Yeganə Hacıyeva: “Nə qədər ümumi “düşmən” kimi qələmə verdikləri bizlə mübarizədə səfərbərliyə nail olmağa çalışsalar da, bu alınmayacaq”
Ermənistanda etiraz aksiyalarının təşkilatçısı Nikol Paşinyanın tərəfdarları yenidən paytaxtın mərkəzi meydanında toplaşmağa başlayıblar. Paşinyan hakimiyyət nümayəndələri ilə danışıqları davam etdirəcəyini desə də, baş nazir vəzifələrini müvəqqəti icra edən Karen Karapetyan Paşinyanın yeni tələblər irəli sürdüyünü əsas gətirərək, danışıqları dayandırıb.
Paşinyan isə, öz növbəsində, yenidən etiraz mitinqləri keçirəcəyini bildirib. Göründüyü kimi, Serj Sarkisyanın istefası Ermənistandakı problemi kökündən həll etməyib. Əksər ekspertlər Ermənistandakı proseslərin uzanacağını proqnozlaşdırırlar. Səslənən iddialara görə, hakimiyyətin tam olaraq yeni müxalifətin əlinə keçməsi üçün bir sıra prosedurlara baş vurulmalıdır. Əvvəl parlament buraxılmalıdır. Çünki Ermənistanda siyasi sistem dəyişdiyi səbəbindən bütün taleyüklü məsələlər orada həllini tapır. Bunun üçün isə müxalifət hegemon dövlətlərin dəstəyini qazanmalıdır. Yalnız bu prosedurlar arxada qalandan sonra müxalifət öz namizədini ölkənin başına gətirə bilər. Belə versiyalar da səslənir ki, Ermənistanda yaranmış yeni situasiya həmin ölkədə formalaşacaq yeni hökumətin qondarma “Dağlıq Qarabağ Respublikası”na da münasibətinin xarakterini dəyişə bilər. Bu iddianı nə dərəcədə əsaslı saymaq olar?
Politoloq Yeganə Hacıyeva qəzetimizə açıqlamasında bildirdi ki, qeyd edilən məqam çox aktual və araşdırılan mövzudur: “Bunu yalnız Ermənistanla qondarma qurumun münasibətlərinə deyil, eyni zamanda, Ermənistan-Rusiya, Ermənistan-ABŞ və başqa istiqamətlərə də şamil edə bilərik. Bizi isə daha çox yeni situasiyanın Ermənistan-“DQR” münasibətlərinə hansı formada təsir edəcəyi düşündürür. Son 12 gün ərzində cərəyan edən hadisələri yaxından izlədik. Hakimiyyəti yeni metodla əlində saxlamaq istəyən S.Sarkisyanın son cəhdi uğursuz alındı və nəticədə o, istefaya getməli oldu. Məsələ burasındadır ki, Ermənistanda proses hələ yeni başlayıb. Yəni etirazçı kütlə və onu idarə edən müxalifət istəyinə tam nail ola bilməyib. S.Sarkisyanın istefası heç də o anlama gəlmir ki, onun mənsub olduğu siyasi güc tamamilə səhnədən silinib. Bu baxımdan da, hələ ki, Ermənistanın “DQR”lə münasibətləri və bu mövzuda Ermənistanın Azərbaycanla münasibətlərində hər hansı yenilik gözlənilmir. İkinci bir xüsusi məqamı qeyd etmək istəyirəm ki, Ermənistanda uzun müddətdir hakimiyyəti Qarabağ adlanan klan əlində saxlayır. Robert Köçəryan və ardınca iki seçim prezident olan S.Sarkisyanın hakimiyyət illərini həmin dövrə aid edə bilərik. Bu klan ölkənin istənilən sahəsinə nüfuz edib və mütləq çoxluğu təşkil edir. Bu faktın fonunda hələ ki, deyilən istiqamətdə köklü dəyişikliyin olacağını iddia etmək yersizdir. Yeniliyin olması üçün Paşinyan planı həyata keçməlidir. Onlar yeni parlament seçkisinin keçirilməsini istəyirlər. Ancaq nəzərinizə çatdırım ki, bu olduqca çətin olan bir prosesdir. Biz hazırda küçədə baş verənləri izləyirik. Ardınca mübarizə parlament divarları arasına sirayət edəcək. Ən son mərhələdə isə proseslərin arxasında dayanan güc ortaya çıxacaq. Hesab edirəm ki, Paşinyan bu mühüm prosesdə, sadəcə, icraçı rolunu həyata keçirir. Hələlik aqressiv kütlənin hisslərinin yatırılması prosesi gedir. Hər bir incə detal öz yerinə oturdulandan sonra əsl oyunçular Ermənistanın “DQR”lə münasibətlərinə yön verəcəklər. Ermənistanda Qarbağ klanı hakimiyyətdən tam uzaqlaşarsa, “DQR”ə münasibətdə çox şey dəyişəcək. İlk olaraq qondarma qurumun rəhbərliyində də ələnmə gedəcək. Bako Saakyanın narahatlığı aydın görünür. Proseslərin ən qızğın fazasında onun Ermənistana səfər etməsi də bunun əlaməti sayıla bilər. O guya Azərbaycan hücum edə bilər kartından istifadə etməklə, əslində, əhalini Serj Sarkisyanın ətrafına səfərbər etmək istədi. Ancaq nəticə tam fərqli oldu. Hətta onların güvəndiyi ordu belə Sarkisyanın yanında deyil, xalqın tərəfində oldu. Təbii ki, bütün bu hadisələr onu deməyə əsas verir ki, gələcəkdə Ermənistanla “DQR”in münasibətlərində zəifləmə elementləri nəzərə çarpacaq. Bununla da münasibətlərdə yeni xarakterin formalaşdığını görəcəyik. Nə qədər ümumi “düşmən” kimi qələmə verdikləri bizlə mübarizədə səfərbərliyə nail olmağa çalışsalar da, bu alınmayacaq və yeni sürprizlər gətirəcək. Biz bu həssas məqamdan ağıllı şəkildə istifadə etməliyik”.
Məhəmmədəli QƏRİBLİ
