...Amalya Ana, demək olar ki, hər gün səhər və axşam evlərinin yaxınlığındakı qəbiristanlıqdakı oğlunun qəbrini ziyarət edir. Əvvəlcə, təzə-tər gül dəstəsini qəbrinin üstünə səpələyir və sonra isə baş daşını sığıallaya-sığallaya, qara torpaqla örtülmüş qəbrini qucaqlayaraq hönkür-hönkür ağlayır və ürəyini boşaldır.
Və deyir: “Kim qıydı sənə, o mənfur düşmənmi, artıq başları əzilmiş ermənimi? Rahat uyu, şəhid oğlum, sənin, sənin kimi yüzlərlə şəhid balamızın qanı yerdə qalmadı. Sənin kimi Şahin – igid döyüşçülərimiz sizə namərdcəsinə atəş açanları məhv ediblər. Sizin, şəhidlərimizin qisasını alıblar və alacaqlar. Rahat ol oğlum, mənim, hamımızın fəxri, Vətənin xilaskarı Şahin! Sən tək deyilsən oğlum, həmişə yanındayıq...”
Bəli, bu bir şəhid anasının fəryadıdır. Dünyaya mərd, vətənpərvər oğul gətirmiş, ürəyinin oduyla, gözünün nuruyla, min bir əzab-əziyyətlə böyüdən Amalya ananın...
İndi, cəmi 19 il yaşamış – Şahin Ziyad oğlu İsgəndərov – təkcə Zaqatalanın deyil, bütöv Azərbaycanımızın fəxridir, xilaskar və qəhrəmanıdır.
Vətən yolunda canını fəda edən, şəhidlik zirvəsini fəth edən, Şahin öz ömrünü rəşadətlə, fəxarətlə yaşadı, öz mərdliyi, şücaəti ilə valideylərinin, nəslinin, elinin-obasının, qızılgüllər diyarı, igidlər məkanı Zaqatalanın adını uca etdi. O, bir qəhrəmanlıq simvolu kimi gənclərə, gələcək Vətən keşikçilərinə bariz nümunə oldu.
İkinci Vətən müharibəsinin qəhrəmanı Şahin Ziyad oğlu İsgəndərov Zaqatala rayonunun Qandax kəndində 2001–ci ilin 21 avqust tarixində, sadə, zəhmətsevər bir ailədə dünyaya göz açıb. Ailədə iki qardaş olublar. Atası Ziyad və Anası Amaliya xanımın hər iki övladı, yaşadıqları kənddə çox mülayim xasiyyətli, sakit təbiətli və işgüzar, üstün tərbiyəli gənclər kimi tanınıblar. Valideynləri isə onlara uşaq yaşlarından vətənpərvərlik ruhunu aşılayıblar.
Haqqında söhbət açdığımız, haqq dünyasına qovuşmuş, Şahin İsgəndrov Şəhid Vasif Saatov adına Qandax kənd tam orta məktəbini 2019 –cu ilin iyun ayında bitirib. Hər dəfə şəhid ailəsinə baş çəkəndə nə qədər qürurlu olsada, şəhidin valideynlərinə, yaxın qohum - əqrabasına, əzizlərinə və dostlarına ruhu şad olsun, Allah rəhmət eləsin, desək də, onlara təskinlik versək də, səbr, can-sağlığı arzulasaq da, Vallah azdır.
Etiraf etməliyəm ki, Vətənimizin, torpaqlarımızın işğaldan azadlığı uğrunda həlak olan bir gəncin valideynlərini danışdırmaq mənə çox ağır gəlir. Axı, onların hansı psixoloji durumda olduqlarını çox yaxşı anlayıram...
Qəhrəman Şahin İsgəndərovun atası elə bil məni hiss etmişdi: “Oğlum məktəb yaşlarından idmana, hərbiyə meylli idi. O, həmişə hərbi formadakıları görəndə sakitcə, çox maraqla baxardı. Qarabağdan, işğal altında olan torpaqlardan danışanda çox-çox fikirləşər, xəyallara dalardı. Bu günlər artıq oğlumun həmin xəyalları gerçəkləşib. 2019–cu ilin 24 oktyabr tarixində oğlum Şahini həqiqi hərbi xidmətə yola saldıq. Əvvəlcə Müdafiə Nazirliyinin Ağcabədidə yerləşən “N” saylı hərbi hissəsində xidmətə başladı. O, hərbi and içdikdən sonra hərbi xidmətini Cəlilibad rayonunun Göytəpə qəsəbəsində Xüsusi Təyinatlıların Dəstəsində hərbi xidmətini davam etdirmiş və eyni zamanda mütəmadi hərbi təlimlərdə iştirak etmişdi. Oğlumuzla tez-tez telefonla əlaqə saxlayırdıq və vaxtaşırı onunla görüşə gedirdik. Biz Şahinin hərbi andiçmə mərasimində iştirak etdikdən sonra Cəlilabad rayonunda xidmət edərkən də 3 dəfə oğlumuzla görüşmüşdük. Narahatçılıq yox idi, oğlumuz tamamilə dəyişilmişdi. Elə bil böyümüşdü, vətənpərvərlik hissiyyatı daha da artmışdı, əsil hərbiçiyə xas xüsusiyyətlərə malik olmuşdu, düşməndən qisas almaq istəyi daha da artmışdı. Oğlum o vaxtdan müharibəyə hazırlaşdıqlarını bilirdi, ancaq bizə heç bir məlumat vermirdi...
Atasının söylədiyinə görə, Şahin hərbi xidmətini nümunəvi keçirdiyindən xidmətə görə, hərbi təlimlətdə fəal iştirak etdiyinə görə dəfələrlə komandirləri tərəfindən təşəkkürlər bildirilmişdir...
Şəhid anası Amalya xanım isə gözlərinin yaşını silə-silə şəhid oğlunun iri portretini əli ilə sığallaya-sığallaya dedi: “Onunla sonuncu görüşə gedəndə Şahini tanımadım. Böyümüşdü, hərbi forma elə gözəl yaraşırdı ki, oğluma. Oğlum deyirdi ki: “Ana düşmənin başını əzib evə dönəcəyik, mənə bir gözəl, ailəmizə uyğun kənd qızını gözaltı et. Allahın köməyilə hərbi xidməti başa vurandan sonra, kəndə dönəndə bir şənlik qurarıq...” Mən də Şahin balama dedim ki, “Vətənimizə göz dikəni əz oğlum, Dost kimdir, düşmən kimdir bil oğlum, adını şərəfinlə tariximizlə yaz oğlum”. Sanki Şahin balam mənim nəsihətlərimə qulaq asdı. Sanki, Şahin oğlumuz, Şahin kimi düşmənin üstünə şığıdı, onun başını əzdi, məhf etdi, yaralı döyüşçülərimizi xilas etdi, özü isə...
Amalya xanım göz yaşlarını boğa bilmədi, söhbətini yarımçıq qoydu... Əslində isə o, artıq fikrini tamamlamışdı. Oğlu əsil qəhrəmanlıq nümunəsi göstərərək, şəhidlik zirvəsini fəth etmişdi...
Atası qeyd etdi ki, müharibə başlamazdan bir ay əvvəl, oğlu ilə telefon əlaqəsi yaratmışdılar. Şahin həmin vaxt hər şeyin yaxşı olduğunu bildirmişdir. Sonradan onlara (yəni, valideynlərinə) məlum olub ki, oğlu da digər hərbiçilərlə birlikdə İsmayıllı və Qusar rayonlarında hərbi təlimlərdə iştirak etdikdən sonra Beyləqan rayonuna gediblər...
Şahinin əmisi Zöhrab İsgəndərov isə söhbət zamanı vurğuladı ki: “Qardaşı oğlunun xidmətdə olduğu Xüsusi Təyantlıların taboru həmişə döyüş əməliyyatlarında birinci olublar”. Sentyabrın 27–də ermənilərin təxribat hücumundan sonra Şahingil əvvəlcə Ağdam, Ağdərə, sonra isə Cəbrayıl-Fizuli istiqamətində döyüş əməliyyatlarına başlayıblar. Elə ilk döyülərdə onlar düşmənin xeyli sayda canlı qüvvəsini, texnikasını məhv edib. Komandirin söylədiyinə görə Cəbrayıl və Fizuli rayonlarının işğaldan azad edilməsində xüsusi şücaət göstəriblər. Şahin birinci döyüş əməliyyatlarından sonra valideynləri ilə əlaqə saxlayıb. Qardaşımın oğlu özünün və hərbiçi yoldaşlarının yaxşı olduqlarının bildirib. Valideynlərinin narahat olmamalarını təsəlli verərək, tezliklə qələbə sevincləri ilə doğma kəndinə dönəcəyini bildirib. Sonra bizə məlum oldu ki, Şahinin olduğu Xüsusi Təyinatlılardan ibarət taboru Hadrut-Ağdərə-Xocavənd-Ağdam istiqamətində gedən qızğın döyüşlərin önündə gedirdilər...
Şəhidin əmisi qeyd etdi ki,hətta Şahin mərd döyüşçülərlə birlikdə Hadrut rayonunun Tuğ kəndinin, Tərtər rayonunun Talış kəndinin, Suqovuşan qəsəbəsinin işğaldan azad olunmasında da şücaət göstərib. Şanlı ordumuzun qəhrəman, cəsur əsgəri olan Şahin İsgəndərov son döyüşdə əsil vətənpərvər kimi hünər göstərdi. Oktyabr ayının 9-10 tarixlərində Xocavənd-Ağdərənin –Xocavənd-Ağərə-Ağdam rayonlarının işğaldan azad edilməsində gedən ölüm-dirim mübarizəsində Şahin digər döyüşçü hərbiçilərlə birlikdə qəhrəmanlıq nümunəsini göstəriblər. düşmənin xeyli sayda canlı qüvvəsi ilə üz-üzə qalan igid döyüşçü həmin döyüşdə düşmənin 40-45 sayda canlı qüvvəsini məhv etmişdi.
Atası Ziyadın söylədiyinə görə, komandirin rayon rəhbərliyinə təqdim etdiyi təqdimatda göstərilib ki, Milli Ordumuzun hərbi qulluqçusu Şahin Ziyad oğlu İsgəndərov oktyabrın 10 –da cəbhədə gedən şiddətli döyüşdə əsil qəhrəman kimi vuruşaraq, düşmənə güclü müqavimət göstərərək, pulemyot silahla düşmənin xeyli sayda canlı qüvvəsini və texnikasını məhv etmişdi. O, ağır yaralansa da digər yaralı hərbiçilərimizi döyüş meydanından çıxartmışdır. O, hətta ağır yaralı döyüşçülərimizin göstərərək, erməni işğalçılarına qarşı son nəfəsinədək döyüşmüşdür...
Qeyd edək ki, Azərbaycanımızın Xüsusi Təyinatlıların cəngavər oğlu Şahin, hərbi andına sadiq qalaraq Vətənimizin azadlığı uğrunda həlak oldu. Zaqatalanın Qandax kəndinə, üç rəngli bayrağımızın müşayiəti ilə, şəhid kimi fəxrlə, şərəflə qayıtdı... Və, 11 oktyabr 2020 –ci il tarixdə izdihamın müşayiəti ilə Şahin Ziyad oğlu İsgəndərov evlərinin yaxınlığındakı qəbristanlıqda son mənzilə yola salındı – Allahın dərgahına qovuşdu...
Başınızı dik tutun, qürurula gəzin!
Siz qəhrəman atasısınız – Ziyad Ata, qəhrəman, cəsur övladın Anasısınız – Amalya Ana!
Sən – adını fəxrlə çəkdikləri şəhid qardaşısan – Kənan!
Düşmənin üstünə Şahin kimi şığıyan igid Şahin – Azərbaycan xalqının oğludur – Ruhun Şad Olsun...!
Elman MALIYEV Azərbaycan Jurnalistlər Birliyinin üzvü
