İnsanların sıx toplaşdığı yerlərdə, bankomat önündə, növbə sıralarında açıq havada maskanı çıxarıb siqaret çəkmək, su içmək, qida qəbul etmək olmaz. Bu, Daxili İşlər Nazirliyinin açıq havada maskanı çıxarıb siqaret çəkən şəxslərin cərimələnməsi ilə bağlı yaydığı açıqlamada qeyd olunub.
“Amma parklarda, insanların sıx toplaşmadığı yerlərdə siqaret çəkmək, su içmək, qida qəbul etmək qadağan deyil. Vətəndaşlar yalnız məcburiyyət qarşısında qaldıqda bunlardan istifadə edə bilərlər. Su içdikdən, qida qəbul etdikdən sonra dərhal maska burun və ağzı bağlamaqla taxılmalıdır. Lakin insanlara tövsiyə olunur ki, siqareti daha çox siqaret çəkmək üçün müəyyənləşdirilmiş yerlərdə çəksinlər. Küçədə, parkda insanlardan kənarda siqaret çəkənlər cərimə olunmur. Sadəcə, öncədən yayılan məlumatlar koronavirus pandemiyasının yayılmasının qarşısını almaq üçün tövsiyə xarakterli xəbərdarlıqlardır” - deyə DİN-dən bildirilib.
Qeyd edək ki, açıq havada siqaret çəkməklə qadağanın tətbiq edilməsinin əsas məqsədi pandemiya ilə mübarizədir. Bu səbəbdən də insanlar qaydalara riayət etməlidirlər. Qaydaya riayət etməyənlər isə qanunvericiliyin tələbinə uyğun olaraq cəzalanacaqlar.
“Hazırda koronavirus bütün dünyanı cənginə alıb, belə bir vaxtda adi ehtiyatsızlıq…”
Azad İstehlakçılar Birliyinin (AİB) sədri Eyyub Hüseynov bildirdi ki, rəhbərlik etdiyi qurum 20 ilə yaxındır antitütün təbliğatı aparır: “Bununla bağlı Azad İstehlakçılar Birliyi olaraq 20 ildə 7 təhlükəli tütün fabrikinin bağlanmasına nail olmuşuq. Lakin bu məsələ yenə də gündəmdə qalır. 2 il əvvəl Şəkidə bir sahibkar çox təhlükəli filtirsiz siqaret istehsalına başlayıb. Bu illər ərzində, eyni zamanda, elektron siqaret problemi də irəliləyib. Bu yaxınlarda guya siqareti qurudaraq təhlükəsini azaltdığı deyilən cihaz barədə də şikayət almışam. Yəni siqaret mafiyasi cürbəcür yollarla irəliləyir. Əhali də buna aludə olur və istifadəçisinə çevrilir”.
Həmsöhbətimiz hesab edir ki, açıq havada və qapal məkanlarda siqaret çəkənlər mütləq cərimələnməlidirlər. Evlərdə qanun olmalıdır, qadınlar kişilərə ciddi irad bildirməlidirlər: “Uşaqlara məktəbdə siqaret barədə öyrədilməlidir ki, ondan uzaq dursunlar. Siqaretlə bağlı bizim tədqiqatlarımız olub, onu tərgidən çoxlu insanla həmsöhbət olmuşam, bunu necə asan formada bacardıqları barədə dinləmişəm. Mən bu qərarın tam tərəfdarıyam və təbliğat aparacağıq ki, ölkədə tütün istifadəçilərinin sayı azalsın. Azərbaycanda qəlyan, siqareti əvəzləyən, qurudan cihazlar minimuma endirilməlidir. Bütün dünyanın tanıdığı yeganə məhsullardan biridir ki, insana birmənalı şəkildə zərərdir, insanlar bundan uzaq durmalıdırlar. Nəzərə almaq lazımdır ki, hazırda koronavirus bütün dünyanı cənginə alıb. Belə bir vaxtda adi ehtiyatsızlıq çoxlu sayda insanın sağlığına və həyatına səbəb ola bilər. Bu səbəbdən də insanlar pandemiya dövründə açıq və qapalı məkanlarda qaydalara riayət etməlidirlər. Küçə, park və digər obyektlərdə siqaret çəkənlər inzibati qaydada cəzalandırılmalıdırlar”.
Günel CƏLİLOVA
