Aprelin 25-də rəsmi qarşılanma mərasimindən sonra Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın təkbətək görüşü olub.
Görüşdə Azərbaycanla Türkiyə arasında dostluq və qardaşlıq münasibətlərinin bütün sahələrdə uğurlu inkişafından məmnunluq ifadə edilib. Azərbaycan Prezidenti İlham Əliyevin Türkiyəyə rəsmi səfərinin əlaqələrimizin inkişafı baxımından əhəmiyyəti qeyd olunub. Münasibətlərin siyasi, iqtisadi, energetika və digər sahələrdə uğurla inkişaf etdiyi vurğulanıb. Əməkdaşlığın bundan sonra da inkişaf edəcəyinə əminlik ifadə olunub. Ölkələrimizin birlikdə həyata keçirdiyi qlobal əhəmiyyətli layihələrin əhəmiyyəti xüsusi qeyd edilib.
Söhbət zamanı ikitərəfli münasibətlər və qarşılıqlı maraq doğuran digər məsələlər barədə fikir mübadiləsi aparılıb.
Təkbətək görüş başa çatdıqdan sonra Prezidentlər İlham Əliyev və Rəcəb Tayyib Ərdoğanın iştirakı ilə Azərbaycan-Türkiyə Yüksək Səviyyəli Strateji Əməkdaşlıq Şurasının VII iclası keçirilib.
Azərbaycan-Türkiyə Yüksək Səviyyəli Strateji Əməkdaşlıq Şurasının VII iclası başa çatdıqdan sonra Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın iştirakı ilə sənədlərin imzalanması mərasimi olub. İlham Əliyev və Rəcəb Tayyib Ərdoğan “Azərbaycan Respublikası ilə Türkiyə Respublikası arasında Yüksək Səviyyəli Strateji Əməkdaşlıq Şurasının yeddinci iclasının Protokolu”nu imzalayıb.
“Azərbaycan Respublikası Hökuməti ilə Türkiyə Respublikası Hökuməti arasında ətraf mühitin qorunması sahəsində əməkdaşlığa dair Sazişin tətbiqi ilə bağlı ikiillik (2018-2019) İş Proqramı”nı Azərbaycanın Türkiyədəki səfiri Xəzər İbrahim və Türkiyənin ətraf mühit və şəhərsalma nazirinin müavini Mehmet Ceylan imzalayıb.
“Azərbaycan Respublikasının Nəqliyyat, Rabitə və Yüksək Texnologiyalar Nazirliyi ilə Türkiyə Respublikasının Nəqliyyat, Dənizçilik və Rabitə Nazirliyi arasında elektron imza sahəsində əməkdaşlıq haqqında Anlaşma Memorandumu”nu Azərbaycanın nəqliyyat, rabitə və yüksək texnologiyalar naziri Ramin Quluzadə və Türkiyənin nəqliyyat, dənizçilik və rabitə naziri Əhməd Arslan imzalayıb.
“Azərbaycan Respublikası Hökuməti ilə Türkiyə Respublikası Hökuməti arasında preferensial ticarət sazişi üzrə müzakirələrə dair Anlaşma Memorandumu”nu Azərbaycanın iqtisadiyyat naziri Şahin Mustafayev və Türkiyənin xarici işlər naziri Mövlud Çavuşoğlu imzalayıb.
“Azərbaycan Respublikası Hökuməti ilə Türkiyə Respublikası Hökuməti arasında Mədəniyyət mərkəzlərinin təsis olunması, iş mexanizmi və fəaliyyətləri haqqında Saziş”i Azərbaycanın xarici işlər naziri Elmar Məmmədyarov və Türkiyənin xarici işlər naziri Mövlud Çavuşoğlu imzalayıb.
“Azərbaycan Respublikası Hökuməti ilə Türkiyə Respublikası Hökuməti arasında şəxsi heyətin mübadiləsinə dair Protokol”u Azərbaycanın müdafiə naziri, general-polkovnik Zakir Həsənov və Türkiyə Silahlı Qüvvələrinin Baş Qərargah rəisi, ordu generalı Hulusi Akar imzalayıb.
Sonra prezidentlər mətbuat konfransı keçiriblər.
İlham Əliyev Ərdoğanın seçkidə qalib gələcəyinə böyük inamını “dəvətlə” ifadə etdi.
Türkiyə və Azərbaycan dünyada bir-birinə ən yaxın ölkələrdir, ən yaxın müttəfiqlərdir. “Trend”in məlumatına görə, bunu Azərbaycan Prezidenti İlham Əliyev Ankarada Türkiyə Prezidenti Rəcəb Tayyib Ərdoğanla birgə mətbuat konfransında çıxışı zamanı deyib.
Prezident İlham Əliyev deyib: ”Sizin qeyd etdiyiniz kimi, prezident seçkilərindən sonra mənim ilk səfərim qardaş ölkəyə edilən səfərdir. Bu təbiidir. Sizin də qeyd etdiyiniz kimi, bu bir ənənədir və bu ənənə onu göstərir ki, bu gün Türkiyə və Azərbaycan dünya miqyasında bir-birinə ən yaxın olan ölkələrdir, ən yaxın müttəfiqlərdir. Məni prezident seçkilərində qazandığım qələbə münasibətilə ilk təbrik edən lider əziz qardaşım olub. Bir həftə bundan əvvəl Bakıda andiçmə mərasimi keçirildi, iki gün bundan öncə hökumətin formalaşması başa çatdı və dünən mən artıq Ankarada idim və biz əziz qardaşımla görüşlərə başladıq, bu gün də davam etdik".
İlham Əliyevin sözlərinə görə, bugünkü mərasim, dünən və bu gün aparılan müzakirələr bir daha onu göstərir ki, Türkiyə-Azərbaycan birliyi, qardaşlığı, dostluğu möhkəmdir və çox böyük gələcəyi var: "İlk növbədə, əziz qardaşımı və bütün Türkiyə xalqını əldə edilmiş uğurlar münasibətilə ürəkdən təbrik etmək istəyirəm. Əziz qardaşımın liderliyi sayəsində Türkiyə böyük və şərəfli yol keçmişdir. Biz, Azərbaycanda Türkiyəni sevən insanlar, Türkiyədəki inkişafı çox böyük sevinclə qarşılayırıq. Prezident Rəcəb Tayyib Ərdoğanın dövründə Türkiyənin iqtisadi, siyasi, sosial inkişafı bizi ürəkdən sevindirir".
Azərbaycan Prezidenti vurğulayıb ki, Türkiyə bu gün dünya miqyasında bir gücdür və bu güc getdikcə daha da böyüyür, dostlar sevinir, istəməyənlərin əhvalı pozulur: "Əminəm ki, bundan sonra da Türkiyə yalnız və yalnız qələbələr və uğurlar istiqamətində gedəcəkdir. Fürsətdən istifadə edərək əziz qardaşımı seçkilərdən sonra ilk səfərini Azərbaycana gəlmək şərtilə dəvət edirəm ki, bu ənənə bundan sonra da yaşasın.
Biz bütün məsələlərdə bir yerdəyik. Qeyd etdiyim kimi, dünya miqyasında ikinci belə bir ölkələr tapılmaz ki, bir-birinə bu qədər yaxın olsun. Həm köklər baxımından, mədəniyyət, tarix baxımından, həm də ortaq maraqlar və ortaq çıxarlar baxımından biz daim bir yerdəyik. Ermənistan-Azərbaycan Dağlıq Qarabağ münaqişəsinin həllində Türkiyə qədər bizə ikinci dəstək verən ölkə olmamışdır. Hər zaman Türkiyə bizimlə bərabərdir, bütün beynəlxalq təşkilatlarda Azərbaycanın haqlı mövqeyini müdafiə edir. Bu dəstək, həmrəylik bizə əlavə güc verir".
Dövlət başçısı bildirib ki, Ermənistan-Azərbaycan, Dağlıq Qarabağ münaqişəsi beynəlxalq hüququn norma və prinsiplərinə uyğun, BMT Təhlükəsizlik Şurasının qətnamələri əsasında ədalətli həllini tapmalıdır, ölkəmizin ərazi bütövlüyü bərpa edilməlidir: "Azərbaycan da öz növbəsində, bütün beynəlxalq təşkilatlarda Türkiyəni daim dəstəkləyir, Türkiyə ilə terrorla mübarizə yolunda hər zaman həmrəy olduğunu göstərmişdir, hər zaman Türkiyənin yanında olmasını ifadə etmişdir. “Zeytun budağı” əməliyyatını uğurla aparması münasibətilə bütün qardaş Türkiyə xalqını təbrik edirəm. Azərbaycan xalqı bu məsələdə də hər zaman həmrəylik göstərmişdir. Bu bizim ümumi məsələmizdir".
İlham Əliyev deyib ki, bu gün Türkiyə və Azərbaycan regionda birgə səylərlə çox böyük layihələr həyata keçirir: "Əziz qardaşımın dediyi kimi, Bakı-Tbilisi-Qars və TANAP tarixi layihələrdir. Bizim iradəmiz, təşəbbüsümüz və birliyimiz bu layihələri həyata keçirdi. Bu gün biz Avrasiyanın energetika və nəqliyyat xəritəsini tərtib edirik. Bu layihələr bizim gücümüzü artırır, regional əməkdaşlığı möhkəmləndirir və bölgədə sabitliyi təmin edir. Bizim birgə həyata keçirdiyimiz təşəbbüslər və layihələr sadəcə olaraq iqtisadi məna daşımır. Onların çox böyük siyasi mənası var və bu layihələr təhlükəsizliyi, sabitliyi möhkəmləndirən layihələrdir. Əminəm ki, bundan sonra da birgə həyata keçirəcəyimiz layihələr uğurla başa çatacaq.
Biz qarşılıqlı sərmayə qoyuluşunu artırırıq. Bu günə qədər Azərbaycan Türkiyə iqtisadiyyatına təqribən 14 milyard dollar, Türkiyə isə Azərbaycan iqtisadiyyatına 12 milyard dollardan çox investisiya qoymuşdur. Ancaq qardaş ölkələrə bu qədər sərmayə qoyula bilər. Yaxın gələcəkdə TANAP-ın açılışı, “Star” NEZ-in açılışı, əlbəttə ki, bizim imkanlarımızı daha da artıracaq. Onu da qeyd etməliyəm ki, Azərbaycan investisiyaları hesabına Egey bölgəsinin ən böyük limanı olan Petlim limanı inşa edilib və bu, Türkiyənin 3-cü böyük limanıdır. Biz bu gün preferensial ticarət sazişinin imzalanmasına yaxınlaşdıq. Ümid edirəm ki, yaxın gələcəkdə bu saziş imzalanacaq və beləliklə, ticarət dövriyyəsi daha da artacaq".
Azərbaycan Prezidenti bildirib ki, iki ölkə arasında birgə hərbi təlimlər, müdafiə sənayesi sahəsində tədqiqatlar həyata keçirilir: "Türkiyənin çox inkişaf etmiş müdafiə sənayesi var. Biz ordumuzun ehtiyacını, o cümlədən, Türkiyədə istehsal edilən hərbi məhsullar hesabına təmin edirik. Bu gün aparılan danışıqlarda qərara gəldik ki, bundan sonra da bu istiqamətdə addımlar atılacaq. Biz görürük ki, Türkiyənin çox inkişaf etmiş müdafiə sənayesi var və istehsal olunan mallar ən yüksək standartlara uyğundur.
Bütün sahələrdə - mədəniyyət, təhsil, humanitar sahələrdə də biz daim birlikdəyik. Bizi birləşdirən qədim tarix var. Bizi birləşdirən yaxın tarix var. Bu ilin may ayında birinci Azərbaycan Cumhuriyyətinin 100 illiyini qeyd edəcəyik. Ondan sonra Qafqaz İslam Ordusunun Azərbaycan Xalq Cumhuriyyətinin Ordusu ilə birgə Bakını erməni quldur dəstələrindən azad etməsini birlikdə qeyd edəcəyik. Bu, şanlı tariximizdir. Bu tarix göstərir ki, biz hər zaman bir yerdə olmuşuq, bu gün də bir yerdəyik və əminəm ki, hər zaman bir yerdə olacağıq.
Bir daha, əziz qardaşım, böyük diqqətə və qonaqpərvərliyə görə Sizə minnətdaram. Qardaş Türkiyə xalqına daim rifah və tərəqqi arzulayıram".
Ərdoğan Türkiyə-Azərbaycan ticarətinin milli valyuta ilə aparılmasını xüsusi qeyd etdi
Azərbaycan və Türkiyə bütün sahələrdə, o cümlədən müdafiə sənayesi sahəsində münasibətləri inkişaf etdirəcək. Bunu Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevlə birgə mətbuat konfransı zamanı deyib.
R.T.Ərdoğan bildirib ki, Azərbaycan və Türkiyə bir sıra iqtisadi və enerji layihələri həyata keçirir: “Bakı-Tbilisi-Qars dəmir yolu, yaxın zamanlarda açılışı olacaq TANAP bu layihələrdəndir”.
R.T.Ərdoğan qeyd edib ki, TANAP təkcə Azərbaycan və Türkiyə üçün vacib deyil, həm də Avropanın enerji təhlükəsizliyini təmin edəcək.
Türkiyə prezidentinin sözlərinə görə, hər iki ölkə gələcəkdə bir sıra vacib layihələr həyata keçirəcək. R.T.Ərdoğan bildirib ki, bu layihələrdən biri də ticarətdə milli valyutaya keçiddir.
R.T.Ərdoğan əlavə edib ki, “Star” NEZ-in istifadəyə verilməsindən sonra Azərbaycan Türkiyədə bir nömrəli investor olacaq: “İqtisadi və energetika münasibətlərini inkişaf etdirmək bizim üçün strateji prioritetdir. Türkiyə və Azərbaycan bir millət, iki dövlətdir”.
Prezident həmçinin “Zeytun budağı” hərbi əməliyyatı zamanı, eləcə də Türkiyədə hərbi çevriliş cəhdi zamanı Azərbaycanın Türkiyəni dəstəklədiyini deyib: “Azərbaycan hökuməti bu gün də Türkiyəyə FETÖ hərəkatı ilə mübarizədə vacib dəstək göstərir”.
Türkiyə Prezidenti Azərbaycan Xalq Cumhuriyyətinin 100 illiyi münasibətilə təbrikini ifadə edib.
Ərdoğan deyib ki, Türkiyə Dağlıq Qarabağ məsələsində Azərbaycana dəstək göstərməyə davam edəcək. O qeyd edib ki, Dağlıq Qarabağ münaqişəsinin həlli məsələsi Türkiyə üçün milli məsələdir.
Türkiyə Prezidenti əlavə edib ki, Türkiyə ilə Azərbaycan arasında münasibətlər bütün istiqamətlərdə inkişaf edir.
