Mübariz Ağayev: “Onların göstərdiyi şücaət gələn nəsillərə nümunə olacaq”

img

Xalqımızın 30 illik həsrətinə, nəhayət ki, Şanlı Ordumuzun qazandığı tarixi zəfərlə son qoyuldu. Müqəddəs Qarabağ torpaqları erməni dığaların tapdağından təmizləndi. Və bununla həm  də  qüdrətimiz, qürurumuz  bir daha  bütün dünyaya bəlli oldu.

Bu qələbəmizə ürəkdən  sevinən,  döyüşlər zamanı həmişə əsgərlərə dayaq duran, həyatının mənasını millətinə vicdanlı, ləyaqətli xidmətdə görən, gördükləri ilə el gözündə ucalan xeyirxah insan, uzun illər dağlar diyarı Lerik rayon Mərkəzi Xəstəxanasının baş həkimi olan Tibb elmləri üzrə fəlsəfə doktoru, ”Səhiyyə  əlaçısı”, hazırda Tibbi Ərazi İdarəetmə Birliyi Tibbi Ərazi  Bölmələrinin Koordinasiyası  Departamentinin cənub ərazi bölməsi üzrə şöbəsinin  müdiri   Mübariz Ağayevdir.

Bu günlərdə Mübariz həkimlə  görüşdüm. Ürəyi sevdalı bu dəyərli insan söhbət zamanı dedi:

- Ali Baş Komandan İlham Əliyevin rəhbərliyi altında Şanlı Ordumuzun  misli görünməmiş  44 günlük  hücum əməliyyatı  xalqımızın möhtəşəm zəfəri ilə başa çatdı. Əsarət altında olan torpaqlarımız  azadlığa qovuşdu. Bu haqq savaşımızda neçə-neçə igidimiz öz həyatını Vətənə fəda edib şəhidlik zirvəsinə ucaldı. Onların  xatirəsi xalqın qəlbində  əbədi yaşayacaq. Döyüşlərdə hünər göstərib yaralanan ərənlərimiz də çoxdur. İndi onlar dövlətin xüsusi qayğısi ilə öz sağlamlığını bərpa edir. Lerik rayonundan Milli Məclisə deputat seçilən İqbal Məmmədovla birgə sağlamlıq ocaqlarda müalicə olunan  igid vətən oğullarına baş çəkdik.  Bizim tarixi şəhərimiz olan,  qədim mədəniyyət ocağı  Şuşa döyüşlərində erməni dığalarına  qan qusduran və  onun tam azad olmasını Ali Baş Komandanımıza  məruzə edən mayor Zaur Rəhimovun, baş leytenant Arif Hüseynin, gizir Əsgər Hüseynov, bədənlərində onlarla qəlpə yarası olsa da,  qürurlu idilər. Onların üzündən razılıq, məmnunluq hissi duyulurdu. Vətən tarixinin  şərəf zəfərində  payları olduğu üçün özlərini xoşbəxt  sayırlar. Belə mərd, igid  vətən övladları ilə fəxr etməyə dəyər, onların göstərdiyi şücaət heç vaxt dillərdən düşməz, gələn nəsillərə nümunə  göstərilər.

 Mübariz həkim daha sonra bildirdi:

- Bəli, əfi ilanın başı əzilən kimi erməni dığalarının başını əzdik. Bu öz yerində. Qaldı ki, qalib gəlməyə hələlik bir düşmənimiz qalır. Bütün dünyada tüğyan edən COVID-19 pandemiyasını deyirəm. Bizim respublikada da öldürücü virusa  yoluxma sayı xeyli artıb. Vəziyyət ciddi narahatlıq  doğurur, virusun qarşısını almaqdan ötrü  daha effektiv tədbirlərin görülməyini zəruri edir. Yenə də dövlət başçısı virusdan az itkilərlə qalib çıxmaq üçün əlindən gələni əsirgəmir. İndi bütün insanlar Operativ Qərargahın  tövsiyə, təklif  və qərarlarını qeyd-şərtsiz yerinə yetirməlidir. Tətbiq olunan məhdudiyyətlər yalnız əhalinin sağlamlığını qorumaq üçündür. Biz  öz müdrik, bütün dünyada nüfuzu bilinən dövlət rəhbərimizlə qalib, möhtəşəm xalqıq.  COVID-19 pandemiyasına da lap yaxın vaxtlarda qalib gələcəyimizə heç bir şübhə yoxdur. Bundan ötrü  isə hər kəs respublikada tətbiq olunan xüsusi karantin rejiminə riayət  etməli, maska taxmalı, ictimai yerlərdə məsafə saxlamalı, şəxsi gigiyenasını gözləməli və məsuliyyət hissini unutmamalıdır. Deyilənlərə əməl olunmaqla qarşıdan yeni qələbə bizi gözləyir.

Zəfər ORUCOĞLU
Azərbaycan Jurnalistlər Birliyinin üzvü

Son xəbərlər