Akif Nağı: “Onun hakimiyyətə gəlişi belə təlatümlə oldu, atışma nəticəsində bir neçə adam öldü”
Ermənistanın yeni seçilmiş baş naziri Serj Sarkisyan “Şant” televiziyasına müsahibəsində ölkəsində baş qaldıran kütləvi aksiyalara münasibət bildirib. Onun sözlərinə görə, kütləvi aksiyaların bu şəkildə davam etməsi Ermənistan üçün pozitiv nəsə vəd etmir: “İnsan haqları və azadlıqları bizim üçün prioritet sayılır. Ancaq ondan sui-istifadə edib, bunu İrəvanın mərkəzində tıxacların yaranmasına çevirəndə bu, müsbət effekt verərmi?”
Sarkisyan bildirib ki, son illər ərzində Ermənistanın daxili və xarici siyasətində yalnız bir il stabil keçib: “Mənim rəhbərliyim dövründə yalnız 2017-ci il stabil keçib. Məhz həmin ildə İrəvanın mərkəzində heç bir aksiya, mitinq keçirilməyib. Məhz buna görə də turistlər, investorlar ölkədə sərbəst şəkildə hərəkət ediblər. 2017-ci ildə bizim iqtisadi inkişafımız 7.5 faiz artıb. İstənilən halda, biz narazılıqlara təbii yanaşırıq. Çünki əhali nə qədər yaxşı yaşamağa başlayırsa, onların tələbatları daha da çoxalır. Ən sevindiricisi isə budur ki, biz minimal hədəfə çatmışıq. Əhalimiz bütün istəklərini də olmasa, heç olmasa onların yarısını həyata keçirməyi bacarıb”.
Göründüyü kimi, Sarkisyan bu müsahibəsində ölkəni idarə etdiyi illər ərzində yalnız 2017-ci ilin stabil keçdiyini etiraf edib. Əslində, bununla Sarkisyanın öz ölkəsini uzun müddət təlatümlər içində idarə etməsini etiraf etmiş olubmu?”
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, Ermənistanda yaşanan gərginlik bizim tərəfimizdən də böyük maraqla izlənir: “Hesab edirəm ki, Sarkisyan, həmişə olduğu kimi, bu dəfə də səmimi deyil. Onun bütün hakimiyyəti boyu təlatümlər olub. Hətta mən deyərdim ki, 2016-17-ci illər onlar üçün daha ağır keçib. 2016-cı ildə Azərbaycanın aprel döyüşlərində qazandığı uğurların narazılığı Ermənistanda 2017-ci ildə də davam edib. Sarkisyanın özü cəmi bir ili çıxdaş edirsə, təbii ki, bunu onun idarəetməsinə verilən ən dəqiq qiymət saymaq olar. Daha doğrusu, o özü-özünü ifşa edib. Sarkisyanın hakimiyyətə gəlişi belə təlatümlə oldu. Atışma nəticəsində bir neçə adam öldü. Yəni bu adam hakimiyyətə də silah gücünə gəlib. İnsanlarını hətta normal həyat səviyyəsi belə təmin olunmayıb. Ermənistan birbaşa Moskva tərəfindən idarə olunub. Bu gün xalq təsadüfən meydanlara axışmır. Buna ölkənin idarə edilməsindəki ədalətsizliklər səbəb olub. Əhali həm də Ermənistanın oyuncaq dövlətə çevrilməsinə etiraz edir. Sarkisyan bu illər ərzində yalnız 2017-ci ili qənaətbəxş sayırsa, deməli, Sarkisyan siyasətinin yanlış olduğu barədə düşünüb, siyasi arenadan çəkilməlidir. Bu isə tərsinə edir və özünə haqq qazandırmağa çalışır. Bu adam hakimiyyətdə qalmaq üçün bütün oyunlara əl atdı. Avropa əvvəl Ermənistandakı dəyişiklikləri islahat kimi qəbul etdi. Baxın, “islahat” göz qabağındadır.Görün xalqın Sarkisyanın əbədi hakimiyyətdə qalmaq istəyinə reaksiyası necədir? Hesab edirəm ki, Sarkisyanın bütün hakimiyyəti dövrü erməni xalqı üçün faciəyə səbəb olub. Nəticəyə baxın. Əhali get-gedə azalır, iqtisadiyyat məhv olub, ölkə bütün layihələrdən kənarda qalıb, müstəqillik isə formal xarakter daşıyır. Hesab edirəm ki, bu cür əsaslandırmalar Sarkisyanı çətin xilas edə bilər. Orada vəziyyət daha da gərginləşəcək”.
Məhəmmədəli QƏRİBLİ
