Üzeyir Cəfərov: “Bunun özü çox yaxşı haldır ki, əzizlərini ölkəmizin ərazi bütövlüyü uğrunda itirən şəxslər 11 min manat məbləğində birdəfəlik yardım alacaqlar” Cəlil Xəlilov: “Hesab edirəm ki, bu fərman həm onların ailə üzvlərinin sosial müdafiəsini gücləndirəcək, həm də onlar üçün böyük təsəlli olacaq”
Azərbaycan dövləti tərəfindən hər zaman respublikamızın ərazi bütövlüyü uğrunda şəhid olan, itkin düşən hərbi qulluqçuların ailələrinin sosial müdafiəsinin gücləndirilməsi istiqamətində böyük işlər görülüb. Təsadüfi deyil ki, İlham Əliyevin növbəti dəfə Prezident seçildikdən sonra imzaladığı ilk fərman bu qəbildən olan şəxslərin ailəsi ilə bağlıdır.
19 aprel 2018-ci il tarixində Azərbaycan Respublikasının Prezidenti İlham Əliyev “Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin yaxşılaşdırılması ilə bağlı əlavə tədbirlər haqqında” Fərman imzalayıb. Fərmanda deyilir: “Azərbaycan dövlətinin müstəqilliyinin, suverenliyinin və ərazi bütövlüyünün təmin edilməsi və qorunub saxlanması üçün ölkənin hərbi qüdrətinin artırılması, hərbi-sənaye kompleksinin inkişaf etdirilməsi, silahlı qüvvələrin döyüş qabiliyyətinin gücləndirilməsi və mənəvi-psixoloji vəziyyətinin daha da yüksəldilməsi dövlətin ən ümdə vəzifələridir.
Son illərdə hərbi sahəyə ayrılan xərclərin əhəmiyyətli dərəcədə artırılması ölkənin müdafiə potensialının gücləndirilməsi ilə yanaşı, silahlı qüvvələrdə xidmət edən hərbi qulluqçuların etibarlı sosial müdafiəsinin təmin edilməsinə, mənzil-məişət problemlərinin həll olunmasına, onlara verilən imtiyaz və güzəştlərin miqyasının genişləndirilməsinə şərait yaratmışdır.
Bu sahədə dövlət siyasətinin mühüm istiqamətlərindən biri də hərbi qulluqçulara dövlət icbari sığortasının tətbiqidir. 1997-ci il avqustun 2-də “Hərbi qulluqçuların dövlət icbari şəxsi sığortası haqqında” Azərbaycan Respublikasının Qanunu qüvvəyə mindikdən sonra hərbi qulluqçuların həlak olması, itkin düşməsi və ya xəsarət alması zamanı sığorta ödənişlərinin verilməsinə dair normativ hüquqi baza formalaşdırılmış, belə ödənişlərlə bağlı maliyyə təminatı məsələsi həll edilmiş və qanuna uyğun olaraq sığorta ödənişlərinin verilməsinə başlanmışdır.
Həmin qanunun tətbiqindən əvvəl Azərbaycan Respublikasının ərazi bütövlüyü uğrunda həlak olmuş və itkin düşmüş hərbi qulluqçuların ailə üzvlərinin sosial müdafiəsinin yaxşılaşdırılması məqsədilə Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:
1. 1997-ci il avqustun 2-dək Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların (bundan sonra – hərbi qulluqçuların) vərəsələrinə bu fərmanla müəyyənləşdirilmiş qaydada 11.000 (on bir min) manat məbləğində birdəfəlik ödəmə verilsin...”.
İlham Əliyevin növbəti dəfə Prezident seçildikdən sonra verdiyi ilk fərmanı yüksək qiymətləndirən hərbi ekspert Üzeyir Cəfərov qeyd etdi ki, bu fərman Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvləri üçün bir təsəllidir, bir dayaqdır: “Bilirsiniz, bəzi məmurların illərlə görə bilmədiyi işi Prezident bir fərmanla gördü. Ölkə başçısının ilk imzaladığı sənədin Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin gücləndirilməsi ilə bağlı olması müsbət haldır. Biz fərmanda əks olunan məsələni bir neçə il əvvəl qaldırmışdıq. Bu gün Prezident fərmanda bu məsələnin həllini bir sıra dövlət və hökumət strukturlarına tapşırıb. Bunun özü çox yaxşı haldır ki, əzizlərini ölkəmizin ərazi bütövlüyü uğrunda itirən şəxslər 11 min manat məbləğində birdəfəlik yardım alacaqlar. Bu insanlar öz əzizlərini və doğmalarını itirmiş insanlardır. Hesab edirəm ki, bu məbləğ Vətən uğrunda həyatlarını itirmiş hərbi qulluqçuların ailələri üçün bir təsəllidir. Çünki onlar Azərbaycanın ərazi bütövlüyü uğrunda canlarını fəda ediblər, itkin düşüblər. Bilirsiniz ki, ənənəvi olaraq ölkə başçısının sərəncamı ilə sağ olan İkinci Dünya Müharibəsi veteranlarının və vəfat etmiş veteranların ailə üzvlərinin, yaxud arxa cəbhədə çalışanların maddi rifahının yüksəldilməsi üçün birdəfəlik yardım göstərilir. Belə olduğu halda, nə üçün doğma torpaqlarımızın müdafiəsi uğrunda şəhid olanların və itkin düşənlərin ailəsinin sosial müdafiəsinin gücləndirilməsi üçün bu cür yardımlar edilməsin? İndi bu fərmana əsasən onlara da birdəfəlik yardımlar ediləcək”.
Ü.Cəfərovun sözlərinə görə, o, ölkə başçısının bu məsələ ilə bağlı fərman imzalayacağını gözləyirdi. O qeyd etdi ki, fərman şəhid ailələri və itkin düşmüş hərbi qulluqçuların ailələri tərəfindən də müsbət qarşılanır.
Müharibə, Əmək və Silahlı Qüvvələr Veteranları Təşkilatının sədr müavini, ehtiyatda olan polkovnik Cəlil Xəlilov da bizimlə söhbətində qeyd etdi ki, Prezidentin ilk fərmanının bu sahə ilə bağlı olması təqdirəlayiqdir: “Cənab İlham Əliyevin növbəti dəfə Prezident seçildikdən sonra imzaladığı ilk fərmanın şəhid ailələrinin, itkin düşmüş hərbi qulluqçuların ailə üzvlərinin sosial müdafiəsinin gücləndirilməsi ilə bağlı olması təqdirəlayidir. Mən bunu olduqca yüksək qiymətləndirirəm. Bilirsiniz ki, ölkə başçısı hər zaman bu məsələyə həssas yanaşıb və şəhid ailələrinə, hərbi əməliyyatlar zamanı itkin düşən, ölmüş elan edilən hərbi qulluqçuların ailələrinə böyük diqqət və qayğı ilə yanaşır. Hesab edirəm ki, bu fərman həm onların ailə üzvlərinin sosial müdafiəsini gücləndirəcək, həm də onlar üçün böyük təsəlli olacaq. Onların ailələri hər zaman bilir ki, ölkə başçısı onları düşünür və öz qayğısını onlardan əsirgəmir. Ümumiyyətlə, ölkə başçısının bu fərmanı onların maddi rifah halının yaxşılaşmasına, ehtiyaclarının qarşılanmasına səbəb olacaq. Deyim ki, ölkə başçısı tərəfindən şəhid ailələrinə göstərilən səmimi münasibət hər zaman onları ruhlandırır”.
C.Xəlilov dedi ki, bu fərman müharibə veteranları, şəhid ailələri, eləcə də Azərbaycan ictimaiyyəti tərəfindən müsbət qarşılanır.
İradə SARIYEVA
