Ölkədə baş tutan daha bir prezident seçkilərinin nəticələri hakim Yeni Azərbaycan Partiyasının namizədinin yenə Azərbaycan xalqının mütləq əksəriyyəti tərəfindən dəstəkləndiyini üzə çıxardı. Siyasi təhlilçilər isə bütün bunları təsadüfi saymaraq, baş verənlərin məntiqi nəticələrdən irəli gəldyini bəyan edir.
Burada diqqət ilk növbədə ona yönəlir ki, Azərbaycanın son 15 ildə əldə etdiyi və dünya miqyasında təqdir olunan uğurlar məhz Prezident İlham Əliyevin adı ilə bağlıdır. 2003-cü ildən etibarən Azərbaycana rəhbərlik edən İlham Əliyev sabitlik və dayanıqlı inkişafı təmin etməklə yanaşı, ölkəni beynəlxalq müstəvidə söz və nüfuz sahibinə də çevirə bilib. Bunun nəticəsidir ki, 2003-cü ildən bəri keçrilən bütün seçkilərdə o, rəqibləri ilə müqayisədə birmənalı şəkildə seçicilərin böyük əksəriyyətinin səsini qazanır.
Xatırladaq ki, İlham Əliyev 2003-cü il oktyabrın 15-də keçirilən prezident seçkilərində seçicilərin 76 faizindən çoxunun səsini qazanıb. Gördüyü işlər nəticəsində cəmiyyətdə onun dəstəyi ötən dövrdə daha da artıb. Məhz bundan irəli gəlir ki, 2008-ci il oktyabrın 15-də keçirilən seçkilərdə seçicilərin 88,73 faiz səsini qazanan İlham Əliyev ikinci dəfə Azərbaycan Prezidenti seçilib. 2013-cü il oktyabrın 9-da keçirilən seçkilərdə isə seçicilərin 84,54 faiz səsini qazanan İlham Əliyev növbəti dəfə Azərbaycanın dövlət başçısı postunu tutub. Son seçkilərdə də seçicilərin mütləq əksəriyyəti yenə onu dəstəklədi. Seçicilərin azı 86,09 faizi ona səs verdi. Beləliklə, İlham Əliyev Azərbaycanın tarixində 5 illiyə seçilən sonuncu, 7 illiyə seçilən ilk Prezident oldu.
Əslində seçkilərdən əvvəl keçirilən sorğular da xalqın seçiminin yenə İlham Əliyev olacağını göstərirdi. Bu da təsadüfi sayıla bilməz. Ən azından ona görə ki, İlham Əliyev Azərbaycanı inkişaf etmiş dövlətlər səviyyəsinə çatdırmaq istiqamətində ardıcıl tədbirlər həyata keçirir və bunun nəticələri insanların həyatında da özünü qabarıq göstərir. Ümumiiyətlə, onun həyata keçirdiyi siyasətin başlıca məqsədlərindən biri əhalinin sosial rifah halının yaxşılaşdırılmasıdır. Bu xüsusda həyata keçirilən çoxşaxəli tədbirlər sistemi həm kəmiyyət, həm də keyfiyyət göstəricilərinə görə Azərbaycanın tarixinə böyük hərflərlə yazılıb. Qarşıdakı dövr üçün də İlham Əliyev mühüm məqsədələri açıqlayıb. Bura iqtisadi şaxələndirməni sürətləndirmək, ümumi daxili məhsulun iki dəfə artırılmasına nail olmaq, Azərbaycanı yüksək gəlirli ölkəyə çevirmək, onu inkişaf etmiş ölkələr sırasına daxil etmək kimi vacib məqamlar daxildir. Bu məqsədlərə çatmaq üçün “Azərbaycan 2020: gələcəyə baxış” İnkişaf Konsepsiyası, ayrı-ayrı istiqamətləri əhatə edən strateji yol xəritələri icra olunur. Görülən işləri başa çatdırmaq üçün isə xalq yenə lider rolunda məhz İlham Əliyevi görür.
Bundan başqa, nəzərə almaq lazımdır ki, İlham Əliyevin təşəbbüs və dəstəyi hesabına başa gələn böyük iqtisadi, enerji və nəqliyyat layihələri dünya dövlətləri üçün mühüm əhəmiyyət kəsb etməklə, regionun inkişafına layiqli töhfələr verir. Belə vəziyyət Azərbaycanın dünya miqyasında mövqelərini daha da gücləndirir. Azərbaycan xalqının və dövlətinin mənafeyinin ən yüksək səviyyədə qorunmasına yönəlmiş fəaliyyətin davamı fonunda İlham Əliyevin daha 7 il müddətinə ölkəyə rəhbərlik etməsi, şübhəsiz ki, bundan sonra da ölkənin aktivlərinə böyük uğurların yazılması ilə müşayiət olunacaq.
Tahir TAĞIYEV
