Suriyada cərəyan edən son hadisələr burada barəsində artıq xeyli müddətdir anons verilən dünya savaşının başlanma ehtimalının əhəmiyyətli dərəcədə artdığını göstərir. Savaşın əsas tərəfləri qismində də ABŞ və Rusiyanın çıxış etməsi gözlənir.
Hər şey isə aprelin 7-də Dəməşq yaxınlığındakı şərqi Quta qəsəbəsində Bəşər Əsəd rejiminin kimyəvi silah işlətməsinə dair yeni iddialardan başlayıb. Buna cavab olaraq ABŞ Suriya rejimini cəzalandıracağını bəyan edib. ABŞ prezidenti Donald Tramp bildirib ki, kimyəvi silah hücumuna görə, Əsəd rejimi ilə yanaşı, onu dəstəkləyən Rusiya və İran da məsuliyyət daşıyır. Özü də ABŞ prezidenti ilk dəfə Rusiya prezidentini birbaşa hədəf alaraq Vladimir Putinin baş verənlərə görə cavab verməli olacağını bildirib. Moskva isə bütün itithamları rədd edərək, ABŞ-ın Suriyaya zərbə endirməsinin ağır nəticələrə səbəb olacağını bildirib. Rusiyanın “Kommersant” qəzeti yazır ki, Suriyada kimyəvi silahdan istifadə ABŞ və Rusiya arasında hərbi toqquşmalara səbəb ola bilər. Qəzet iddia edir ki, Rusiya iləABŞ arasında böhranın dərinləşməsi hərbi qarşıdurmanı qaçılmaz edir. Artıq belə bir vaxtda ABŞ hərbi donanmasının “Tomohawk” raketləri ilə silahlanmış daha bir hərbi gəmisinin Suriya sahillərinə doğru istiqamət aldığı üzə çıxıb. “USS Porter” esminetsi tezliklə Suriya sahillərinə çatacaq. . Bundan əvvəl ABŞ donanmasının “USS Donald Cook” esminetsinin Kiprdəki bazadan çıxaraq Suriya sahillərinə istiqamət aldığı, Rusiya hərbi bazasının yerləşdiyi Tartusun 100 kilometrliyində manevr etdiyi məlum olub.
Yayılan məlumatlara əsasən, Suriyada ABŞ hökumətə aid 22 kritik nöqtəni hədəfləyib. Hədəflər arasında İran dəstəkli şiə milis mərkəzləri və içində Rusiya əsgərləri olan Xüms və Tartus hərbi bazaları var. Vurulacaq hərbi bazalar mövzusunda Fransa, İngiltərə, ABŞ və İsrailin eyni koordinasiya daxilində hərəkət edəcəyi bildirilir. Suriya rejiminə aid qərargahların bombardmanı dəniz, hava və qurudan raket atəşləri ilə bərabər gerçəkləşdiriləcək. Suriyalı beynəlxalq münasibətlər mütəxəssisi Zəkəriyyə Molahafçı ABŞ-ın detallı bir hədəf xəritəsi tərtib etdiyini, Suriyada 20-dən çox hərbi mövqeyi gələcək bir neçə gün ərzində vurmağa hazırlaşdığını təsdiq edib. O bildirib ki, hədəflərin başında hərbi hava limanları var. Mütəxəssis qeyd edib ki, Xüms, Şam, Tartusla yanaşı, Haseki, Deyr-əz-Zor və Rakka sərhədləri daxilində olan bazalar da darmadağın ediləcək.
“Reuters” agentliyi də ABŞ hökumətindəki mənbəyə istinadən xəbər verir ki, Birləşmiş Ştatlar kimyəvi silah hücumuna cavab olaraq beynəlxalq hərbi cavab tədbirlərini nəzərdən keçirir. Mənbə konkret planı açıqlamayıb, ancaq deyib ki, hədəflər əvvəllər də kimyəvi silah hücumu üçün istifadə edilən obyektlər ola bilər. “Reuters” ehtimal olunan hədəflər arasında Latakiya əyalətindəki Hmeymim aerodromunun da olduğunu bildirir. Həmin aerodromda Rusiya aviabazası yerləşir. Ekspertlərə görə, ABŞ-ın Suriya rejiminə qarşı hərbi əməliyyatlarına Fransa, Böyük Britaniya, Yaxın Şərqin bəzi ölkələri də qatıla bilər. ABŞ-ın BMT-dəki xüsusi nümayəndəsi Nikki Heyli Vaşinqtonun cavab tədbirləri görəcəyini bildirib. Rusiya səfiri Vasili Nebenzya isə bildirib ki, Vaşinqton Suriya hökumət qüvvələrinə zərbə endirsə bunun ciddi nəticələri ilə qarşılaşmalı olacaq. Onun sözlərinə görə, ABŞ, İngiltərə və Fransa rəhbərliyi heç bir səbəb olmadan və nəticələri düşünmədən Rusiyaya qarşı cəbhələşir və digər ölkələri də buna sövq edirlər. Rusiyaya qarşı böhtan, təhqir, hərbi ritorika, şantaj, sanksiya və gücdən istifadə edildiyini deyən Nebenzya, “soyuq müharibə” dövründə belə, Rusiyaya qarşı bu cür nəzakətsiz hərəkət edilmədiyini bildirib
Hələlik isə Rusiya şərqi Qutada kimyəvi silah işlədilməsini qəti şəkildə təkzib edir və bu barədə yayılan məlumatları “uydurma”, foto və video dəlillərini isə “qurama” adlandırır. Hazırda Rusiya ordusunun yüksək döyüş hazırlığına gətirildiyi də məlumdur. Məhşur rusiyalı ideoloq Aleksandr Duqin bildirir ki, dünya yeni cahan savaşı astanasındadır: “İndi tamamilə aydındır ki, Qərbdə - ABŞ-da, İngiltərədə, İsraildə müəyyən dairələr əsl dünya müharibəsi başlatmaq niyyətindədir. “Skripal işi” və şərqi Qutadakı Duma şəhərində kimyəvi silahla hücum təqlidi onu başlatmaq üçün arqumentlərdir. Bu, Rusiyanın Suriyadakı böyük zəfərinə reaksiyadır”. Duqin bəşəriyyətin üçüncü dünya müharibəsinə heç zaman bu qədər yaxın olmadığını da bildirib: “Müharibə baş verəcək? Biz heç vaxt dünya müharibəsinə bu qədər yaxın olmamışıq. Biz indi ona Krımda, Abxaziyada və 2008-ci ildə Osetiyadakı hadisələr zamanı olandan daha yaxınıq. Bu o deməkdir ki, indi bu baş verə bilər, əks halda onlar “Skripal işi” və Suriyada kimyəvi hücumla həmlə etməzdilər”. Ekspertin sözlərinə görə, bu tip addımlar boş yerə atıla bilməz, çünki indi müharibə başlamırsa, o zaman buna görə cavab verməli olacaqsınız. Bu isə NATO-nun parçalanması və qlobal dominantlığın itirilməsi ilə nəticələnə bilər: “Vəziyyət çox ciddidir. İlk dəfədir ki, o həqiqətən ciddidir”.
NAHİD
