24/11/2020 12:50
728 x 90

TƏBİB-dən tam real "diaqnoz" - yas yerləri pandemik cəhətdən olduqca təhlükəli məkanlara çevrilib

Aydın Xan Əbilov: “Yas mərasimləri 1 və ya 3 saat ərzində çox yaxın insanların iştirakı ilə keçirilə bilər”

img

İnsanlar elə hesab edirlər ki, doğmasına ehsan süfrəsi açmaq onun qarşısında son borcudur. Kimsə bu borcu yerinə yetirməsə, camaat onu qınayar. Koronavirus pandemiyası ilə əlaqədar ölkəmizdə karantin rejimi davam etsə də, COVID-19-a yoluxanların sayı sürətlə artır. Bu virusa yoluxma sayını artıran əsas amillər sırasında yas mərasimlərinin təşkili xüsusi qeyd edilir.

 

Son zamanlar koronavirusa yoluxma sayı çoxalıb. Artıq yoluxma sayı 2000-2800 arasında dəyişir, ölüm sayı isə 20-30 arasındadır. Qeyd etdiyimiz kimi, yoluxmanın əsas məkanı insanların kütləvi toplaşdığı yas mərasimləridir. Təəssüf ki, yas mərasimlərindən iştirak edənlər nə sosial məsafəyə riayət edir, nə də tibbi maska taxırlar. Bu qaydalara əməl edilmədiyi üçün bu gün koronavirusa yoluxma sayı artan temp üzrə davam edir.

TƏBİB-in İnfeksiya xəstəlikləri üzrə işçi qrupunun rəhbəri Vasif Əliyev media nümayəndələrinə açıqlamasında deyib ki, yoluxma halları daha çox yas mərasimlərində olur: “Qələbədən sonra insanlar sevinclərini paylaşmaq üçün toplaşırlar. Eyni zamanda, şəhidlərin dəfn mərasimləri keçirilir. Bu hallarda da insanlar arasında ara məsafə itir. Belə məkanlarda maskanın ya qətiyyən, ya da doğru istifadə olunmadığını müşahidə edirik. Təbii ki, belə yerlərdə virusun yayılma risqi çox yüksəkdir”.

  • “…bu qadağanı pozanlar inzibati məsuliyyətə cəlb olunmalıdırlar”

Vətəndaş Cəmiyyəti Alyansının rəhbəri, Yeni Yazarlar və Sənətçilər İctimai Birliyinin sədri, kitabxana.net portalının təsisçisi, analitik-ekspert, yazıçı-kulturoloq Aydın Xan Əbilov “Bakı-Xəbər”ə açıqlamasında qeyd etdi ki, koronavirusun Azərbaycanda geniş yayılmasının şahidi oluruq: “Müharibə ilə bağlı hərbçilərin döyüş bölgəsinə yollanması mərasimi, əsgər cənazələrinin qarşılanması, şəhidlər üçün keçirilən yas mərasimləri və digər səbəblərə görə virusa yoluxma sayı bu gün 2500-i keçib. Bu mövzu ilə bağlı rəsmilərin və ziyalıların yas mərasimlərində iştirakla bağlı çağırışlarına əhəmiyyət verilmir. Yas mərasimlərində iştirak edənlər bir masa arxasında ara məsafə gözləmədən əyləşirlər, eyni zamanda, rəhmətə gedənin nəşinin torpağa tapşırılmasına qədər keçirilən bütün ayinlərdə insanlar sosial məsafə gözləmədən iştirak edirlər. Təbii ki,  bu da yoluxma faktının artmasına səbəb olur”.

Həmsöhbətimiz təklif edir ki, yas mərasimləri ilə bağlı sərt qərarlar tətbiq edilsin. Yoluxma sayı minimuma enənə qədər 7, 40, cümə axşamı günləri mərasimləri keçirilməməlidir. Bu qadağanı pozanlar inzibati məsuliyyətə cəlb olunmalı, müəyyən məbləğdə cərimələnməlidirlər.

A.Əbilov hesab edir ki, yoluxucu xəstəliklə ciddi mübarizə aparılmasa, qazanılan uğurların üstündən xətt çəkməli olacağıq: “Məlumdur ki, Azərbaycan işğal altında olan torpaqlarını azad etdi. Koronavirusla bağlı insanların səhlənkarlığı ölkə üçün təhlükəli bilər. Bu səbəbdən də insanlar məsuliyyətli olmalıdırlar”.

Ekspert təklif edir ki, yas mərasimləri 1 və ya 3 saat ərzində çox yaxın insanların iştirakı ilə keçirilsin. Yas mərasimləri ilə bağlı xüsusi qayda tətbiq olunarsa, bu xəstəliyin axırına çıxmaq olar”.

Günel CƏLİLOVA

Son xəbərlər