Məhəmməd Əsədullazadə: “İrəvanda keçirilən mitinqlər və etirazlar məhz Qarabağ klanının bu kimi cinayətkar və korrupsiya siyasətinə qarşı yönəlib”
Ermənistandakı kriminal rejim həm də ciddi şəkildə korrupsiyalaşıb. Faktiki olaraq Sarkisyan rejimi tərəfindən ölkə talan edilir. Nəzərə alsaq ki, Ermənistan əsas etibarilə xarici yardımlar hesabına yaşayır, korrupsiya və talançılığın bu ölkə üçün nə demək olduğunu təsəvvür etmək çətin deyil.
Bu arada məlum olub ki, Avropa İttifaqının Ermənistana ayırdığı qrantı mənimsəməkdə ittiham olunan 14 nəfər barəsində cinayət işi üzrə ibtidai istintaq başa çatıb. Təqsirləndirilən şəxslər barəsində iş məhkəməyə göndərilib. Avropa İttifaqının bununla bağlı ayırdığı qrant 18 proqramı əhatə edir və oğurlanmış məbləğ 907 milyon dramdan çoxdır. İstintaq zamanı məlum olub ki, bir qrup şəxs əlbir olaraq böyük saxtakarlığa və mənimsəməyə yol verib. Bu, istintaq materialları ilə sübut olunub. Sözügedən məsələ ilə bağlı Marina Papian (18 epizod), Tiqran Sukiasyan (15 epizod), Garik Chilingaryan (6 epizod), Ruby Ter-Martirosyan (4 epizod), Armen Baregamyan, AB nümayəndə heyətinin qrant proqramlarının koordinatoru Gevork Ghazarian (2 epizod), Dina Manukyan (1 epizod), Sergey Balasanyan (1 epizod), Karen Stepanyan (1 epizod), Armen Mikaelyan (1 epizod) Arman Mkrtçyan (4 epizod) , Anahit Avakyan (hər biri 4 epizod) və Nelly Sedrakyan (hər iki epizod) xüsusi ittiham olunurlar.
Görünən odur ki, Ermənistanda nəinki erməni lobbisinin ayırdığı yardımlar, Avropa İttifaqı xətti ilə ayrılan vəsaitlər də korrupsiyaya məruz qalır. Çünki Serj Sarkisyan rejimi tamamilə korrupsiyalaşıb.
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, bütün bunlar təsadüfi deyil: “Avropa İttifaqının Ermənistana ayırdığı qrantların təyinatı üzrə xərclənməməsi, mənimsənilməsi, ən əsası, korrupsiyaya uğraması kriminal Sarkisyan rejiminin mahiyyətindən irəli gəlir. Hazırkı iqtidar yalnız özünün varlanması və hakimiyyətinin uzanmasına çlışır. Avropa İttifaqının qrantları Sarkisyan klanının İrəvan ətrafında villalarının tikilməsinə və həmçinin, xarici banklara yönəlməsinə sərf olunur. Sözügedən qrantlar əsasən müxtəlif sahələrin dirçəldilməsinə və inkişaf etdirilməsinə ayrılır. Təbii ki, daim xarici qrantlardan asılı olan bu ölkə rejimi belə bir fürsəti əldən buraxmır və öz şəxsi vəsaitləri kimi istifadə edirlər. Hazırda Ermənistan əhalisi çətin sosial vəziyyətdə yaşayır. Əhali xaricə miqrasiya edir. Ölkə əhalisi qocalır. Gəncləşmə bu ölkədə, demək olar ki, dayanıb. Qrantlar adətən sosial və humanitar sahələri əhatə edir. Göründüyü kimi, Avropa İttifaqının ayırdığı milyonlar yalnız Serjə öz hakimiyyətini qorumağa hesablanıb. Hazırda İrəvanda keçirilən mitinqlər və etirazlar məhz Qarabağ klanının bu kimi cinayətkar və korrupsiya siyasətinə qarşı yönəlib. Erməni xalqı anlayır ki, Sarkisyan hakimiyyətdə olduqca xaricdən ayrılan qrant və ianələr sadə ermənilərin rifahına yönəldilməyəcək. Ona görə də on il ərzində Serjin hakimiyyəti ermənilərin səfalətinə və bir dövlət kimi Ermənistanın müflisləşməsinə səbəb olub. Hesab edirəm ki, növbəti dəfə Sarkisyanın baş nazir kimi hakimiyyətdə qalması Ermənistanın tam müstəqilliyinin itirilməsinə və əhalinin xaricə köçünə səbəb olacaq. 10 il ərzində heç bir siyasi-iqtisadi uğura imza ata bilməyən Qarabağ klanı - Sarkisyan rejimi bundan sonra da heç bir islahata getməyəcək. Bundan sonra da ayrılan qrant və ianələr yalnız Serjin hakimiyyətdə qalmasına xərclənəcək. Ermənistan əhalisini çətin və dözülməz illər gözləyir. Rusiyada iqtisadi böhran bu ölkəyə göndərilən pulların azalmasına səbəb olub. Avopa İttifaqı da bu korrupsiya siyasətini gördükdə, yenidən qrantları ayırmağı ertələyəcək. Bununla bağlı çoxlu şikayət daxil olur. Erməni xalqı İrəvanda etirazları kütləvi edib Sarkisyanı devirməyincə, bu problemlərin içində yaşayacaq”.
Vidadi ORDAHALLI
