ÜST Azərbaycanda COVID-in yayılması ilə bağlı olduqca qorxunc fikirlər səsləndirir - daha da sərt qaydalara hazır olmaq qaçılmaz olur…

Adil Qeybulla: “…ağır xəstələrin də sayı arta bilər”

img

Azərbaycan yeni növ koronavirusa (COVID-19) ilk yoluxmanın qeydə alındığı vaxtdan indiyədək olan dövr ərzində yoluxma sayı ilə bağlı pik dövrü yaşayır. Yoluxma sayındakı artım yalnız Azərbaycanda deyil, bütün dünyada müşahidə edilir. Ötən həftə ərzində dünyada yeni növ koronavirusa (COVID-19) rekord sayda yoluxma halı qeydə alınıb. Analoji hal ölkəmizdə də müşahidə edilir.

Ümumdünya Səhiyyə Təşkilatının (ÜST) Azərbaycandakı nümayəndəliyinin rəhbəri Hande Harmancı media nümayəndələrinə açıqlamasında qeyd edib ki, Azərbaycanda oktyabrın 10-dan sonrakı dövr ərzində COVID-19-a yeni yoluxma sayında 10 dəfə artım müşahidə edilir: “Qış fəslinin gəlməsi ilə əlaqədar şimal yarımkürəsindəki bütün ölkələrdə artım müşahidə edilir. Bu, dünya, eləcə də Azərbaycan üçün önəmli məsələdir. Xəstəlik təhlükəsi hələ davam edir. Biz bunu eşitməkdən yorula bilərik, amma virus insanları yoluxdurmaqdan yorulmadı. Digər dövlətlərdə olduğu kimi, Azərbaycanda da vəziyyət ciddidir".

Qeyd edək ki, son bir ay ərzində virusa yoluxma üçrəqəmlidən dördrəqəmliyə keçdi. Artıq yoluxma 2000-3000, ölüm sayı 20-30 arasında dəyişir. Virusa yoluxmanın qarşısının alınması üçün Nazirlər Kabineti yanında Operativ Qərargah müəyyən qabaqlayıcı tədbirlər görür.

  • “İctimai yerlərdə, nəqliyyatda sıxlıq olduğuna və insanlar maskadan düzgün istifadə etmədiyinə görə yoluxma halları artır”

Professor, həkim-ekspert Adil Qeybulla qeyd etdi ki, yoluxma sayının artması insanların qaydalara riayət etməməsi - maska taxmaması, ara məsafəsini gözləməməsi ilə əlaqədardır. Həmçinin, payız fəslidir, qrip və digər kəskin respirator virus infeksiyaların artan dövrüdür. Ona görə də sayda artım müşahidə olunur: “Şəhidlərimiz var. Əksər insan onların yas mərasiminə gedir. Əksəriyyəti yaşlı şəxsdir, deyirlər mütləq yas mərasimində iştirak etməliyəm. Onlarda isə immun sistemi zəifdir, risq faktoru daha yüksəkdir. Əvvəl koronavirusa yoluxma orta yaşlı insanlar arasında çox idisə, indi yaşlılar arasında daha çoxdur. Bildiyiniz kimi, cəbhədə döyüş gedirdi, bununla əlaqəli bəzən insanlar sıx toplaşıb, belə halda isə xəstəliyə yoluxma artır. Ona görə əhali arasında maarifləndirmə işinin aparılması lazımdır. COVID-19-a yoluxma sayı daha da arta bilər. İctimai yerlərdə, nəqliyyatda sıxlıq olduğuna və insanlar maskadan düzgün istifadə etmədiyinə görə yoluxma halları artır".

Həmsöhbətimiz hesab edir ki, hazırda Azərbayacanda koronovirusla mübarizə ÜST-in tövsiyəsi ilə yüksək səviyyədə aparılır: "Ağır xəstələr xəstəxanada, virusu yüngül keçirənlər isə ev şəraitində müalicə alırlar. Amma nəzərə almaq lazımdır ki, virusa yoluxma sayının artması fonunda ağır xəstələrin də sayı arta bilər. Bu isə xəstəxanalarda, reanimasiyalarda yer çatışmazlığına səbəb olacaq. Hazırkı vəziyyətdə çıxış yolu virusa yoluxmanın qarşısını almaqdır. Çalışmalıyıq ki, bu say artmasın. Yoxsa, vəziyyət daha da pis ola bilər”.

Günel CƏLİLOVA

Son xəbərlər