24/11/2020 13:06
728 x 90

Azərbaycan koronaya qarşı tədbirləri sərtləşdirməkdə dünya ölkələrindən geridə qala bilməzdi - dünya buna məcbur oldusa...

Pərvanə Vəliyeva: “Hazırkı maksimum yoluxma ilə əlaqədar həyata keçirilən karantin tədbirlərini məqsədəuyğun hesab edirəm”

img

Bütün dünyada COVID-19 pandemiyasının yeni, özü də daha təhlükəli dalğası başlayıb. Dünyanın müxtəlif ölkələrində, o cümlədən də Azərbaycanda virusa yoluxanların sayı rekord həddə çatıb. Yayılan rəsmi məlumata görə, ölkəmizdə virusa yoluxanların sayı 2597 nəfər olub, ölüm sayı da artıb.

Bildiyimiz kimi, artıq dünyanın bir çox ölkəsində olduğu kimi, Azərbaycanda da karantin tədbirləri sərtləşdirilir. Belə ki, Azərbaycanda xüsusi karantin rejimi dekabrın 28-nə qədər uzadıldı. Metropoliten bu tarixə qədər fəaliyyət göstərməyəcək, həftə sonları ictimai nəqliyyatın, gözəllik salonlarının, kafe və restoranların fəaliyyəti dayandırılacaq. Habelə, Şəki, Lənkəran şəhərləri, Qax, Zaqatala, Biləsuvar, Cəlilabad, Masallı, İsmayıllı, Quba, Xaçmaz rayonlarında tətbiq edilən sərt karantin rejiminin müddəti 2020-ci il 7 dekabr saat 06:00-dək uzadılıb. Bu barədə Nazirlər Kabineti yanında Operativ Qərargah məlumat yayıb. Son günlərdə COVID-19 virusuna yüksək yoluxma dinamikası qeydə alındığından, Nazirlər Kabineti bu qadağaların tətbiq edilməsinə qərar verib.

Bundan əlavə, artıq nəinki qapalı məkanlarda, həmçinin də açıq havada tibbi maskadan istifadə edilməsi vacibdir, noyabrın 21-dən küçədə, ictimai yerlərdə, açıq havada maskasız gəzən insanlar 100 AZN cərimələnəcəklər. Vətəndaşlara sosial məsafə saxlamaq, sanitar-gigiyena qaydalarına riayət etmək, həmişə olduğu kimi, bu dəfə də tövsiyə edilib.

Ekspertlər hesab edirlər ki, respublikamızda xüsusi karantin rejiminin uzadılması zərurət idi və bütün vətəndaşlarımız bunu anlayışla qarşılamalıdırlar. Artıq bəzi ekspertlər hesab edirlər ki, karantin rejiminin yay aylarında virusa yoluxmanın 600 civarında olduğu dövrdəki sərtləşdirilməsinə ciddi ehtiyac var. Hətta bəzi mütəxəssislər sosial izolyasiyanın tətbiqini də məqbul sayırlar.

Ekspertlər hesab edirlər ki, bütün dünya karantin rejimini və virusla mübarizə tədbirlərini sərtləşdirdiyi kimi, Azərbaycan da dünyanın bir parçası olaraq bu prosesdən kənarda qala bilməz. Bundan başqa, ölkəmizdə virusa yoluxanların sayı günü-gündən daha da artır, bu amil də karantin tədbirlərinin sərtləşdirilməsini zərurətə çevirir. 

  • “...maskadan istifadəyə nəzarət üçün radar sistemlərinin tətbiq edilməsi...”

“Sağlamlığa xidmət” İctimai Birliyinin sədr müavini Pərvanə Vəliyeva “Bakı-Xəbər”ə bildirdi ki, karantin rejiminin sərtləşdirilməsini zəruri edən məqamlar çox olsa da, amma bu, vəziyyətdən elə də optimal çıxış yolu sayıla bilməz. Sərt karantin rejimi geri qayıdarsa, iqtisadiyyatın, biznesin və digər sahələrin ciddi ziyanla üzləşə biləcəyini deyən P.Vəliyeva hesab edir ki, virusa yoluxmanın qarşısının alınması üçün yenidən maarifçilik tədbirləri gücləndirilməli və innovativ üsullardan istifadə edilməlidir: “Bilirsiniz ki, sərt karantin rejiminin sərtləşdirilməsi iqtisadiyyatımıza mənfi təsir göstərə bilər, buna görə də apteklər, marketlər istisna olmaqla, şənbə-bazar günləri kafe və restoranların, gözəllik salonlarının və digər ictimai iaşə obyektlərinin bağlanması məqsədəuyğun hesab edildi. Bunlara uyğun olaraq da həftə sonları ictimai nəqliyyatın hərəkəti dayanacaq. O dərəcədə sərt karantinin tərəfdarı deyiləm, virusa yoluxma səviyyəsinin aşağı salınması üçün insanların maarifləndirilməsinin tərəfdarıyam. İnsanlar maariflənərlərsə və bu qaydalara əməl edərlərsə, bu qaydaları tənzimləmək üçün müvafiq inzibati nəzarət tədbirləri gücləndirilərsə, bu daha effektiv olar. Burada innovativ üsullardan istifadə etməklə maskadan istifadəyə nəzarət üçün radar sistemlərinin tətbiq edilməsi daha məqsədəuyğun olardı. Radar-nəzarət sistemindən istifadə etməklə əhalinin maskadan istifadə etməsini nəzarətdə saxlamaq olar. Hazırkı maksimum yoluxma ilə əlaqədar həyata keçirilən karantin tədbirlərini məqsədəuyğun hesab edirəm. Çünki həftəiçi işləyən  insanlar şənbə-bazar günləri bir yerə toplaşırlar, günlərini daha çox kafe-restoranlarda keçirirlər, bunun qarşısını almaq, insan təmasını minimum dərəcəyə endirmək üçün həftə sonları kafe və restoranların, digər bu kimi ictimai iaşə obyektlərinin fəaliyyətini dayandırması məqsədəuyğundur”.

Görülən tədbirlər çərçivəsində ictimai nəqliyyatdakı sıxlığın aradan qaldırılmasının da zəruri olduğunu deyən P.Vəliyevanın sözlərinə görə, bu gün ictimai nəqliyyatda “Baku kart”dan istifadə edilir və sərnişinlər də hər dəfə o kartı cihaza vurarkən yoluxma risqini artırırlar. “Türkiyə təcrübəsindən istifadə etməklə ictimai nəqliyyatda küar kodlardan istifadə edilməsi vacibdir. Hər kəs telefonuna bu proqramı yükləyir və küar kod vasitəsilə telefonunu cihaza yaxınlaşdırır, ödənişi edir, nəticədə cihazla təmas olmur. İnsanların təmasının qarşısının alınması üçün bu cür innovativ sistemlərin və tənzimləmənin tətbiq edilməsi hazırda çox lazımlıdır” - deyə P.Vəliyeva vurğuladı.

İradə SARIYEVA

Son xəbərlər