Dünyada elm, texnika, səhiyyə inkişaf etdikcə, xəstəliklərin sayı da artır. Bu günümüzdə də tibb aləminin çarəsini tapmaqda aciz qaldığı xəstəliklər var. Belə xəstəliklərdən biri də bir ildir bütün dünyanı narahat edən koronavirus infeksiyasıdır. Bu xəstəliyin müalicəsi və peyvəndi tapılmadığına görə bəzi həkimlər müalicə üçün müxtəlif tərkibli antibiotikləri təklif edirlər.
Danılmaz faktdır ki, bu gün respublikamızdakı apteklərin əksəriyyətində dünyanın bir çox ölkəsindən gətirilən dərmanlar satılır. Ölkə əhalisinin müəyyən hissəsi imkansız olduğundan, bundan istifadə etmək istəyən işbazlar daha çox Şərq ölkələrindən ucuz dərmanlar idxal etməyə üstünlük verirlər. Avropa ölkələri istehsalı olan dərmanlardan bir neçə dəfə ucuz olan həmin dərmanlar isə çox vaxt heç bir müsbət təsir göstərmir.
Qeyd etdiyimiz kimi, koronavirus və digər xəstəliklərin müalicəsi üçün antibiotiklərdən istifadə olunur. Bu səbəbdən də istənilən şəxs aptekə yaxınlaşıb reseptsiz antibiotik əldə edə bilər. Halbuki, antibiotiklər reseptlə buraxılan dərmanlar sırasındadır, bu məsələ qanunvericilikdə tənzimlənir. Əfsuslar olsun ki, bu tənzimlənmə kağız üzərində qalır. Onu da vurğulayaq ki, COVID dönəmində bu problem daha da artdı.
Abdulla Şıxlinski: “Antibiotiklər istənilən başqa dərman preparatları kimi ancaq həkimlərin təyinatı və nəzarəti altında qəbul edilə bilər”
Həkim-psixiatr Abdulla Şıxlinski bildirdi ki, antibiotiklər istənilən başqa dərman preparatları kimi ancaq həkimlərin təyinatı və nəzarəti altında qəbul edilə bilər. Antibiotik ev şəraitində də qəbul edilə bilər, amma bu da həkim nəzarəti altında olmalıdır: “Əks təqdirdə antibiotiklərin müxtəlif fəsadları ola bilər. Bəzən həkim nəzarəti olmadan qəbul edilən antibiotikin elə fəsadı olur ki, bu fəsad hər hansı bir xəstəlikdən daha ağır olur. Hətta antibiotiklərin nəzarətsiz qəbulunda ölüm halları da baş verir. Antibiotiklər apteklərdə reseptsiz satıla bilər. Amma insanların özünün dərrakəsi olmalıdır ki, antibiotik dərman preparatıdır və söhbət dərmandan gedirsə, onu həkim təyin etməlidir. Antibiotiklərin reseptsiz satılması sərbəstlik demək deyil. Bunu insanlar başa düşməlidirlər”.
Rasif Bağırov: “…yalnız reseptlə satılmalıdır”
Həkim-ekspert Rasif Bağırov bildirdi ki, koronavirusla mübarizədə antibiotikdən istifadənin önəmi yoxdur: “Antibiotikdən paralel olaraq bakterial infeksiyalara qarşı istifadə olunur. Birmənalı olaraq deyirəm, antibiotik virusa təsir etmir. Antibiotik konkret olaraq bakteriya, göbələk kimi hüceyrəli orqanizmlər və onların içərisində olan ayrı-ayrı növlər üçün təsirlidir. Virusun antibiotikə qarşı həssaslığı yoxdur. Virus hüceyrə daxilində yaşayır, antibiotik ya onu tanımır, ya da ona neqativ təsir edə bilmir. Virusa qarşı antibiotik istifadəsinin önəmi yoxdur. Virusun müalicəsində patogenetik faktorlara fikir vermək lazımdır. Yəni virus insan orqanizminə daxil olduqdan sonra hansı dəyişikliklər törədirsə, onu əngəlləmək gərəkdir. Əsas virusun bədəndə xəstəlik törətməsinin mexanizmlərini əngəlləyəcək istiqamətdə müalicə tələb olunur”.
Həmsöhbətimiz onu da əlavə etdi ki, bu gün istənilən şəxs reseptsiz aptekdən abtibiotik ala bilər. Bu düzgün deyil. Antibiotik də, digər dərmanlar kimi, yalnız reseptlə satılmalıdır.
Günel CƏLİLOVA
