Fikrət Yusifov: “Miqrasiya sahəsində olan nöqsanlar aradan qaldırılacaq”
Məlum olduğu kimi, Prezident Administrasiyasının rəhbəri Ramiz Mehdiyev Dövlət Miqrasiya Xidmətinin işində ciddi nöqsanlar olduğunu bildirib. Bu barədə R.Mehdiyev yeni təyin edilmiş rəhbər Vüsal Hüseynovu kollektivə təqdim edərkən danışıb. Belə ki, R.Mehdiyev Dövlət Miqrasiya Xidmətinin keçmiş rəhbərliyini korrupsiyada ittiham edib və buna son qoyulmasını tələb edib.
O bununla bağlı bir sıra məqamlara toxunub: “Azərbaycan Prezidenti hesab edir ki, korrupsiyaya son qoymaq lazımdır və xidmət şəffaf işləməlidir. Dövlət Miqrasiya Xidməti Azərbaycanın qapısıdır. Əgər Dövlət Miqrasiya Xidməti Azərbaycana hörmət qazandırmırsa, belə bir qurum Azərbaycan üçün lazımsızdır”.
Bununla yanaşı, R.Mehdiyev Prezident İlham Əliyevin miqrasiya sahəsinə xüsusi diqqət və qayğısından danışıb. Dünyada bu məsələnin aktuallığını qeyd edib. Miqrasiya proseslərinin tənzimlənməsinin də ölkədə aparılan siyasətin əsas prioritetlərindən olduğunu diqqətə çatdırıb. Administrasiya rəhbəri, həmçinin, dövlət başçısı tərəfindən miqrasiya sahəsində qarşıya qoyulan vəzifələrin, verilən tapşırıqların icrası ilə bağlı xidmətin kollektivinə müvafiq məsləhət və tövsiyələrini verib.
Ümumilikdə, Dövlət Miqrasiya Xidməti sahəsində olan hansısa neqativ hallar həm də ölkənin imicinə müəyyən mənfi təsir göstərir. O baxımdan sözügedən sahənin daha şəffaf işləməsinə böyük ehtiyac var. Qurumda korrupsiya hallarının olduğunu nəzərə alsaq, bu orqanın rüşvətxorlardan təmizlənməsi nə kimi əhəmiyyət daşıyır? Orada belə neqativ halların olması ölkənin imicinə necə təsir göstərir?
Sözügedən məsələni dəyərləndirən iqtisad elmləri doktoru, professor Fikrət Yusifovun fikrincə, R.Mehdiyevin sərt bəyanatı yaxın gələcəkdə islahatların, korrupsiya və rüşvətxorluğa qarşı mübarizənin daha da dərinləşdiriləcəyinə dair Prezidentin müəyyən etdiyi strategiyadan irəli gələn çağırışdır: “Yəni Prezidentin müəyyən etdiyi kursa əməl etməklə, bu istiqamətdə islahatların dərinləşdiriləcəyindən, eləcə də inzibati yollarla mübarizənin daha da sərtləşdiriləcəyindən xəbər verir. Bununla yanaşı, idarəçilik sisteminin özünün təkmilləşdirilməsi, yeni metodların tətbiqi hesabına rüşvətxorluq və korrupsiya ilə mübarizədən söhbət gedir. Miqrasiya sahəsində olan nöqsanlar aradan qaldırılacaq. Bunun ən bariz nümunəsi Azərbaycanda “ASAN xidmət” vasitəsilə insanlara və müəssisə, təşkilatlara göstərilən xidmətdir. Artıq növbəti ilə sözügedən xidmət müəssisələrinin sayı 20-yə çatdırılacaq. Hesab edirəm ki, bu sahədə işlər daha da dərinləşdiriləcək. Bir çox nazirliklərin, təşkilat və komitələrin, yəni insanlarla təması olan dövlət qurumlarının mümkün ola biləcək bütün fəaliyyətləri “ASAN xidmət”ə veriləcək. İnsanlar daha asan və mümkün üsullarla bu xidmətlərdən yararlanacaqlar. R.Mehdiyevin bu açıqlaması ölkə Prezidentinin müəyyən etdiyi strategiyadan doğan bəyanatdır. Bu, Prezidentin andiçmə mərasimində ortaya qoyduğu strategiyadır. Əslində, bu strategiya çoxdan müəyyənləşib. Hələ 2015-ci ilin sonlarında qeyri-neft sektorunun inkişafı ilə bağlı qərarların qəbul edildiyi bir dönəmdə Prezident bu sahədə sərt addımların atılmasına rəvac verdi. Həmin vaxtdan bu yana bir çox işlər görülüb, islahatlar aparılıb. 7 il ərzində də bu istiqamətdə işlərin dərinləşdiriləcəyi gözlənir”.
Vidadi ORDAHALLI
