Prezident İlham Əliyevin tapşırığına əsasən, Əmək və Əhalinin Sosial Müdafiəsi Nazirliyi tərəfindən Vətən müharibəsində şəhid olan şəxslərin ailələri, müharibə əlilləri və digər iştirakçılar üçün geniş sosial dəstəklə bağlı tədbirlər planı hazırlanıb.
Nazirlikdən bildirilib ki, plan işğaldan azad edilmiş ərazilərin, döyüş zonasına yaxın olmuş bölgələrin sakinlərini, erməni terrorundan zərər çəkmiş şəxsləri də əhatə edir. Qeyd edilib ki, tədbirlər planı Vətən müharibəsində şəhid olan qəhrəmanlarımızın ailələrini, müharibə əlilləri və digər iştirakçıları geniş sosial dəstək tədbirləri ilə əhatə edəcək. Həmin tədbirlər çərçivəsində onların məşğulluq imkanlarının da artırılması təmin olunacaq.
Plan işğaldan azad edilmiş ərazilərin, döyüş zonasına yaxın olmuş bölgələrin sakinlərini, erməni terrorundan zərər çəkmiş şəxsləri də əhatə edir. Şəhid ailələri, müharibə əlilləri və iştirakçılarının özünüməşğulluq proqramına qısa zamanda növbədənkənar cəlb edilməsi, onların istehsal-xidmət və kənd təsərrüfatı sahələri üzrə mal və materiallarla, avadanlıqlarla təmin edilməklə kiçik bizneslərinin yaradılması nəzərdə tutulub. Həmçinin, döyüş zonasına yaxın olmuş bölgələrdə özünüməşğulluq proqramına cəlb olunan şəxslər üzrə kvotanın artırılması, proqram üzrə mal və materiallarla, avadanlıqlarla təminat işlərinin genişləndirilməsi planlaşdırılıb. Erməni terroru nəticəsində kiçik müəssisə və ailə təsərrüfatlarına ziyan dəymiş vətəndaşlara özünüməşğulluq proqramı çərçivəsində dəstək göstəriləcək. Sosial iş yerlərində əməkhaqqının birgə maliyyələşdirilməsi proqramına şəhid ailələrinin, müharibə əlilləri və iştirakçılarının növbədənkənar cəlb edilməsi, döyüş zonasına yaxın olmuş bölgələrdə bu proqram üzrə kvotaların artırılması proqramda öz əksini tapıb.
Bütövlükdə, sözügedən tədbirlər planının əhəmiyyətini ekspertlər necə dəyərləndirirlər?
“Bunun sayəsində onların istehsal-xidmət, kənd təsərrüfatı sahələri üzrə...”
Məsələyə münasibət bildirən ekspert Rəsul Cahangirlinin sözlərinə görə, belə bir tədbirlər planının qəbul dilməsi sözügedən kateqoriyadan olan şəxslərə böyük sosial dəstəkdir: “Çünki sözügedən proqram mahiyyət etibarilə çoxşaxəlidir. Orada bir sıra məsələlər öz əksini tapıb. Hesab edirəm ki, bu, sözügedən kateqoriyadan olan şəxslərin məşğulluq probleminin həllində, onların işlə təmin olunmasında mühüm rol oynayacaq. Nəzərə almaq lazıımdır ki, regionlarda işsizliklə bağlı müəyyən problemlər var, xüsusən də kəndlərdə. Rayonlarda iş tapmaqla bağlı seçim imkanları Bakı və digər böyük şəhərlərlə müqayisədə məhduddur. Elə şəhid ailələri var ki, ucqar kənddə yaşadığı üçün iş tapa bilmir. Yaxud da imkanı yoxdur ki, şəxsi təsərrüfatını genişləndirsin. Fikrimcə, sözügedən tədbirlər planı şərait yaradacaq ki, şəhid ailələri, müharibə əlilləri və iştirakçıları özünüməşğulluq proqramından istifadə etsinlər. Bunun sayəsində onların istehsal-xidmət, kənd təsərrüfatı sahələri üzrə mal və materiallarla, avadanlıqlarla təmin edilməsi asanlaşacaq. Nəticədə həmin kateqoriyadan olan şəxslərin işlə təmin edilməsi problemi həll ediləcək. Bu isə, öz növbəsində, regionlarda məşğulluğun təmin edilməsinə ümumən müsbət təkan verəcək”.
Ekspert hesab edir ki, bir sözlə, tədbirlər planı sözügedən kateqoriyadan olan şəxslər üçün yeni imkanlar açacaq.
Vidadi ORDAHALLI
