Evdən icazəsiz çıxan korona xəstələri ilə bağlı polisin sərt cavab tədbirləri məqbul sayılır

Könül İsmayılova: “Ev şəraitində müalicə təyin olunan koronaviruslu xəstələrə nəzarət gücləndirilməlidir”

img

Koronavirus pandemiyasının yarada biləcəyi təhlükənin qarşısının alınması, profilaktik və təxirəsalınmaz tədbirlərin həyata keçirilməsi məqsədilə ölkə ərazisində elan edilmiş xüsusi karantin rejimi qaydalarının müxtəlif yollarla pozulması və digər neqativ hallara qarşı daxili işlər orqanları tərəfindən ardıcıl və kəsərli mübarizə tədbirləri davam etdirilir.

Daxili işlər orqanlarının əməkdaşları tərəfindən ölkə ərazisində tətbiq olunmuş xüsusi karantin rejimi dövründə COVID-19 virusunun yayılması hallarının qarşısının alınması istiqamətində bir sıra tədbirlər həyata keçirilir, vətəndaşlar tərəfindən epidemiya əleyhinə rejimin, sanitariya-gigiyena qaydalarının pozulması hallarına yol verilməməsi ciddi nəzarətdə saxlanır.

Daxili İşlər Nazirliyinin Mətbuat xidmətinin yaydığı məlumatda qeyd olunur ki, TƏBİB-dən daxil olmuş məlumatlara dərhal reaksiya verilməklə zəruri tədbirlər görülür, COVID-19 virusuna yoluxmuş və ev şəraitində müalicə olunan şəxslərin müəyyən edilmiş qaydalara riayət etmələri, öz hərəkətləri ilə digər şəxslərin yoluxmasına təhlükə yaratmamaları diqqət mərkəzində saxlanır.

Xüsusi karantin rejimi qaydalarına zidd olaraq, COVID-19 xəstələrinə ev şəraitində müalicə təyin edilməsinə baxmayaraq, yaşayış yerlərini tərk etməsi halları müşahidə olunub. Noyabrın 22-də və 23-də polis və Daxili Qoşunların hərbi qulluqçuları tərəfindən paytaxtda 30, Gəncə, Sumqayıt, Şirvan şəhərləri, eləcə də Goranboy, Şabran, Zaqatala, Sabirabad, Biləsuvar, Quba, Qusar, Cəlilabad və Saatlı rayonlarında isə 21 aktiv COVID-19 xəstəsinin digər şəxslərin sağlamlığını təhlükə qarşısında qoyaraq sərbəst hərəkət etmələri müəyyən olunub və görülmüş tədbirlərlə həmin şəxslər dərhal təcrid ediliblər.

Qeyd edək ki, COVID-li xəstələr öz məsuliyyətlərini dərk etmədikləri üçün bu gün ölkəmizdə koronavirus sürətlə yayılır. Gündəlik yoluxma sayı artıq 3000-i keçib. Viruslu xəstələr heç nə olmamış kimi, yaşadıqları evi tərk edib, küçədə, bayırda insanlarla rahat söhbət etməklə cinayət törətmiş olurlar. Belə ki, onlar xəstəliyi bilərəkdən yaydıqları üçün qanunvericiliyin tələbinə uyğun olaraq cəzalandırılırlar.

  • “…evi tərk edən COVID-li xəstə cinayət məsuliyyətinə cəlb olunmalıdır”

Psixoloq Könül İsmayılova bildirdi ki, ev şəraitində müalicə təyin olunan koronaviruslu xəstələrə nəzarət gücləndirilməlidir: “Əvvəlki dövrdə xəstələrin böyük əksəriyyəti müalicələrini xəstəxana rejimində aldıqlarından, onlara nəzarət imkanları da geniş idi. Lakin xəstələrin evdə müalicə olunmaları onlara nəzarət imkanlarını da məhdudlaşdırmış olur. Aydın məsələdir ki, belə xəstələr xəstəliyi yüngül formada keçirdiklərindən, yaşadıqları yeri asanlıqla tərk edə, ticarət və xidmət obyektlərinə gedə, hətta işləyə də bilirlər. Bu səbəbdən də koronaviruslu xəstələrə qarşı xüsusi diqqət ayrılmalıdır. Həmin xəstələr bilməlidirlər ki, onların müalicəsi uzun deyil, bir-iki həftə çəkdiyi üçün, həm öz sağlıqları, həm də ətrafın sağlam olması üçün evdə qalmalıdırlar. Kimsə bu qaydaya riayət etməsə, o zaman həmin şəxs qanunvericiliyin tələbinə uyğun formada cəzalandırılmalıdır”.

Günel CƏLİLOVA

Son xəbərlər