Prezident İlham Əliyev tərəfindən Anar Kərimov Mədəniyyət nazirinin birinci müavini təyin edildikdən sonra nazirlik strukturunda sular durulmağa başlayıb Mədəniyyət nazirinin vəzifələrini icra edən Anar Kərimov özündən əvvəlki rəhbərliyin dövründə baş verən neqativ, qeyri-şəffaf işləri aradan qaldırmağa başlayıb. Artıq A.Kərimovun müvafiq əmrilə Mədəniyyət Nazirliyi sisteminin idarə edilməsinin təkmilləşdirilməsi üzrə yerli və xarici ekspertlərdən ibarət İşçi qrup yaradılıb.
İşçi qrupun yaradılmasında məqsəd mədəniyyət sahəsinin idarə edilməsində insan resurslarının müasirləşdirilməsi, mədəniyyətdə şəffaf və səmərəli idarəetmə mexanizmlərinin yaradılması, müasir tələblərə cavab verən və insan inkişafına yönəlmiş mədəniyyət infrastrukturunun qurulması, mədəniyyət sahəsində iqtisadi cəhətdən dayanıqlı maliyyələşdirilmə modelinin qurulması, müasir menecment üsullarının uğurlu tətbiqi ilə mədəniyyət sahəsində effektiv idarəetmənin formalaşdırılması və milli yaradıcı potensialın reallaşdırılması üçün optimal platformaların yaradılması ilə bağlı təkliflər paketi hazırlamaqdır.
Məlumatlara görə, İşçi qrupu keçmiş nazirin dövründə baş verən neqativ halları da araşdıracaq.
Ekspertlər hesab edirlər ki, A.Kərimov tezliklə son aylara qədər hərc-mərcliyin hökm sürdüyü Mədəniyyət Nazirliyində və onun strukturlarında şəffaflaşmanın təmin edilməsinə nail olacaq.
“Başlanan islahatlardan sonra nazirliyin bütün strukturlarında işlək mexanizm qurulacaq və şəffaflıq, inkişaf təmin ediləcək”
İctimai Nəzarət Koalisiyasının baş katibi, Yeni Yazarlar və Sənətçilər İctimai Birliyinin sədri, yazıçı-kulturoloq, Prezident təqaüdçüsü Aydın Xan Əbilov “Bakı-Xəbər”ə bildirdi ki, nazirlikdə yaradılan İşçi qrupunun fəaliyyəti nəticəsində bir sıra məsələlər üzə çıxarılacaq və bu sistemdə şəffaflıq təmin edilcək. İşçi qrupunun tərkibində xarici mütəxəssislərin də yer aldığının müsbət hal olduğunu vurğulayan A.X.Əbilov hesab edir ki, bu da proseslərin tam obyektiv şəkildə araşdırılmasına şərait yaradacaq. “A.Kərimov Mədəniyyət nazirinin birinci müavini kimi nazir səlahiyyətlərini icra etməyə başladıqdan sonra, bir çox dövlət qurumunda olduğu kimi, Mədəniyyət Nazirliyində də yeni islahatlara start verildi. Mədəniyyət Nazirliyində tanınmış yerli və xarici mütəxəssislərin təmsilçiliyi ilə İşçi qrupu yaradılıb. Bu İşçi qrupunun yaradılmasını müsbət qarşılayıram və hesab edirəm ki, İşçi qrupu məlum istiqamətdə qarşıya qoyulan hədəflərə çatacaq.
Cənab Prezidentin ictimai şuralarla bağlı fərmanına uyğun olaraq, Mədəniyyət Nazirliyində də ictimai şura yaradılıb. Bu şuranın da üzvləri keçmiş nazirin vaxtında təyin edilib və onların da fəaliyyəti heç vaxt görsənməyib. Ola bilsin, özlərinə qrant verdirmək üçün bir-iki dəfə toplanıblar. Bilirik ki, Mədəniyyət Nazirliyi də qrant verirdi, onlar da öz işlərini qrant almaqla və qrant verməklə bitmiş hesab etdilər. Onların da, demək olar ki, böyük əksəriyyətinin mədəniyyətə heç bir aidiyyəti yox idi. Bəzən biz mədəniyyət deyəndə yalnız incəsənət, musiqi, çal-çağır nəzərdə tuturuq. Amma Mədəniyyət Nazirliyi dövlətin kulturoloji siyasətini həyata keçirən icra qurumudur. Eyni zamanda, tarixi-kulturoloji əhəmiyyət daşıyan, proseslərə nəzarət edən, bu istiqamətdə dövlət siyasətini gerçəkləşdirən bir nazirlikdir. Ola bilsin, Anar Kərimov bu İşçi qrupunun yaradılması ilə bağlı əmr imzaladıqda ona nazirliyin tərkibindəki ictimai şura haqqında məlumat verilməyib. Burada digər bir məsələdə var - Mədəniyyət Nazirliyi sisteminin işlək bir mexanizmə çevrilməsi. Son islahatlar da göstərir ki, bir çox yaşlı nəsil nümayəndəsinin işdən kənarlaşdırılması, yaxud onların özlərinin könüllü şəkildə ərizə yazıb işdən ayrılması nəticəsində nazirlik sisteminə gənc nəslin təmsilçilərini gətirməklə Anar müəllim Mədəniyyət Nazirliyini işlək bir mexanizmə çevirəcək. Hesab edirəm ki, başlanan islahatlardan sonra nazirliyin bütün strukturlarında işlək mexanizm qurulacaq və şəffaflıq, inkişaf təmin ediləcək. Görülən işlər bunu demək qənaəti yaradır. Çox arzu edərdik ki, Mədəniyyət Nazirliyi sistemindən kənarda olan intellektli şəxslər də, üzdə olan, yaltaqlanmayan, sözünü deməyi bacaran mədəniyyət və incəsənət xadimləri də bu prosesə cəlb edilsinlər. Bundan başqa, mədəniyyət üzrə ictimai təşkilatlar da, kulturoloqlar da, analitik təfəkkürə malik olan insanlar da o İşçi qrupunun üzvləri olsaydılar, daha yaxşı olardı. Biz hazırda İşçi qrupunda kimlərin təmsil olunduğunu bilmirik”.
A.X.Əbilov qeyd etdi ki, o və digərləri illərdir Azərbaycan kulturologiyasını inkişaf etdiriblər. Müsahibimizin sözlərinə görə, kulturoloji proseslərin necə inkişaf etdirilməsini, hansı istiqamətlərə yönəldilməsini, Azərbaycanın mədəniyyət və kulturoloji sərvətinin beynəlxalq əhəmiyyətini nəzərə alaraq, onun beynəlxalq təsir vasitəsinə çevrilməsini konseptual olaraq təklif ediblər.
A.X.Əbilovun bildirdiyinə görə, eyni zamanda da qlobal mədəniyyət və incəsənətin Azərbaycana təsirinin, Azərbaycanda yeni biznes strukturlarının yaradılmasının vacibliyini dəfələrlə gündəmə gətiriblər. “Eyni zamanda, Azərbaycanın bu sahədə çox sürətlə inkişafını təmin edə biləcək mexanizmlər haqqında fikirlərimizi irəli sürmüşük, Bu baxımdan mən və mənim kimi insanların yaradılan İşçi qrupunun müxtəlif komissiyalarında təmsil olunmasını istərdim. Sözsüz ki, bu, ictimai iş olacaq.
Bu gün dünyanın hər yerində qloballaşma, inteqrasiya gedir, xalqların mədəniyyət yönümündə kulturoloji, kreativ bir yarışması başlayıb. Azərbaycan da bu proseslərdən geri qalmamalıdır. Bunun üçün mütəxəssislərin iştirakı ilə həmin İşçi qrupu nəzdində xüsusi yeni mədəniyyət konsepsiyası hazırlanmalı və ölkəmizin kulturoloji siyasətinin qlobal tərəfi nəzərə alınmaqla, Azərbaycanın kulturoloji-mədəni proqramının dünyada model kimi qəbul edilməsi ilə bağlı işlərin daha da gücləndirilməsinə ehtiyac var” - deyə A.X.Əbilov qeyd etdi.
İradə SARIYEVA
