Əkbər Qoşalı: “Bu fərman neçə ailəyə ümid verəcək, gənclərimizi ruhlandıracaq, xalqımızın öz dövlətinə, Ali Baş Komandanına inamını daha da möhkəmləndirəcək”
Prezident İlham Əliyev Azərbaycan Respublikasının ərazi bütövlüyü uğrunda həlak olmuş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin yaxşılaşdırılması ilə bağlı əlavə tədbirlər haqqında Fərman imzalayıb.
Fərmana əsasən, 1997-ci il avqustun 2-dək Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların vərəsələrinə bu Fərmanla müəyyənləşdirilmiş qaydada 11 min manat məbləğində birdəfəlik ödəmə veriləcək. Birdəfəlik ödəmə hərbi qulluqçuların Azərbaycan Respublikasının Mülki Məcəlləsinə uyğun olaraq müəyyən edilən vərəsələrinə Əmək və Əhalinin Sosial Müdafiəsi Nazirliyi tərəfindən veriləcək.
Birdəfəlik ödəmə həqiqi hərbi xidmətdə (toplanışda) olduğu zaman həlak olması, ölməsi və ya xəbərsiz itkin düşdüyünə görə ölmüş elan edilməsi ilə əlaqədar əvvəllər sığorta ödənişi verilməmiş, o cümlədən barəsində sığorta ödənişinin verilməsinə dair qanuni qüvvəyə minmiş məhkəmə aktı olmayan hərbi qulluqçuların vərəsələrinə verilir.
Bu bir daha ölkə Prezidentinin Azərbaycanın ərazi bütövlüyü uğrunda döyüşən bütün şəxslərə xüsusi diqqət və qayğı göstərməsinin nümunəsidir. Nəzərə almaq lazımdır ki, İlham Əliyev 2003-cü ildə Prezident seçiləndən sonra bəyan etmişdi ki, o bütün xalqın Prezidentidir: “Mən bütün Azərbaycan xalqının, hər bir Azərbaycan vətəndaşının Prezidentiyəm”. Ölkə başçısının Azərbaycanın ərazi bütövlüyü uğrunda həlak olan şəxslərin ailələrinə göstərdiyi sözügedən diqqət bir daha sübut etdi ki, o hər bir Azərbaycan vətəndaşının Prezidentidir.
Sözügedən məsələni “Bakı-Xəbər”ə şərh edən Azərbaycanda Atatürk Mərkəzinin şöbə müdiri, Milli QHT Forumu İdarə Heyətinin üzvü Əkbər Qoşalının sözlərinə görə, bu fərman cənab Prezidentin xalqa verdiyi vədlərə sadiqliyinin göstəricisidir: “Bu, İlham Əliyevin yeni prezidentliyi dönəmində - andiçmədən cəmi bir gün sonra imzaladığı ilk fərman olması etibarilə ayrı bir mahiyyət kəsb edir. Diqqət etdinizsə, Prezidentin Milli Məclisdə keçirilən andiçmə törənindəki nitqində də əsas məqamlar ərazi bütövlüyümüzün bərpası, əhalinin sosial rifah halının yaxşılaşdırılması, bir sözlə, bütün əməli fəaliyyət sahələri üzrə inkişafın yeni fazasına keçid mövzusuna aid idi.
Ona görə də respublikamızın ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin yaxşılaşdırılması ilə bağlı əlavə tədbirlər haqqında fərman bu fərmanı imzalayan dövlət başçısının andiçmə törənindəki nitqindən irəli gələn bir sıra məsələlərin ilkin, yaxud operativ sənədləşməsi kimi də xarakterizə edilə bilər. Özü də mətnin, fərmanın əhatə etdiyi dövr və dairəyə aidiyyəti olan heç bir hərbçimizin qıraqda qalmamasına uyğun şəkildə, zərgər dəqiqliyi ilə hazırlandığını görməkdəyik. Bu fərman neçə ailəyə ümid verəcək, gənclərimizi ruhlandıracaq, xalqımızın öz dövlətinə, Ali Baş Komandanına inamını daha da möhkəmləndirəcək. Məşhur “Heç kim unudulmur, heç nə yaddan çıxmır” kəlamının da ruhu ilə səsləşən fərman, yalnız sosial, maddi deyil, bəlkə ondan da artıq dərəcədə mənəvi dəyər daşıyır. Fürsətdən istifadə edib, cənab Prezidentimizi bir daha təbrik edir, məsuliyyətli və şərəfli işində yeni başarılar diləyirəm!”.
Vidadi ORDAHALLI
