Müharibədən sonra Azərbaycanın sosial müdafiə paketində müsbət genişlənmə - 210 manatdan 300-dək yeni təqaüdlər...

Mayis Əliyev: “Qələbəyə payını vermiş hər bir azərbaycanlı mütləq təltif edilməlidir”

img

Azərbaycanın bütövlüyü uğrunda şəhid olanların ailələrinə və qazi statusu almış hərbçilər üçün maddi və psixoloji güzəştlər nəzərdə tutulub. Bu yardım təqaüd şəklində həyata keçiriləcək.

Belə ki, şəhid ailəsi üçün təqaüdlərin məbləği 300 manat, müharibə səbəbindən əlilliyi olan şəxslər üçün təqaüdlərin məbləği 1, 2 və 3-cü dərəcəyə uyğun olaraq, 250, 230 və 210 manat təşkil edir.

Eyni zamanda, Əmək və Əhalinin Sosial Müdafiəsi Nazirliyinin tərkibində psixoloji dəstək mərkəzi də fəaliyyətə başlayıb. Bu dəstək müharibə zonasındakı vətəndaşlar, müharibə iştirakçıları, şəhid ailələrinin üzvləri və yaralanmış vətəndaşlar üçün dövlət hesabına təmin ediləcək. Sosial Xidmət Agentliyi tərəfindən "Qaynar xətt" (050 406- 75- 85) yaradılıb. Psixoloji yardıma ehtiyacı olan şəxslər bu nömrəyə zəng etməklə dövlət vəsaiti hesabına həyata keçirilən dəstəkdən yararlana bilərlər.

Azərbaycanın ərazi bütövlüyü, müstəqilliyi və Konstitusiya quruluşunun müdafiəsi uğrunda döyüşlərdə əlil olmuş vətəndaşların və şəhidlərin ailələrinin sosial müdafiəsinin gücləndirilməsi ölkəmizdə dövlət başçısı tərəfindən həyata keçirilən sosial siyasətin əsas istiqamətlərindəndir. Prezident İlham Əliyevin əhalinin sosial problemlərinin həllinə xüsusi diqqət və qayğı göstərməsi digər sosial qruplar kimi, əlillərin və şəhid ailələrinin də həyat şəraitinin yaxşılaşmasına, onların ictimai hüquqlarının bərpa olunmasına şərait yaradıb.

  • “…şəhidlərin ailələrinə, həmçinin, müharibə əlillərinə dövlət tərəfindən böyük diqqət və qayğı göstərilir”

Sosial sahə üzrə ekspert Mayis Əliyev qeyd etdi ki, Azərbaycanın ərazi bütövlüyü uğrunda öz canından keçmiş şəhidlərin ailələrinə, həmçinin, müharibə əlillərinə dövlət tərəfindən böyük diqqət və qayğı göstərilir: “Şəhid hərbi qulluqçuların ailələrinə 11 min manat birdəfəlik ödəmənin verilməsini nəzərdə tutan məlum fərman həmin ailələrin sosial müdafiəsinin yaxşılaşdırılması istiqamətində atılan ən mühüm, ölkə vətəndaşlarının rifahının yüksəldilməsinə yönələn ən humanist addımlardan biri kimi qəbul edilməlidir. Bununla yanaşı, qazi və şəhid ailələrinə təqaüdün ayrılması həmin ailələrin sosial müdafiəsinin güclənməsinə səbəb olacaq.

Danılmaz faktdır ki, bugünkü hərbi qələbənin sevincini yaşamağa görə qəhrəman qazilərimizə, zabitlərimizə, şəhidlərimizə borcluyuq”.

Həmsöhbətimiz onu da əlavə etdi ki, Vətən müharibəsi müstəsna uğurlarla yadda qaldı, cinayət törədən hər bir erməni cəzalandırılmalı, bu qələbəyə payını vermiş hər bir azərbaycanlı isə mütləq təltif edilməlidir.

Günel CƏLİLOVA

Son xəbərlər