalinin maddi vəziyyətinə mənfi təsir göstərsə də, insanların həyatının və təhlükəsizliyinin qorunması üçün olduqca zəruri addımdır.
Dekabrın 2-də keçirilən brifinqdə iştirak edən Vəli Axundov adına Elmi-Tədqiqat Tibbi Profilaktika İnstitutunun direktoru, professor Adil Allahverdiyev çıxış edərək bildirib ki, ciddi qərarların qəbuluna ehtiyac var: “Nə qədər sərt tədbirlər görsək, nəticə əldə ediləcək. Azərbaycanda mütləq sərt tədbirlərə əl atmalıyıq. Bu olmazsa, xəstəxanalarda yer qalmayacaq. Türkiyə kimi səhiyyəsi güclü ölkədə artıq xəstələri yerləşdirməyə yer tapılmır. Sərt tədbirlər tətbiq edilmədən Azərbaycanda da nəticə belə olacaq. Sərt tədbirlər tətbiq ediləndən sonra virusu kontrol altına almaq lazımdır. Elə məqam gəlib çatıb ki, sərt addımlar atılmalıdır. Belə olmasa, koronavirus ilə bağlı çətin vəziyyət yaranacaq. Heç olmasa 2 həftəlik bir mərhələ olmalıdır. Dünyanın bütün ölkələrində sərtləşdirmə baş verir. Bu gün koronavirusa yoluxma sayının nəzarətə götürülməsi üçün əlavə tədbirlərə ehtiyac var”.
Musa Quliyev: “SMS icazə sisteminə qayıtmalıyıq və çalışmalıyıq ki, küçədə, ictimai yerlərdə insanların sayı az olsun”
Ekspertlər də hazırkı şəraitdə karantin rejiminin sərtləşdirilməsinin tərəfdarıdırlar.
Millət vəkili Musa Quliyev qeyd etdi ki, mütləq sərtləşdirilməyə gedilməlidir: “Rəqəmlər çox yüksəkdir, biz yaz aylarında gündəlik yoluxma sayı 500-600 olanda həyəcan keçirir və çox güclü tədbirlər görürdük. İndi də payız-qış mövsümü ilə bağlı yoluxma hallarının artması, həmçinin, müharibədən dönən qazilərimizin, şəhid olan övladlarımızın qarşılanma mərasimlərində insan sıxlığının müşahidə olunması müəyyən artımlara səbəb olur və bu davam edəcək. Hesab edirəm ki, biz ən azı hər həftənin 4 gününü sərt karantinə keçməliyik. Lazım olarsa, SMS icazə sisteminə qayıtmalıyıq və çalışmalıyıq ki, küçədə, ictimai yerlərdə insanların sayı az olsun. Müəyyən şərtlər var, karantin müddətini də çox etmək olmaz, insanlar sosial -psixoloji gərginlik keçirirlər. Ancaq, istənilən halda, sərt tədbirlərə əl atmasaq, artıq bütün palatalar dolduğu kimi, tibbi personalın çatışmazlığı da müşahidə olunacaq. Evlərdə müalicələrin də effektiv olduğunu demək olmaz, çünki insanların bir çoxu dərmanları tapa bilmirlər. Bu mənada çalışmalıyıq ki, yoluxma hallarının qarşısını alan tədbirlərə gedək. Nə qədər ki, peyvənd tapılmayıb və kütləvi peyvəndləşməyə gedilməyib, yoluxmanı karantin yolu ilə azaltmağa çalışmalıyıq. Bu, sadəcə, mənim fikrim deyil, tibb sahəsində hansı mütəxəssisdən soruşsanız, sərtləşdirilmiş rejimin vacib olduğunu deyəcək. Rayonlararası əlaqələri bir qədər məhdudlaşdırmalıyıq, gediş-gəlişi azaltmalıyıq. Təkcə maarifləndirmə tədbirləri ilə nəticə almaq olmur. Hamı bilir ki, virus var, təhlükəlidir, ancaq heç də hamı adekvat davranmır”.
Polina Əliyeva: “Bu vəziyyətdən çıxış yolu sərtləşdirilmiş karantin rejimi dövründə Azərbaycanda qüvvədə olan bütün məhdudiyyətlərin geri qaytarılmasıdır”
Həkim-reanimatoloq Polina Əliyeva bildirdi ki, Azərbaycanda səhiyyə sistemi tamamilə yüklənib: “Həkimlər çox çalışırlar. İnfeksiyanın belə bir sürətlə yayılması həkimlərin insanların yardımına vaxtında yetişə bilməməsinə, nəticədə onların ölümünə səbəb ola bilər. Bu vəziyyətdən çıxış yolu sərtləşdirilmiş karantin rejimi dövründə Azərbaycanda qüvvədə olan bütün məhdudiyyətlərin geri qaytarılmasıdır”.
Günel CƏLİLOVA
