Aqşin Əliyev: “Oxşar məzmunlu qələbələrimizi təkrarlamalıyıq”
ABŞ-ın ən böyük şəhərlərindən olan Çikaqo şəhərinin meri cənab Rahm Emanuel Azərbaycan Demokratik Respublikasının 100-cü ildönümü ilə əlaqədar olaraq rəsmi bəyanat verib. Bəyanatda 1918-ci il 28 may tarixində Müsəlman Şərqində ilk dünyəvi, parlamentli respublika olan Azərbaycan Demokratik Respublikasının qurulması və dünyanın digər demokratik dövlətləri, o cümlədən ABŞ tərəfindən tanınması qeyd olunur.
Sənəddə bildirilir ki, Azərbaycan Demokratik Respublikası müstəqilliyinin qısa müddəti ərzində, irqi, cinsi, etnik və ya dini mənsubiyyətindən asılı olmayaraq, bütün vətəndaşlara bərabər seçki hüququnu tanımaqla yanaşı, müsəlman dünyasında ilk dəfə olaraq qadınların seçki hüququnun verilməsini təmin edib.
Eyni zamanda, sənəddə Azərbaycan Demokratik Respublikasının 1920-ci ildə öz müstəqilliyi uğrunda mübarizə aparmasına rəğmən, onun Sovetlər Birliyinin tərkibinə daxil edildiyi və 1991-ci ildə yenidən öz müstəqilliyini bərpa etməyə nail olduğu vurğulanır.
Qeyd edilir ki, Azərbaycan son 25 il ərzində öz suverenlik və müstəqilliyini möhkəmləndirmiş və hazırda Xəzər regionunda ABŞ-ın müttəfiqi və strateji tərəfdaşıdır.
Bəyanatda bu il, 28 may tarixində Çikaqoda və dünyanın digər yerlərində yaşayan azərbaycanlılar tərəfindən Milli Gün olaraq Azərbaycan Demokratik Respublikasının 100 illik yubileyinin qeyd ediləcəyi və öz əcdadlarının Qafqaz, Mərkəzi Asiya və Orta Şərqdə demokratiyanın yayılması üçün töhfələrinin xatırlanacağı qeyd edilir.
Sonda şəhərin meri Rahm Emanuel imzaladığı bəyanatda 2018-ci il 28 may tarixini Çikaqoda Azərbaycan Milli Günü elan edir və bütün Çikaqo sakinlərini Azərbaycan xalqının çoxsaylı töhfələrini qeyd etməyə çağırır.
Qeyd edək ki, bundan bir gün qabaq ABŞ-ın Arizona ştatının Senatı Azərbaycanın ərazi bütövlüyünü dəstəkləyən sənəd qəbul edib. Diqqətçəkən maraqlı məsələ budur ki, həm Arizona, həm də Çikaqo ABŞ-dakı erməni diasporunun fəal olduğu regionlardır. Məhz belə şəhər və ştatlarda Azərbaycanla bağlı qəbul edilən müsbət qərarlar nəyin göstəricisi sayıla bilər?
Ekspert Aqşin Əliyevin sözlərinə görə, bu amil doğrudan da düşündürücüdür: “Arizona ştatı və Çikaqo şəhəri doğrudan da ABŞ-dakı ermənilərin ən fəal olduqları ərazi subyektləridir. Məhz bu yerlərdə qondarma “soyqırım”ın tanıdılması istiqamətində Erməni Milli Konqresi böyük işlər görüb. Sonra isə onlar Dağlıq Qarabağ mövzusunda da fəallıq etməyə başladılar. Ən əsası isə Azərbaycanla bağlı lazımsız dinləmələrin keçirilməsinə məhz deyilən yerlərdən cəhdlər edilirdi. ABŞ dünyanın ən aparıcı ölkəsidir. İstər Arizona ştatı, istərsə də Çikaqo şəhərinin həmin ölkənin ictimai rəyinə, qanunların qəbul edilməsinə əhəmiyyətli təsirləri var. Məhz belə yerlərdə Azərbaycanın qələbəsi çox lazımlı və qürurvericidir. Hesab edirəm ki, bu istiqamətdə diplomatiyamız və diaspor təşkilatlarımızın böyük uğuru olub. Cənab Prezidentin diplomatiyamıza verdiyi tövsiyələrin artıq bəhrəsi hiss edilir. Ölkə başçısı hələ bir neçə il əvvəl diplomatlara demişdi ki, biz müdafiədən hücüm taktikasına keçməliyik. Məhz bu məsləhət və tapşırığın cücərtiləri özünü göstərir. Biz artıq erməniləri öz yuvalarında udmağı bacarırıqsa, demək, digər yerlərdə bu uğurları təkrarlamaq bizim üçün problem yaratmayacaq. Bu səbəbdən də oxşar məzmunlu qələbələrimizi təkrarlamalıyıq. ABŞ-ın deyilən regionlarında qazanılan uğurlarda çox güman ki, bizə başqa dost diaspor təşkilatlarının da köməyi dəyib. Xüsusilə də türk diaspor təşkilatlarının bu işdə bizə dəstək verdiyini istisna etmirəm”.
Məhəmmədəli QƏRİBLİ
