Ermənistanda məlum iğtişaşların miqyasının genişlənməsi fonunda ölkədə vəziyyətin getdikcə daha təhlükəli xarakter alması artıq beynəlxalq miqyasda da xüsusi diqqət mərkəzində yer almağa başlayıb.
Artıq əksər ölkələr vətəndaşalrını Ermənistana getməkdən çəkindirməyə çalışır. ABŞ səfirliyi isə öz vətəndaşlarını Ermənistanda kütləvi etiraz aksiyalarının keçirildiyi yerlərə getməkdən çəkinməyə çağırıb: “ABŞ səfirliyi Ermənistanda davam edən etiraz aksiyalarından xəbərdardır. Nümayişlərin gözlənilməz nəticələri zorakılıq halları yarada bilər. Sizin təhlükəsizliyiniz üçün etiraz aksiyaları keçirilən yerlərdən kənar durmağı və hadisələrlə bağlı məlumatı KİV-dən izləməyi məsləhət görürük”.
Rusiya prezidentinin mətbuat katibi Dmitri Peskov isə bildirir ki, Kreml Ermənistanda baş verən hadisələri diqqətlə izləyir: "Hər şeyin qanun çərçivəsində keçəcəyinə ümid edirik". Bununla belə Moskva da vətəndaşlarına ehtiyatlı olmağı tövsiyə edir. Hadisələrin gedişi isə Ermənistanda vəziyyətin daha da qarışacağını göstərir. Görünən budur ki, keçmiş prezident Serj Sarkisyanın baş nazir postunu ələ keçirməsi bütün ölkəni ayağa qaldırıb.
Sarkisyanın dövlət postunda yer alması ölkədə hər kəsi narahat edir. Paytaxt İrəvanda başlayan etiraz askiyaları artıq ölkənin kiçik əyalətlərinə də yayılır. Xalqın etiraz dalğasının qarşısını almağa çalışan təhlükəsizlik qüvvələri çox zaman uğursuzluğa düçar olur. Əsəbi kütlə ilə bacarmayan polislər aktiv etirazçıları həbs etmək məcburiyyətində qalır. Bu günədək etiraz aksiyalarında həbs edilənlərin sayı 100-ə yaxınlaşmaqdadır. Amma bu da aksiyaların genişlənməsinin qarşısını ala bilmir. İrəvanda etirazların lideri olan Nikol Paşinyan polisin aksiya üzvlərinə qarşı silahdan istifadə etmək haqqının olmadığını bildirib. Etiraz aksiyalarının davamlı xarakter alması və genişlənməsi fonunda Sarksiyanın daha repressiv metodlarla güc tətbiqini həyata keçirməsi gözlənir. Hətta bundan əvvəl Rusiyanın “Ekpress qəzeti” şəhərə Dağlıq Qarabağdan tanklar gətirildiyi haqqında məlumat yayıb.
Məlumatda deyilir ki, İrəvan ətrafına ordu birləşmələri cəmləşdirilir. Eləcə də Dağlıq Qarabağdan tank birləşmələri İrəvana göndərilib və tezliklə şəhərə daxil olacaq. Bu fonda Nikol Paşinyan tərəfdarlarına bildirib ki, artıq Ermənistanda vətəndaş müharibəsi başlayır. Daha əvvəl isə o, Ermənistanda “məxməri inqilab”ın başladığını elan edib, inqilab komitəsi yaradıb. Onun bildirdiyinə görə, inqilab komitələri yerlərdə hakimiyyəti ələ alacaq. Onu da bildirək ki, Sarkisyanın baş nazir olmasına etiraz edənlər antirusiya meylli qüvvələrdir və indi bu qüvvələr Ermənistanda güclənməkdədir. Rusiyalı ekspert Andrey Babitski bildirir ki, Ermənisanda iki millətçi qanad var. Bunlardan radikal millətçilər Rusiya ilə münasibətlərin kəsilməsinə çağırır, hesab edirlər ki, Rusiya Qarabağ məsələsində boşboğazlıqla məşğuldur. Azərbaycana kifayət qədər təsir etmir, əksinə, silah satır: “İkinci qrup millətçilər isə Gürcüstandan, Ukraynadan və digər postsovet respublikalarından bizə yaxşı tanışdır. Onlar Avropaya inteqrasiya tərəfdarıdır və əmindirlər ki, Avropaya, Amerikaya yaxınlaşmaqla acınaqcaqlı iqtisadi vəziyyətlərini yaxşılaşdıracaqlar İndiki rejimin avtoritar kapsulunu sındıracaqlar. İfrat millətçilərlə bu avrointeqrasiya tərəfdarlarını antirusiya əhval-ruhiyyəsi birləşdirir. Bu qüvvələr hesab edir ki, Rusiyadan aralanan kimi Ermənistan çiçəklənən və siyasi baxımdan qabaqcıl ölkə olacaq. İndiki situasiya Gürcüstanda Mixeil Saakaşvilinin hakimiyyətə gəlişi ərəfəsinə çox oxşayır”. Bununla bağlı olaraq Ermənistandakı Rusiya hərbi qüvvələrinin Sarkisyana yardım etməsi istisna olunmur. Onlar artıq hazırlıq vəziyyətinə gətirilib. Xatırladaq ki, Ermənistanın iqtisadi infrastrukturu Rusiyadan asılı vəziyyətə salınıb. Bütün strateji sferalara nəzarət Moskvanın əlindədir, enerji sferasında Rusiya hökmranlıq edir və bu halda hər hansı dəyişiklik Kreml üçün də sərfəli sayılmır. Yaranmış vəziyyətdə Cənubi Qafqazın ən kiçik və zəif ölkəsi sayılan Ermənistanda proseslərin daha gərgin məcraya qədəm qoyması gözlənir. Sarkisyanın öz xalqına qarşı güc tətbiq etməsi, hətta deputatların xəsarət alması, güc strukturlarından xalqa qarşı təzyiq kimi geniş istifadə olunmasının daha da genişlənməsi qaçılmaz sayılır. Hadisələrin gedişi göstərir ki, yaxın vaxtlarda Ermənistanda daha böyük qarşıdurmalar baş verəcək. O da maraqlıdır ki, artıq Ermənistanda silaha arxalanaraq dövləti idarə edənlərin sosial dayağı yoxdur. Eyni zamanda mitinq iştirakçılarına qarşı zor işlədilməsi, qan tökülməsi Ermənistanın demokratiyadan uzaq bir ölkə olduğunu göstərir. Bu da öz növbəsində Sarksiyana qarşı olanların əlinə əlavə arqumentlər verir. Məhz bu məqamda Ermənistanda siyasi sabitsizliyin genişlənməsi qaçılmaz sayılır. Bunun sonu isə vətəndaş qarşıdurmasıdır.
Nahid SALAYEV
