Vüqar Qədirov: “Hesab edirəm ki, 11 aprel seçkilərini əhəmiyyətli edən nüanslardan biri də məhz bu idi”
Aprelin 11-də keçirilən prezident seçkilərini maraqlı edən məqamlardan biri də vətəndaşlarımızın, əvvəlki seçkilərdən fərqli olaraq, ilk dəfə işğaldan azad edilən ərazilərimizdə səs verməsi oldu. Cəbrayıl rayonunun işğaldan azad edilmiş Cocuq Mərcanlı kəndinin sakinləri 26 ildən sonra ilk dəfə öz doğma torpaqlarında səs verdilər.
Səsvermə Mərkəzi Seçki Komissiyasının qərarı ilə 120 saylı Cəbrayıl-Qubadlı seçki dairəsinin dislokasiyası daxilində Cocuq Mərcanlı kəndində yaradılmış 73 saylı seçki məntəqəsində keçirilib. Məntəqə seçki komissiyasının sədri Zamin Həziyev bildirib ki, 121 seçicinin qeydə alındığı məntəqədə səsvermənin şəffaf və demokratik keçirilməsi, seçicilərin rahatlığı üçün hər cür şərait yaradılıb. Kənd sakinləri səsvermədə fəal iştirak ediblər.
Vətəndaşlarımızın son seçkilərdə rastlaşdığı bu amili və seçkini fərqli edən xüsusiyyəti necə dəyərləndirmək olar?
Qacqın və Məcburi Köçkün Gənclər Birliyinin sədri Vüqar Qədirov qəzetimizə bildirdi ki, qeyd olunan faktor olduqca böyük əhəmiyyətə malikdir: “Biz aprel döyüşlərində qazandığımız qələbənin daha bir əhəmiyyətini bu seçkilərdə hiss etmiş olduq. Ermənistan bütün vasitələrlə bu zəfəri pərdələməyə çalışır. İddia edir ki, guya Azərbaycan aprel döyüşlərində elə də böyük uğura imza atmayıb, bir-iki təpəni azad edib. Bizim aprel döyüşlərində qazandığımız qələbənin strateji əhəmiyyətindən çox danışılıb. Bu mövzuya bir daha qayıtmaq istəməzdim. Ancaq bu qələbəni əhəmiyyətli edən ən böyük hadisə bizim soydaşlarımızın işğaldan azad olunan ərzilərimizə yenidən köçməsi oldu. Bəziləri iddia edirdi ki, torpaqlar azad olunsa da, köçkünləri həmin yerlərə qaytarmaq çətin olacaq. Ancaq Cocuq Mərcanlıya edilən böyük köç bunun əksini sübut etdi. Ermənilər anladılar ki, bu, simvolik əhəmiyyət daşısa da, Dağlıq Qarabağa olacaq böyük qayıdışın ilk qaranquşu oldu. Həmin ərazilərdə ölkə başçısının seçilməsi isə Dağlıq Qarabağ və onun ətrafında işğal edilən hər bir qarış torpağında Azərbaycan qanunlarının hakim olduğuna və olacağına bir işarə idi. Hesab edirəm ki, 11 aprel seçkilərini əhəmiyyətli edən nüanslardan biri də məhz bu idi. Azərbaycan xalqı bu seçkidə də doğru seçimini etdi. Həmin torpaqlara yenidən həyatı qaytaran siyasətçiyə, böyük dövlət adamına etimad göstərdi. Bu doğru seçim onu deməyə əsas verir ki, işğal altında olan digər ərazilərimizdə də tezliklə analoji vəziyyət yaranacaq. Bizim vətəndaşlarımızın azad olunan ərazilərə həvəslə qayıtması və orada təşkil edilən seçkidəki fəal iştirakı buna əmin olmaq üçün tam əsas vermiş olur”.
Məhəmmədəli QƏRİBLİ
