Yas mərasimlərində karantin pozuntularının yeni formaları kəşf edilir - evlərdə, kiçik otaqlarda...

Qiymət Məhərrəmli: “Virusun geniş yayılmasında başlıca rolu evlərdə, kiçik otaqlarda keçirilən yas mərasimləri oynayır”

img

Ölkəmizdə mövcud olan karantin qaydaları ilə əlaqədar olaraq yas mərasimlərinin kütləvi keçirilməsi qadağan edilib. Pandemiyanın yayılması baxımından böyük risq mənbəyi olan xeyir-şər evləri fəaliyyət göstərmir. Pandemiyaya qədər xeyir-şər evlərində, eləcə də yas çadırlarında yas mərasimləri keçirən insanlar artıq bu vasitələrdən istifadə edə bilmirlər.

 

Bilirik ki, COVID-19 virusuna yoluxma halları ən çox yas məclislərində baş verir. Yas məclislərinin aşkar virus mənbəyi olduğu məlumdur. Ancaq vətəndaşlarımız bütün mümkün variantlardan istifadə edərək karantin qaydalarını çox kobud şəkildə pozurlar. İndi bəzi vətəndaşlarımız yeni yas keçirmə üsulları “icad” ediblər. Belə ki, indi insanlarımız xeyir-şər evlərində, yas çadırlarında keçirdikləri mərasimləri evlərinə, kiçik otaqlarına daşıyır və evlərində kütləvi yas mərasimləri təşkil edirlər. Əlbəttə, bu həm böyük qanun pozuntusudur, həm də insanların özlərinin və başqalarının həyatına, sağlamlığına dəyər verməməsinin göstəricisidir. Təsəvvür edin ki, bir kiçik otaqda bəzən 25-30 nəfəri yerləşdirirlər, yasa gələn insanlar arasında yaxın təmaslar baş verir, bu da yoluxma risqini birəbeş artırır.

 

Bilirik ki, dəfələrlə əlaqədar qurumlar gizlin yas mərasimləri keçirilən evlərdə reydlər keçiriblər və qanunu pozanları məsuliyyətə cəlb ediblər, lakin, göründüyü kimi, bu hal başqalarına dərs olmur.

  • “...virusun həlqəsini genişləndirir”

Filologiya üzrə fəlsəfə doktoru Qiymət Məhərrəmli vətəndaşlarımızın yas mərasimlərini evlərinə daşımasından təəssüf hissi keçirdiyini bildirir. Ekspert qeyd edir ki, insanlar bilə-bilə özlərinin və başqalarının həyatını təhlükəyə atırlar. “Yas məclisləri pandemiya risqini atrırdığı üçün onların kütləvi keçirilməsi rəsmən qadağan edilib. Hər bir vətəndaşımız dövlətin mövcud qaydalarına riayət etməlidir. Amma çox təəssüf ki, biz bunu çox zaman görə bilmirik. Vətəndaşlarımızın gizlin şəkildə evlərində təşkil etdikləri yas mərasimləri çox acı nəticələrə səbəb olur, virusun həlqəsini genişləndirir. Bir yas mərasimində bəzən 50-60 adam iştirak edir və hər biri də real virus daşıyıcısına çevrilir. Yas məclislərinin çadırlardan, xeyir-şər evlərindən evlərə, kiçik otaqlara daşınması virusun böyük sürətlə yayılmasına şərait yaradır. Bol ehsan verilən bu məclislərə gələn adamlar da bir-birilə görüşüb öpüşür, yaxın əyləşib söhbət edirlər. Otaq dar, adam çox, görün indi bu vəziyyətdə nə baş verir. Dünyadan köçən hər bir insanın ruhuna, xatirəsinə böyük ehtiramımız var. Amma yas sahibləri anlamalıdırlar ki, kiçik bir otağa 20-30, 40-50 adamı toplamaq hansı faciələrə səbəb olur. Bizdə belə bir xarakter var, insanları yasa zorla cəlb edirik, gəlməyəndən inciyib küsürük ki, niyə mənim ölümü saymadın, niyə mənim evimə gəlmədin. Ayaqüstü başsağlı vermək üçün evlərə gedən adamları da zorla, güclə, and verməklə ehsan süfrəsinə əyləşdirirlər. Belə olmaz. Yas məclislərinin kütləvi qadağan edilməsi bizim xeyrimizədir, dövlət bunu bizi virusa yoluxmadan qorumaq üçün edir, gəlin biz də bu qaydalara əməl edək”.

Q.Məhərrəmlinin sözlərinə görə, son günlər virusa yoluxanların sayının az qala 4 min nəfərə çatması böyük fəlakətdir, özü də bu fəlakət vətəndaş məsuliyyətsizliyinin yaratdığı xoşagəlməzlikdir: “Vətəndaş məsuliyyətsizliyi nəticəsində virusa yoluxanların sayı durmadan artır. Dediyimiz kimi, virusun geniş yayılmasında başlıca rolu evlərdə, kiçik otaqlarda keçirilən yas mərasimləri oynayır. Məsuliyyətsizliyə son qoyulmalıdır ki, virusa yoluxmanın səviyyəsi aşağı düşsün”.

İradə SARIYEVA

Son xəbərlər